Reyn Uzzia

1Ena oll pobel Yuda a gemmeras Uzzia, o hwetek bloedh, hag a'n gwrug myghtern yn le y das Amasia. 2Ev a dhastrehevis Eloth ha'y daskorr dhe Yuda, wosa an myghtern dhe goska gans y dasow. 3Hwetek bloedh o pan dhallathas reynya, hag ev a reynyas dewdhek blydhen ha dew-ugens yn Yerusalem. Hanow y vamm o Yekolia a Yerusalem. 4Ev a wrug an pyth o ewn yn golok an Arloedh, par dell wrussa y das Amasia. 5Yth esa ow hwilas mynnas Duw yn dydhyow Zekaria, neb a'n dyskas yn own Duw. Hedre ve ow hwilas mynnas an Arloedh, Duw a wrug dhodho seweni.

6Ev eth yn-mes hag a werryas erbynn an Filistysi, hag ev a dorras dhe'n dor fos Gath ha fos Yabne ha fos Ashdod; ev a dhrehevis sitys yn tiredh Ashdod hag yn tylleryow erell yn mysk an Filistysi. 7Duw a'n gweresas erbynn an Filistysi, hag erbynn an Arabyon trigys yn Gur-baal, hag erbynn an Meunysi. 8An Ammonysi a ros trubyt dhe Uzzia, ha'y vri a lesas bys or Ejyp, rag gyllys fest krev ova. 9Dres henna Uzzia a dhrehevis touryow yn Yerusalem, orth Yet an Gornell, orth Yet an Nans, hag orth an elin, hag ev a's keras. 10Ev a dhrehevis touryow y'n gwylvos hag ev a balas lies dowrargh, rag ev a'n jevo greow bras, keffrys y'n Shefela hag y'n plen. Hag ev a'n jevo tiogyon ha gonedhysi gwinlannow y'n vro venydhyek hag y'n tiryow feyth, rag ev a garas an dor. 11Dres henna Uzzia a'n jevo lu a gasoryon, dyskys yn batel, parys yn rannow herwydh an niverow y'n komptyans gwrys gans an skrifennyas Yeiel ha'n soedhek Maaseya, yn-dann gevarwoedhyans Hanania, onan a gaslewydhyon an myghtern. 12An niver kowal a bennow teyluyow ha dhedha kasoryon alloesek o dew vil ha hwegh kans. 13Yth esa yn-dann aga leuv lu a dri hans mil ha seyth, ha pymp kans, hag a werrya gans nerth meur, rag gweres an myghtern erbynn an eskar. 14Uzzia a brovias rag oll an lu, skoesow, guwow, basnettow, kaspowsyow, gwaregow, ha meyn rag tewlel. 15Yn Yerusalem ev a dhrehevis jynnow re bia devisys gans ynjinoryon sleygh, war an touryow hag orth an kornellow rag tewlel sethow ha meyn bras. Y vri a lesas pell, rag ev o marthys gweresys, bys pan o gyllys krev.

Uzzia yw Goethus hag a As Duw

16Mes pan ova gyllys krev, gyllys goethus o ynwedh, bys dh'y dhiswrians. Ev o dislen dhe'n Arloedh y Dhuw, hag yth entras yn tempel an Arloedh dhe leski ynkys war alter an ynkys. 17Mes Azaria an oferyas eth a-ji war y lergh, gans peswar ugens oferyas an Arloedh, gwer grev. 18I a sevis orth myghtern Uzzia hag a leveris dhodho, ‘Ny dhelledh dhis leski ynkys dhe'n Arloedh, mes y telledh dhe'n oferysi, mebyon Aron, yw sakrys dhe leski ynkys. Ke yn-mes a'n sentri; rag ty re wrug drog, ha ny dheg henna enor dhis dhiworth an Arloedh Duw.’ 19Ena Uzzia a sorras. Ev a'n jevo ynkyslester yn y dhorn rag leski ynkys; mes pan esa ow serri orth an oferysi kleves lovrek a omdhiskwedhas war y dal a-rag an oferysi yn chi an Arloedh, ryb alter an ynkys. 20Pan welas Azaria an arghoferyas hag oll an oferysi orto, ev dhe vos lovrek yn y dal, i a fyskas orth y worra yn-mes. Hag ev y honan a fyskas ow mos yn-mes, rag an Arloedh dh'y blagya. 21Myghtern Uzzia o lovrek bys yn dydh y vernans. Yth esa trigys yn chi dibarth, lovrek, eskes a ji an Arloedh. Y vab Yotham a'n jevo charj a ji an myghtern, ow koverna pobel an pow.

22Gweythresow erell Uzzia, a'n kynsa dhe'n diwettha, a veu skrifys gans an profoes Ysay mab Amos. 23Uzzia a goskas gans y dasow; i a'n ynkleudhyas gans y dasow yn ynkleudhva an vyghternedh, rag y lavarsons, ‘Ev yw lovrek.’ Y vab Yotham a reynyas yn y le.