Yuda ha Benyamin Kerys

1Pan dheuth Rehoboam dhe Yerusalem, ev a guntellas chi Yuda ha Benyamin, kans mil ha peswar-ugens a gasoryon dhewisys, rag omladh erbynn Ysrael, rag daskorr an wlaskor dhe Rehoboam. 2Mes ger an Arloedh a dheuth dhe Shemaia gour Duw: 3Lavar dhe Rehoboam mab Solomon myghtern Yuda, ha dhe oll an Ysraelysi yn Yuda ha Benyamin, 4‘Yndellma y lever an ARLOEDH: Nyns ewgh yn-bann na batalyas orth dha vreder. Dehweles pub onan dhe dre, rag yma an dra ma ahanav vy.’ Yndella i a woslowas orth ger an Arloedh hag a dreylyas dhiworth an eskerdh erbynn Yeroboam.

5Yth esa Rehoboam trigys yn Yerusalem, hag ev a dhrehevis dinasow kerys rag defens yn Yuda. 6Ev a geras Bethlehem, Etam, Tekoa, 7Beth-sur, Soko, Adullam, 8Gath, Maresha, Zif, 9Adoraym, Lakish Azeka, 10Sora, Ayyalon, ha Hebron, sitys kerys usi yn Yuda hag yn Benyamin. 11Ev a wrug an keryow krev, hag a worras kaslewydhyon ynna, ha provians a voes, a oyl hag a win. 12Ev a worras skoesow ha guwow yn oll an sitys, hag a's gwrug fest krev. Yndella ev a synsis Yuda ha Benyamin.

Oferysi ha Levysi a Skoedh Rehoboam

13An oferysi ha'n Levysi der Ysrael oll a dheuth dhodho dhiworth oll aga thiryow. 14An Levysi re assa aga feurvaow ha'ga ferghennogeth ha re dhothya dhe Yuda ha dhe Yerusalem, drefenn Yeroboam ha'y vebyon re's lettsa a servya avel oferysi an Arloedh, 15ha re apoyntsa y oferysi y honan rag an tylleryow ughel, ha rag an jevanow-gaver, ha rag an leughi re wrussa ev. 16An re dhiworth pub loeth a Ysrael, re settsa aga holonn dhe hwilas an Arloedh, Duw Ysrael, a dheuth war aga lergh dhe Yerusalem, rag sakrifia dhe'n Arloedh, Duw aga thasow. 17I a grevhas gwlaskor Yuda hag i a skoedhyas Rehoboam mab Solomon teyr blydhen, ow kerdhes yn fordh Davydh ha Solomon y'n teyr blydhen na.

Demmedhyansow Rehoboam

18Rehoboam a gemmeras avel y wreg Mahalath myrgh Yerimoth mab Davydh hag a Abihayl myrgh Eliab mab Yesse. 19Hi a dhineythis ragdho mebyon: Yeush, Shemaria, ha Zaham, 20War hi lergh ev a gemmeras Maaka myrgh Absalom, ha hi a dhineythis ragdho Abia, Attay, Ziza, ha Shelomith. 21Rehoboam a gara Maaka myrgh Absalom moy es dell gara ev y wragedh erell ha'y iswragedh. Ev a'n jevo etek gwreg ha tri-ugens iswreg, hag ev a dhineythis eth mab warn ugens ha tri-ugens myrgh. 22Rehoboam a apoyntyas Abia mab Maaka avel penn pennsevik yn mysk y vreder, rag y wul myghtern ar lergh. 23Ev a dhyghtyas yn fur, hag a lesas re a'y vebyon der oll ranndiryow Yuda ha Benyamin, yn oll an sitys kerys. Ev a ros dhedha provians meur, ha kavoes lies gwreg ragdha.