Reyn Amasia

1Amasia o pymp bloedh warn ugens pan dhallathas reynya, hag ev a reynyas naw blydhen warn ugens yn Yerusalem. Hanow y vamm o Yehoaddan a Yerusalem. 2Ev a wrug an pyth o ewn yn golok an Arloedh, mes a-der a leun golonn. 3Kettel veu an myghterneth fastys warnodho, ev a ladhas y wesyon re voldras y das, an myghtern. 4Mes ny ladhas aga mebyon, herwydh an pyth yw skrifys y'n lagha yn lyver Moyses, le may hworhemmynnis an Arloedh, ‘Ny vydh tasow ledhys a-barth mebyon, na mebyon a-barth tasow, mes pubonan a ledhir rag y beghes y honan.’

Ladhva an Edomysi

5Amasia a guntellas pobel Yuda, ha'ga gorra herwydh chi aga thasow yn-dann gaptenyon milyow ha kaptenyon kansow rag oll Yuda ha Benyamin. Ev a guntellas an re a ugens bloedh aga oes ha moy hag a gavas i dhe vos tri hans mil, kasoryon dhewisys gwiw rag bresel, gans an galloes dhe handla guw ha skoes. 6Ev a arvethas dhiworth Ysrael kans mil gasor krev a gans talent a arghans. 7Mes gour Duw a dheuth dhodho hag a leveris, ‘A vyghtern, na as lu Ysrael dhe vos genes, rag nyns usi an Arloedh gans Ysrael – oll an Efraymysi ma. 8Rag hwath mars edh gans an re ma ha bos krev yn batel, Duw a'th tomhwel a-rag an eskar; rag Duw a'n jeves galloes po dhe weres po dhe dhomhwel.’ 9Amasia a leveris dhe wour Duw, ‘Mes pandr'a wrav a-dro dhe'n kans talent re res vy dhe lu Ysrael?’ Gour Duw a worthybis, ‘An Arloedh a yll ri dhis moy ages hemma.’ 10Ena Amasia a dhibarthas an soudoryon a dheuth dhodho dhiworth Efraym, ha's dannvonas tre. Mes gyllys fest serrys orth Yuda yth ens, hag i a dhehwelas tre yn konnar meur.

11Amasia a gemmeras kolonn hag a ledyas y bobel yn-mes; ev eth dhe nans an Hoelan, hag ev a ladhas deg mil souder a Seir. 12Mebyon Yuda a gemmeras deg mil arall hag i yn few, hag a's dros dhe benn als, ha'ga thewlel yn-nans dhiworth penn an als, hag i oll a veu terrys dhe demmyn. 13Mes an soudoryon re bia dannvenys tre gans Amasia heb aga gasa dhe vos ganso, a omsettyas war sitys Yuda dhiworth Samaria bys Beth-horon; i a ladhas tri mil dhen ynna, hag a gemmeras meur a breydh.

14Wosa Amasia dhe dhehweles dhiworth ladhva an Edomysi, ev a dhros duwow mebyon Seir ha'ga drehevel avel y dhuwow y honan ha'ga gordhya, ha leski offrynnow dhedha. 15An Arloedh a sorras orth Amasia, hag a dhannvonas dhodho profoes, a leveris dhodho, ‘Prag re hwilsys duwow an bobel ma, na yllens delivra aga fobel aga honan a'th leuv jy?’ 16Mes hag ev ow kewsel an myghtern a leveris dhodho, ‘A'th wrussyn kusulyador ryel? Hedh! Prag y tegoedh ty dhe vos ledhys?’ An profoes a hedhis, mes y leveris, ‘My a woer Duw dhe ervira dha dhistrui, drefenn ty dhe wul hemma ha drefenn na woslewsys orth ow husul.’

Ysrael a Feth Yuda

17Ena Amasia myghtern Yuda a omgusulyas hag a dhannvonas dhe Yoash mab Yehoahaz mab Yehu a Ysrael, ow leverel, ‘Deus, miryn an eyl orth y gila fas orth fas.’ 18Yoash myghtern Ysrael a dhannvonas ger dhe Amasia myghtern Yuda, ‘An askallenn yn Lebanon a dhannvonas messaj dhe gederwydhenn yn Lebanon, ow leverel, “Ro dha vyrgh dhe'm mab avel gwreg”; mes best gwyls yn Lebanon a dremenas hag a drettyas war an askallenn. 19Ty a lever, “Mir, my re fethas Edom”, ha'th kolonn re'th trehevis yn-bann yn balghder. Mes lemmyn gorta tre; prag y strivydh rag trobel ha dri terroes warnas ha war Yuda genes?’

20Mes ny woslowas Amasia; rag bos hemma dhiworth Duw, dh'aga ri yn leuv Yoash, rag i dhe hwilas duwow Edom. 21Yndella Yoash myghtern Ysrael eth yn-bann hag ev hag Amasia myghtern Yuda a vatalyas, an eyl erbynn y gila yn Beth-shemesh, yw dhe Yuda. 22Yuda a veu fethys gans Ysrael; pub huni a fias dhe dre. 23Yoash myghtern Ysrael a synsis Amasia myghtern Yuda mab Yoash mab Ahazia yn Beth-shemesh dhiworth Yet Efraym dhe Yet an Gornell, ha'y fellder o peswar kans kevelin. 24Ev a gemmeras oll an owr ha'n arghans, hag oll an lestri kevys yn chi Duw, a via yn gwith Obed-edom; ev a gemmeras ynwedh tresorvaow chi an myghtern, ynwedh goestlow; ena ev a dhehwelis dhe Samaria.

Mernans Amasia

25Amasia mab Yoash myghtern Yuda, a vewas pymthek blydhen wosa mernans myghtern Yehoahaz a Ysrael. 26Gweythresow erell Amasia, a'n kynsa dhe'n diwettha, nyns yns i skrifys yn Lyver Myghternedh Yuda hag Ysrael? 27A'n termyn may treylyas Amasia dhiworth an Arloedh, i a wrug bras er y bynn yn Yerusalem, hag ev a fias dhe Lakish. Mes i a dhannvonas war y lergh dhe Lakish hag ena i a'n ladhas. 28I a'n dhros tre war vergh; ev a veu ynkleudhys gans y dasow yn sita Davydh.