Ejyp a Omsett erbynn Yuda

1Pan veu fastys myghterneth Rehoboam hag ev o gyllys krev, ev a forsakyas lagha an Arloedh, ev hag oll Ysrael ganso. 2Y'n pympes blydhen a vyghtern Rehoboam, drefenn i dhe vos dislel dhe'n Arloedh, Shishak myghtern Ejyp a dheuth yn-bann erbynn Yerusalem 3gans dewdhek mil jarett ha tri mil marghoglu. Ha pobel dhiniver a dheuth ganso dhiworth Ejyp – Lybysi, Sukkiysi hag Ethiopysi. 4Ev a gemmeras an sitys kerys a Yuda hag a dheuth bys Yerusalem. 5Ena an profoes Shemaia a dheuth dhe Rehoboam ha dhe bennsevigyon Yuda, o kuntellys yn Yerusalem drefenn Shishak, hag a leveris dhodho, ‘Yndellma y lever an Arloedh: Hwi a'm forsakyas, ytho my re'gas forsakyas dhe leuv Shishak.’ 6Ena soedhogyon an myghtern a omuvelhas, hag a leveris, ‘An Arloedh yw gwiryon.’ 7Pan welas an Arloedh i dhe omuvelhe, ger an Arloedh a dheuth dhe Shemaia, ow leverel, ‘Rag i dhe omuvelhe, ny's diswrav, mes my a wront dhedha neb delivrans, ha ny vydh ow sorr meur diverys war Yerusalem dre leuv Shishak. 8Byttegyns i a vydh y servysi; ena i a woer an dihevelepter ynter ow servis vy ha servis gwlaskordhow tiryow erell.’

9Yndella myghtern Shishak a Ejyp a dheuth yn-bann erbynn Yerusalem; ev a gemmeras dhe-ves tresoryow chi an Arloedh ha tresoryow chi an myghtern; ev a gemmeras pup-tra. Ev a gemmeras ynwedh an skoesow a owr gwrys gans Solomon. 10Myghtern Rehoboam a wrug yn aga le skoesow a vrons, ha'ga gorra yntra diwleuv soedhogyon an gorfwithysi hag a witha daras chi an myghtern. 11Peskweyth mayth e an myghtern a-ji dhe ji an Arloedh, an gorfwithysi a dho orth aga doen, hag ena i a's degi arta dhe stevell an gorfwithysi. 12Drefenn ev dhe omuvelhe, sorr an Arloedh a dreylyas dhiworto, ma na ve disrwyans leun. An studhyow o da yn Yuda.

Mernans Rehoboam

13Myghtern Rehoboam a fastyas y honan yn krev yn Yerusalem hag a besyas avel myghtern. Rehoboam o unn bloedh ha dew-ugens pan dhallathas reynya; ev a reynyas seytek blydhen yn Yerusalem, an sita re dhewissa an Arloedh yn-mes a oll loethow Ysrael rag gorra y hanow ena. Hanow y vamm o Naama an Ammonyades. 14Ev a wre drog rag ny settyas y golonn dhe hwilas an Arloedh.

15Gweythresow Rehoboam, a'n kynsa dhe'n diwettha, a nyns i skrifys yn kovadhow Shemaia hag Iddo an gwelesydh, kovrestrys herwydh linyeth? Yth esa gwerrya heb hedhi yntra Rehoboam ha Yeroboam, 16Rehoboam a goskas gans y dasow hag a veu ynkleudhys yn sita Davydh; ha'y vab Abiya a reynyas yn y le.