Sakrans an Tempel

1Ena Solomon a leveris, ‘An Arloedh re leveris ev dhe driga yn tewlder tew. 2My re dhrehevis chi ughel, tyller ragos dhe driga ynno bys vykken.’

3Ena an myghtern a dreylyas a-dro hag a vennigas oll kuntelles Ysrael; hag yth esa oll kuntelles Ysrael ow sevel. 4Ev a leveris, ‘Benniges re bo an Arloedh, Duw Ysrael, neb gans y leuv re geweras an pyth a ambosas gans y anow dhe Davydh ow thas, ow leverel, 5“A-dhia'n jydh ynno may tres vy ow fobel yn-mes a Ejyp, ny dhewisis vy sita a oll loethow Ysrael dhe dhrehevel chi, rag may fe ow hanow ena, na ny dhewisis vy gour vyth dhe vos rewler war ow fobel Ysrael; 6mes my a dhewisas Yerusalem rag may fe ow hanow ena, ha my a dhewisas Davydh dhe vos war ow fobel Ysrael.” 7Y feu yn kolonn ow thas Davydh drehevel chi rag hanow an Arloedh, Duw Ysrael. 8Mes an Arloedh a leveris dhe'm tas Davydh, “Rag bos y'th kolonn drehevel chi rag ow hanow, ty re wrug yn ta; 9byttegyns ty ny drehevydh chi, mes dha vab a vydh genys dhis, ev a dhrehav chi rag ow hanow.” 10Lemmyn an Arloedh re geweras y ambos a wrug; rag my re holyas ow thas Davydh, ha my re esedhas war dron Ysrael, dell ambosas an Arloedh, ha my re dhrehevis an chi rag hanow an Arloedh, Duw Ysrael. 11My re worras ena an argh, ynno may ma kevambos an Arloedh, a wrug ev gans mebyon Ysrael.’

Pysadow Solomon

12Ena Solomon a sevis a-rag alter an Arloedh gans oll kuntelles Ysrael, hag a ystynnas y dhiwleuv. 13Solomon re wrussa bynk6:13 bynk: Ow siwya an Septuagint ha'n Vulgat. Ebrow pott. a vrons, pymp kevelin a-hys, pymp kevelin a-les, ha tri hevelin yn ughelder, ha'y gorra y'n kres an klos. Ev a sevis warnedhi, ha mos war benn-dewlin a-rag oll kuntelles Ysrael, hag ev a ystynnas y dhiwleuv war-tu ha nev. 14Ev a leveris, ‘A Dhuw Ysrael, nyns eus Duw avelos, naneyl yn nev nag yn nor, ow kwitha kevambos ha tregeredh gans dha wesyon hag a gerdh a-ragos gans oll aga holonn. 15Ty re withas dha ambos dhe'th was, ow thas Davydh. Ty a ambosas gans dha anow, ha hedhyw ty re's keweras gans dha leuv. 16Ha lemmyn, A Arloedh, Duw Ysrael, gwith an ambos dhe'm tas Davydh, pan leversys, “Ny fyll dhis gour a-dhiworthiv dhe esedha war dron Ysrael, unnweyth mar kwittha dha vebyon aga fordh, dhe gerdhes yn ow lagha par dell re gerdhsys a-ragov.” 17Lemmyn, A Arloedh, Duw Ysrael, surha dha er a leversys dhe'th was Davydh.

18‘Mes a yll Duw triga yn hwir gans mab-den war an dor? Ny yll nev, na'n ughella nev hogen, dha synsi, pygemmys le an chi ma re dhrehevis! 19Goslow orth pysadow dha was ha'y aspysadow, A Arloedh ow Duw, ow klewes an kri ha'n pysadow a bys dha was dhis. 20Re bo dha dhewlagas igor war-tu ha'n chi ma, dydh ha nos, an tyller ynno mayth ambossys dhe worra dha hanow, ha klew an pysadow a bys dha was war-tu ha'n tyller ma 21Klew aspysadow dha was ha'th pobel Ysrael, pan bysons war-tu ha'n tyller ma. Klew dhiworth nev, tyller dha drigva; klew ha gav.

22‘Mar pegh gour erbynn y gentrevek, ha konstrynys yw dhe wul ti, hag ev a dheu hag a de a-rag dha alter y'n chi ma, 23klew dhiworth nev hag oberi; breus dha wesyon, owth attyli dhe'n den kablus dre dhri y fara war y benn y honan, hag owth ewnhe den gwiryon, ha'y rewardya herwydh y wiryonedh.

