1Spyrys Duw a dheuth war Azaria mab Oded. 2Ev eth yn-mes rag metya gans Asa, hag a leveris dhodho, ‘Goslow orthiv, Asa hag oll Yuda ha Benyamin. Yma an Arloedh genowgh, ha hwi ganso. Mara's hwilowgh, ev a vydh kevys genowgh, mes mara's gesowgh, ev a'gas gas. 3Termyn hir y feu Ysrael heb an gwir Dhuw, ha heb oferyas dhe dhyski, ha heb lagha, 4mes pan dreylsons yn aga ahwer dhe'n Arloedh, Duw Ysrael, ha'y hwilas, kevys veu gansa. 5Y'n termynyow na, ny ylli tus mos yn-mes na dos a-ji yn sawder, drefenn an deray bras esa war oll trigoryon an tiryow. 6Terrys yn temmigow yth ens, gwlaskor erbynn gwlaskor ha sita erbynn sita, rag yth esa Duw orth aga throbla gans ankres a bub eghenn. 7Mes hwi, bedhewgh krev, ha na esewgh dh'agas diwla bos lows; rag y fydh pewas a'gas ober.’

8Pan glewas Asa an geryow ma, profoesans Azaria mab Oded, kennerthys o, hag ev a dhefendyas dhe-ves an taklow kasadow dhiworth oll tiredh Yuda ha Benyamin ha dhiworth an sitys re gemmersa yn bro venydhyek Efraym. Ev a ewnhas alter an Arloedh esa a-rag portal chi an Arloedh. 9Ev a guntellas oll Yuda ha Benyamin, ha'n tus a Efraym, Manasse, ha Simeon esa trigys gansa avel alyons, rag lies re gilfisa dhodho dhiworth Ysrael pan wodhyens bos an Arloedh y Dhuw ganso. 10Omguntellys yth ens yn Yerusalem y'n tressa mis a'n pymthegves blydhen a reyn Asa. 11I a sakrifias dhe'n Arloedh y'n jydh na, dhiworth an preydh re dhrosens, seyth kans ojyon ha seyth mil dhavas. 12I a entras yn kevambos dhe hwilas an Arloedh, Duw aga thasow, gans oll aga holon ha gans oll aga enev. 13Piw pynag ny vynna hwilas an Arloedh, Duw Ysrael, y tegoedhva may fedha ledhys, po yowynk po koth, po gour po benyn. 14I a dos ti dhe'n Arloedh gans lev ughel, ha gans garma, ha gans hirgern ha gans kern. 15Oll Yuda a lowenhas orth an ti; rag i re dosa gans oll aga holonn. I a'n hwilas gans oll aga bodh, hag ev o kevys gansa. Ha'n Arloedh a ros dhedha powes oll a-derdro. 16Ynwedh ev a wordhellos Maaka mamm myghtern Asa dhiworth hy soedh avel mamm-vyghternes, drefenn hi dhe wruthyl imaj kasadow a Ashera. Asa a droghas dhe'n dor hy thra gasadow ha'y vrewi ha'y leski yn nans Kidron. 17Nyns o an tylleryow ughel kemmerys yn-mes a Ysrael. Byttegyns kolonn Asa o perfydh oll y dhydhyow. 18Ev a dhros yn chi Duw rohow sakrys y das ha'y rohow sakrys y honan – arghans, owr ha daffar. 19Ha nyns esa bresel vytholl bys an pymthegves blydhen warn ugens a reyn Asa.