Reyn Hezekia

1Hezekia a dhallathas reynya pan o pymp bloedh warn ugens, hag ev a reynyas naw blydhen warn ugens yn Yerusalem. Hanow y vamm o Abia myrgh Zekaria. 2Ev a wrug an pyth o ewn yn golok an Arloedh, kepar dell wrug Davydh y das.

Glanheans an Tempel

3Yn kynsa blydhen y reyn, y'n kynsa mis, ev a igoras darasow chi an Arloedh ha'ga ewnhe. 4Ev a dhros an oferysi ha'n Levysi ha'ga huntelles yn plen an howldrehevel. 5Ev a leveris dhedha, ‘Goslowewgh orthiv Levysi! Omsakrewgh hwi, ha sakrewgh chi an Arloedh, Duw agas tasow, ha degewgh yn-mes an avlander dhiworth an tyller sans. 6Rag agan tasow re beu dislel hag i a wrug an pyth o drog yn golok an Arloedh. I a'n forsakyas, hag a dreylyas aga fas dhiworth trigva an Arloedh, ha treylya aga heyn. 7Ha moy es henna i a dhegeas darasow an portal ha difeudhi golow an lugern; ny offrynnsons ynkys, na ny wrussons offrynnow leskys y'n tyller sans dhe Dhuw Ysrael. 8Yndella konnar an Arloedh a dheuth war Yuda ha war Yerusalem, hag ev a's gwrug tra a euth, a skruth, hag a hwiban, dell welowgh gans agas dewlagas agas honan. 9Agan tasow re goedhas gans an kledha ha'gan mebyon ha'gan myrghes haga yma agan gwragedh yn kethneth drefenn henna. 10Yndella yma y'm kolonn gul kevambos gans an Arloedh Duw Ysrael, rag may treyllyo y sorr dhiworthyn. 11Ow mebyon, na vedhewgh logh lemmyn, rag an Arloedh re'gas dewisas dhe sevel a-ragdho ha'y servya, ha dhe vos y venystoryon, ha dhe leski offrynnow dhodho.’

12Ena an Levysi a sevis, Mahath mab Amasay, ha Yoel mab Azaria, a vebyon an Kohathysi; a vebyon Merari, Kish mab Abdi, hag Azaria mab Yehallelel; hag a'n Gershonysi, Yoagh mab Zimma, hag Eden mab Yoagh; 13a vebyon Elisafan, Shimri ha Yeuel; hag a vebyon Asaf, Zekaria ha Mattania; 14a vebyon Heman, Yehuel ha Shimei; hag a vebyon Yeduthun, Shemaia hag Uzziel. 15I a guntellas aga breder hag a omsakras aga honan; ena i a entras, par dell re worhemmynnsa an myghtern, herwydh geryow an Arloedh rag glanhe chi an Arloedh. 16An oferysi eth a-berth yn pervedh chi an Arloedh rag y lanhe. I a dhros yn-mes oll an avlander a gavsons yn sentri an Arloedh, dhe glos chi an Arloedh; ha'n Levysi a'n kemmeras ha'y dhoen yn-mes dhe nans Kidron. 17I a dhallathas an sakrans yn kynsa dydh an kynsa mis, hag yn ethves dydh an mis i a dheuth bys portal an Arloedh. Dre eth dydh i a sakras chi an Arloedh, hag yn hwetegves dydh an kynsa mis i a worfennas. 18Ena i eth a-ji dhe vyghtern Hezekia ha leverel, ‘Ni re lanhas chi an Arloedh oll, alter an offrynn leskys hag oll y lestri, ha moes bara an wolok hag oll hy daffar. 19Ni re bareusis ha sakra oll an daffar a veu skonys gans myghtern Ahaz der y reyn, pan ova dislel. Ymons i a-rag alter an Arloedh.’

Gordhyans Tempel yw Daswrys

20Ena myghtern Hezekia a sevis yn-bann a-varr hag a guntellas soedhogyon an sita, hag eth yn-bann dhe ji an Arloedh. 21I a dhros seyth tarow, seyth hordh, seyth oen, ha seyth bogh avel offrynn pegh rag an wlaskor, rag an sentri ha rag Yuda. Ev a worhemmynnis dhe'n oferysi, mebyon Aron, aga offrynna war alter an Arloedh. 22Ytho i a ladhas an terewi, ha'n oferysi a dhegemmeras an goes ha'y skoellya orth an alter; i a ladhas an hordhes ha'ga goes a veu skoellys orth an alter; i a ladhas an eyn ynwedh ha'ga goes a veu skoellys orth an alter.

23Ena an boghes rag an offrynn pegh a veu dres a-rag an myghtern ha'n kuntelles, hag i a worras aga diwleuv warnedha. 24An oferysi a's ladhas hag a wrug offrynn gans aga goes war an alter, rag gul dehwelyans a-barth oll Ysrael. Rag an myghtern a worhemmynnis may hwreller an offrynn leskys ha'n offrynn pegh a-barth oll Ysrael.

25Ev a dhesedhas an Levysi yn chi an Arloedh gans symbalys, telynnow ha sowtris, herwydh gorhemmynn Davydh ha Gad, gwelesydh an myghtern ha Nathan an profoes; rag y feu an gorhemmynn dhiworth an Arloedh der y brofoesi. 26An Levysi a sevis gans daffar menestrouthi Davydh, ha'n oferysi gans hirgern. 27Hezekia a worhemmynnis mayth offrynner an offrynn leskys war an alter. Pan dhallathas an offrynn leskys, an gan dhe'n Arloedh a dhallathas ynwedh, ha'n hirgern gans daffar Davydh myghtern Ysrael. 28Oll an kuntelles a wordhyas, an ganoryon a ganas, ha'n hirgern a sonas; hag oll a hemma a besyas bys pan veu diwedhys an offrynn leskys. 29Pan veu an offrynn gorfennys, an myghtern hag oll esa ganso a blegyas dhe'n dor hag a wordhyas. 30Myghtern Hezekia ha'n soedhogyon a worhemmynnis dhe'n Levysi may kannens gormola dhe'n Arloedh gans geryow Davydh ha'n gwelesydh Asaf. I a ganas gormola gans lowena, hag i a blegyas dhe'n dor hag a wormolas.

31Ena Hezekia a leveris, ‘Lemmyn sakrys owgh dhe'n Arloedh; dewgh nes, ha drewgh sakrifisow hag offrynnow grasyans rag chi an Arloedh.’ An kuntelles a dhros sakrifisow hag offrynnow grasyans hag oll a's tevo kolonn volonjedhek a dhros offrynnow leskys. 32Niver an offrynnow leskys dres gans an kuntelles o deg tarow ha tri ugens, kans hordh, ha dew kans oen; oll an re ma o rag offrynn leskys dhe'n Arloedh. 33An offrynnow sakrys o hwegh kans tarow ha tri mil dhavas. 34Mes tanow o niver an oferysi ha ny yllons kroghena oll an offrynnow leskys; ytho aga breder an Levysi a's gweresas bys pan o an ober gorfennys ha bys pan o oll an oferysi erell sakrys, rag an Levysi o moy diwysyk ages an oferysi owth omsakra aga honan. 35Yth esa myns bras a offrynnow leskys, war-barth gans blonek an offrynnow kres, hag yth esa offrynnow diwes rag an offrynnow leskys. Yndella servis chi an Arloedh a veu daswrys. 36Hezekia hag oll an bobel a lowenhas drefenn an pyth a wrussa Duw a-barth an bobel; rag an dra re hwarvia yn uskis.