24‘Mar pydh dha bobel Ysrael fethys a-rag eskar, drefenn i dhe begha er dha bynn, hag ena i a dreyl arta dhis, ha gormel dha hanow, ha pysi ha pledya genes y'n chi ma, 25klew dhiworth nev, ha gav pegh dha bobel Ysrael, ha'ga dri arta dhe'n tir a resys dhedha ha dh'aga thasow.

26‘Pan vydh nev deges ha nyns eus glaw, drefenn i dhe begha er dha bynn, hag ena i a bys war-tu ha'n tyller ma, gormel dha hanow, ha treylya dhiworth aga fegh, drefenn ty dh'aga hessydhya, 27klew dhiworth nev ha gav pegh dha wesyon dhedha, dha bobel Ysrael, pan dhyskydh dhedha an fordh vas ynni may tegoedh dhedha kerdhes; ha dannvon glaw war dha dir a resys dhe'th pobel avel eretons.

28‘Mars eus divoetter y'n tir, po pla, po kleves losk, po kleves melynheans, hes a lokustes ha'n lokust distruel, mar omsett aga eskerens a-dro dhe sitys pynag, po mars eus plag pynag, po kleves pynag; 29po pysadow pynag, po aspysadow pynag gans den pynag, po gans oll dha bobel Ysrael, hag i oll owth aswonn aga duwon aga honan ha'ga galarow aga honan, hag owth ystynn aga diwleuv war-tu ha'n chi ma, 30klew dhiworth nev, tyller dha drigva, gav, hag attal dhe beub herwydh aga fara, rag ty unnsel a woer kolonn tus. 31Yndella i a berth own ahanas ha kerdhes y'th fordhow oll dydhyow aga bewnans y'n tir a resys dh'agan tasow.

32‘Ynwedh pan dheu estrenyon nag eus a'th pobel Ysrael, dhiworth pow pell, drefenn dha hanow a vri ha'th leuv grev, ha'th vregh ystynnys, hag i a dheu ha pysi war-tu ha'n chi ma, 33klew dhiworth nev, tyller dha drigva, ha gul pup-tra a bys an estren dhiworthis, rag mayth aswonno oll poblow an norvys dha hanow ha perthi own ahanas, par dell y'n aswonn dha bobel Ysrael, ha rag may hwodhvo bos dha hanow gelwys war an chi ma, a dhrehevis vy.

34‘Mars a dha bobel dhe vatalyas orth aga eskerens, yn fordh bynag ma's dannvensys, hag i a bys dhis war-tu an sita ma a dhewissys ha war-tu an chi re dhrehevis vy rag dha hanow, 35ena klew dhiworth nev aga fysadow ha'ga aspysadow, ha menten aga hen.

36‘Mar peghons er dha bynn – rag nyns eus onan na begh – ha ty a serr orta ha'ga ri dhe eskar, neb a's deg dhe-ves yn divroedh dhe dir pell po a-ogas, 37ena mar pydhons ow tos dh'aga skians y'n pow dhodho mayth yns degys avel divresow, hag i a's teves edrek, hag a bled genes yn pow aga divroedh, ow leverel, “Ni re beghas ha gul drogoberow; ni re omdhug yn trog”; 38mara's teves edrek gans oll aga holonn hag enev yn tir aga divroedh dhodho mayth ens degys, ha pysi war-tu an tir a resys dh'aga thasow, ha war-tu ha'n sita re dhewissys, ha war-tu ha'n chi re dhrehevis vy rag dha hanow, 39ena klew dhiworth nev, dhiworth tyller dha drigva aga fysadow ha'ga aspysadow, menten aga hen ha gav dhe'th pobel, re beghas er dha bynn. 40Lemmyn, ow Duw, re bo igor dha dewlagas ha re woslowo dha dhiwskovarn an pysadow gwrys y'n tyller ma.

41Lemmyn yn-bann, A Arloedh Duw, dhe'th powesva

ty hag argh dha nerth.

Bedhes dha oferysi, A Arloedh Duw, gwiskys gans selwyans,

ha lowenhes dha syns y'th tader.

42A Arloedh Duw, na skorn dha untys.

Porth kov a'th tregeredh orth Davydh dha was.’