Reyn Ahazia

1Trigoryon Yerusalem a wrug y yowynka mab Ahazia myghtern yn y le; rag an bagas a dheuth gans an Arabyon dhe'n kamp re ladhsa oll an kottha mebyon. Ytho Ahazia mab Yehoram myghtern Yuda a dhallathas reynya. 2Ahazia o dew vloedh warn ugens pan dhallathas reynya; ev a reynyas unn vlydhen yn Yerusalem. Hanow y vamm o Athalia, myrgh-wynn Omri. 3Ev ynwedh a gerdhas yn fordhow chi Ahab rag y vamm o y gusulyadores yn tebelwrians. 4Ev a wrug an pyth o drog yn golok an Arloedh, dell wrussa chi Ahab; rag wosa mernans y das an re na o y gusulyadoryon, dh'y dhiswrians. 5Ev a holyas aga husul ynwedh pan eth gans Yehoram mab Ahab myghtern Ysrael rag gwerrya erbynn Hazael myghtern Aram yn Ramoth-gilead. An Aramysi a wolias Yehoram, 6hag ev a dhehwelis dhe vos yaghhes yn Yezreel a'n goliow re borthas yn Rama pan werryas erbynn Hazael myghtern Aram. Ahazia mab Yehoram myghtern Yuda eth yn-nans dhe weles Yoram mab Ahab yn Yezreel, drefenn ev dhe vos klav.

7Mes ordenys veu gans Duw may teffa terroes Ahazia der y vones yn-mes dhe vires Yoram. Yndella pan dheuth di ev eth yn-mes gans Yoram dhe vetya gans Yehu mab Numshi, neb a wrug an Arloedh y untya may tiswrella chi Ahab. 8Pan esa Yehu ow kollenwel breus war ji Ahab, ev a vetyas gans pennsevigyon Yuda ha gans mebyon breder Ahazia esa ow servya Ahazia, hag ev a's ladhas. 9Ev a hwilas Ahazia hag i a'n synsys hag ev owth omgudha yn Samaria. I a'n dros dhe Yehu ha'y ladha. I a'n ynkleudhyas, rag i a leveris, ‘Ev yw mab-wynn Yehoshafat neb a hwilas an Arloedh a leun golonn.’ Ha nyns o nagonan yn chi Ahazia gans nerth lowr dhe rewlya an wlaskor.

Athalia a Syns an Tron

10Pan wodhva Athalia, mamm Ahazia bos hy mab marow, hi a dhallathas distrui oll has ryel chi Yuda. 11Mes Yehosheba,22:11 Yehosheba: Ow siwya an Syriek. Ebrow Yehoshabeath. Gwel 2My 11:2., myrgh an myghtern, a gemmeras Yoash mab Ahazia, ha'y ladra dhiworth kres mebyon an myghtern esa ow pos ledhys; hi a'n gorras ev ha'y vammeth yn chambour gweli. Yndella Yehosheba, myrgh myghtern Yehoram ha gwreg Yehoyada an oferyas, drefenn hi dhe vos hwoer Ahazia, a'n kudhas dhiworth Athalia, ma na allas hi y ladha. 12Ev a besyas gansa hwegh blydhen, kudhys yn chi Duw, hag Athalia ow reynya war an tir.