Reyn Ahaz

1Ahaz o ugens bloedh pan dhallathas reynya; hag ev a reynyas hwetek blydhen yn Yerusalem. Ny wrug an pyth o ewn yn golok an Arloedh, kepar ha Davydh y das, 2mes ev a gerdhas yn fordhow myghternedh Ysrael. Ynwedh ev a wrug imajys teudh rag an Baalim; 3hag ev a leski sakrifisow yn nans mab Hinnom, hag a wre dh'y vebyon tremena dre dan herwydh usadow kasadow an kenedhlow a wrug an Arloedh aga fesya a-rag mebyon Ysrael. 4Ev a sakrifia ha leski offrynnow y'n tylleryow ughel, war an breow, hag yn-dann bub gwydhenn las.

Aram hag Ysrael a Feth Yuda

5Rakhenna an Arloedh y Dhuw a'n ros yn leuv myghtern Aram; i a'n fethas hag a gemmeras yn kethneth myns bras a'y dus hag a's dros dhe Damaskus. Ev a veu res ynwedh yn leuv myghtern Ysrael neb a'n fethas gans ladhva veur. 6Pekagh mab Remalia a ladhas hwegh ugens mil yn Yuda a-ji dhe unn jydh, oll anedha kasoryon grev, drefenn i dhe forsakya an Arloedh, Duw aga thasow. 7Zikri, kasor krev a Efraym a ladhas Maaseya mab an myghtern, Azrikam neb a'n jevo charj a'n palas, hag Elkana an nessa yn awtorita dhe'n myghtern.

An Profoes Oded

8An Ysraelysi a gemmeras yn kethneth dew kans mil a'ga breder, benynes, mebyon ha myrghes. I a gemmeras ynwedh meur a breydh dhiworta hag a dhros an preydh dhe Samaria. 9Mes yth esa profoes a'n Arloedh ena, Oded y hanow; ev eth yn-mes dhe vetya an lu a dheuth dhe Samaria, hag ev a leveris dhedha, ‘Drefenn an Arloedh Duw agas tasow dhe serri orth Yuda, ev re's ros yn agas leuv, mes hwi re's ladhas yn konnar re hedhas bys y'n nev. 10Lemmyn hwans a'gas beus dhe wul mebyon Yuda ha Yerusalem agas kethyon ha kethesow. A nyns owgh hwi ynwedh kablus a-rag an Arloedh agas Duw? 11Lemmyn klewewgh hemma, ha daskorrewgh an gethyon re gemmersowgh dhiworth agas breder, rag yma konnar fell an Arloedh warnowgh.’ 12Dres hemma neb pennow a'n Efraymysi, Azaria mab Yohanan, Berekia mab Meshillemoth, Hezekia mab Shallum, hag Amasa mab Hadlay, a sevis erbynn an re esa ow tehweles dhiworth an vresel, 13hag i a leveris dhedha, ‘Na dhrewgh an gethyon ma omma, rag ni a vydh kablus a-rag an Arloedh. A vynnowgh keworra dh'agan peghosow ha'gan kammweythresow? Rag agan kabel yw meur seulabrys, hag yma konnar fell erbynn Ysrael.’ 14Ytho an gasoryon ervys a asas an gethyon ha'n preydh a-rag an soedhogyon hag oll an kuntelles. 15Ena an wer a veu henwys rag an servis ma a sevis hag a gemmeras an gethyon, hag i a wiskas oll an re noeth gans dillas kevys y'n preydh, ha'ga arghena, ha ri dhedha boes ha diwes ha'ga ura. I a worras an re wann war asenes, ha'ga dri dh'aga breder yn Yeriko, sita an palmwydh. Ena i a dhehwelis dhe Samaria.

Assyria a skon a weres Yuda

16Y'n dydhyow na myghtern Ahaz a dhannvonas dhe vyghtern Assyria ow pysi gweres. 17Rag an Edomysi re omsettsa arta yn Yuda, ha'y fetha, ha doen dhe-ves kethyon. 18An Filistysi a omsettyas war sitys an Shefela ha'n Negeb a Yuda, ha synsi Beth-shemesh, Ayyalon, Gederoth, Soko gans hy threvow, Timna gans hy threvow ha Gimzo gans hy threvow, hag i a drevesigas ynna. 19Rag an Arloedh a iselhas Yuda drefenn Ahaz myghtern Ysrael, rag ev dhe dhyghtya heb fronn yn Yuda, ha re bia pur dhislel dhe'n Arloedh. 20Yndella Tiglath-pileser myghtern Assyria a dheuth er y bynn, ha'y arwaska yn le y grevhe. 21Ahaz a ravnas chi an Arloedh ha chiow an myghtern ha'n bennsevigyon. Ev a ros trubyt dhe vyghtern Assyria, mes ny veu gweres dhodho.

Dislelder ha Mernans Ahaz

22Yn prys y ahwer ev eth ha bos hwath moy dislel dhe'n Arloedh – an keth myghtern Ahaz ma. 23Rag ev a sakrifias dhe dhuwow Damaskus a'n fethsa, ha leverel, ‘Drefenn duwow myghternedh Aram dh'aga gweres, my a wra sakrifia dhedha, rag ma'm gweressons vy.’ Mes an re na o diswrians dhodho ha dhe Ysrael oll. 24Ahaz a guntellas war-barth lestri chi an Arloedh hag a's troghas yn temmigow. Ev a dhegeas darasow chi an Arloedh hag a wrug ragdho y honan alteryow yn pub kornell a Yerusalem. 25Yn pub sita ha tre yn Yuda ev a wrug tylleryow ughel rag leski offrynnow dhe dhuwow erell, ow provokya an Arloedh, Duw y dasow, dhe sorr. 26Y weythresow erell hag oll y fordhow, a'n kynsa dhe'n diwettha, yw skrifys yn Lyver Myghternedh Yuda hag Ysrael. 27Ahaz a goskas gans y dasow, hag i a'n ynkleudhyas y'n sita, yn Yerusalem; mes ny'n drosons yn bedhow myghternedh Ysrael. Y vab Hezekia a reynyas yn y le.