Yoash a Ewnha an Tempel

1Yoash o seyth bloedh pan dhallathas reynya; ev a reynyas dew-ugens blydhen yn Yerusalem. Hanow y vamm o Sibia a Beer-sheba. 2Yoash a wrug an pyth o ewn yn golok an Arloedh oll dydhyow Yehoyada an oferyas. 3Yehoyada a gavas diw wreg ragdho, hag ev a dhineythis mebyon ha myrghes.

4Neb termyn a-wosa Yoash a erviras daswul chi an Arloedh. 5Ev a guntellas an oferysi ha'n Levysi hag y leveris dhedha, ‘Kewgh yn-mes dhe sitys Yuda ha kuntellewgh an toll vlydhenyek a Ysrael oll rag ewnhe chi agas Duw.’ Mes ny oberis an Levysi yn skav. 6Ytho an myghtern a elwis Yehoyada an penn, ha leverel dhodho, ‘Prag na wrussys dhe'n Levysi dri dhiworth Yuda ha dhiworth Yerusalem an doll a veu tollys gans Moyses, gwas an Arloedh, war bobel Ysrael rag tylda an dustuni?’ 7Rag mebyon Athalia, an debelvenyn na, re entersa yn chi Duw gans nerth, ha devnydhya daffar sakrys chi an Arloedh rag an Baalim hogen.

8An myghtern a worhemmynnis, hag y feu gwrys kofer, ha gorrys tu a-ves dhe yet chi an Arloedh. 9Gwarnyans a veu gwrys dre Yuda oll ha dre Yerusalem may fe dres rag an Arloedh an doll a dollas Moyses gwas Duw, war Ysrael y'n gwylvos. 10Oll an ledyoryon hag oll an bobel a lowenhas hag a dhros aga tholl hag a's gorras y'n kofer bys pan o leun. 11Peskweyth may feu an kofer dres dhe soedhogyon an myghtern gans an Levysi, pan welsons bos a-ji dhodho kals a arghans, ena skrifennyas an myghtern ha soedhek an arghoferyas a dho ha gwakhe an kofer ha'y gemmeres ha'y dhaskorr dh'y dyller. Yndella y hwrens dydh wosa dydh, hag i a guntellas arghans yn palster. 12An myghtern ha Yehoyada a'n ros dhe'n re a's tevo charj war ober chi an Arloedh, hag i a wobrenas seri men ha seri prenn rag nowydhhe chi an Arloedh, hag ynwedh oberoryon yn horn hag yn brons rag ewnhe chi an Arloedh. 13An re esa ow kul an ober a lavurya ha'n ewnheans eth yn-rag yn aga diwla; i a dhaswrug chi an Arloedh dh'y studh wiw hag a'n krevhas. 14Wosa i dhe worfenna, i a dhros remenant an arghans dhe'n myghtern ha Yehoyada ha ganso y feu gwrys lestri rag chi an Arloedh, lestri rag an servis ha rag an offrynnow leskys ha skudellow ha lestri a owr hag a arghans. I a offrynna offrynnow leskys yn chi an Arloedh heb hedhi oll dydhyow Yehoyada.

Dislelder Yoash

15Gyllys koth o Yehoyada ha leun a dhydhyow, hag ev a verwis. Y feu kans bloedh ha deg warn ugens pan verwis. 16I a'n ynkleudhyas yn sita Davydh gans an vyghternedh, drefenn ev dhe wul da yn Ysrael, hag a-barth Duw ha'y ji.

17Wosa mernans Yehoyada pennsevigyon Yuda a dheuth hag a omblegyas dhe'n myghtern. An myghtern a woslowas orta. 18I a forsakyas chi an Arloedh, Duw aga thasow, hag a servya an Asherim ha'n peulveyn. Konnar a dheuth war Yuda ha war Yerusalem drefenn aga hammweyth. 19Byttegyns ev a dhannvonas profoesi yn aga mysk rag aga dri arta dhe'n Arloedh; i a dhug dustuni orta, mes ny woslowsons.

20Ena spyrys Duw a dheuth war Zekaria mab Yehoyada an oferyas; ev a sevis a-ugh an bobel hag a leveris dhedha, ‘Yndellma a lever Duw: Prag yth esowgh diwostydh dhe worhemmynnow an Arloedh? Ny sewenowgh. Drefenn hwi dhe forsakya an Arloedh ev re'gas forsakyas hwi.’ 21Mes i a vrasas er y bynn, ha dre arghadow an myghtern i a'n labydhas gans meyn yn klos chi an Arloedh. 22Ny borthas Yoash an myghtern kov a'n tregeredh diskwedhys dhodho gans Yehoyada y das, mes ev a ladhas y vab. Hag ev yn eneworres, ev a leveris, ‘Re wello an Arloedh ha diella!’

Mernans Yoash

23Dhe benn an vlydhen lu Aram a dheuth yn-bann erbynn Yoash. I a dheuth dhe Yuda ha dhe Yerusalem, hag a ladhas oll pennsevigyon an bobel, hag a dhannvonas oll aga freydh dhe vyghtern Damaskus. 24Lu Aram re dhothya gans niver byghan a wer, mes an Arloedh a ros ynter aga diwla lu fest bras, drefenn i dhe asa an Arloedh, Duw aga thasow. Yndella i a gowlwrug breus war Yoash.

25Pan gildennsons, i a asas Yoash fest goliys. Y wesyon a vrasas er y bynn rag goes mab24:25 mab: Ow siwya an Septuagint ha'n Vulgat. Ebrow mebyon. Yehoyada an oferyas, hag i a'n ladhas war y weli. Yndella y ferwis; hag i a'n ynkleudhyas yn sita Davydh, mes ny'n ynkleudhsons yn bedhow an myghternedh. 26An re a vrasas er y bynn o Zabad mab Shimeath an Ammonyas, ha Yehozabad mab Shimrith an Moabyas, 27Derivadow a-dro dh'y vebyon hag a-dro dhe'n lies profoesans er y bynn, hag a-dro dhe dhastrehevel chi Duw yw skrifys y'n lyver-styryans24:27 lyver-styryansEbrow midrash. war Lyver an Myghternedh. Hag Amasia y vab a reynyas yn y le.