Dampnya an Kevambos Gans Aram

1Y'n hweghves blydhen warn ugens a reyn Asa, Baasha myghtern Ysrael eth yn-bann erbynn Yuda, hag ev a dhrehevis Rama ma na alla nebonan mos yn-mes po dos a-ji dhe diredh Asa myghtern Yuda. 2Ena Asa a gemmeras an arghans ha'n owr yn-mes a dresorvaow chi an Arloedh, hag a's dannvonas dhe Ben-hadad myghtern Aram, trigys yn Damaskus, ow leverel, 3‘Bedhes kevambos yntra my ha ty, kepar dell veu ynter ow thas vy ha'th tas jy; Yth esov ow tannvon dhis arghans hag owr; ke, torr dha gevambos gans Baasha myghtern Ysrael, rag mayth omdenno a-dhiworthiv.’ 4Ben-hadad a woslowas orth myghtern Asa, hag a dhannvonas kaslewydhyon y luyow erbynn sitys Ysrael. I a fethas Iyon, Dan, Abel-maym, hag oll sitys-gwithva Naftali. 5Pan glewas Baasha hemma, ev a astelas drehevel Rama, hag a asas an ober dhe hedhi. 6Ena myghtern Asa a dhros oll Yuda, hag i a dhug dhe-ves meyn ha prenn Rama, gansa may hwrug Baasha dastrehevel Geba ha Mispa.

7Y'n termyn na an gwelesydh Hanani a dheuth dhe Asa myghtern Yuda, hag a leveris dhodho, ‘Drefenn ty dhe fydhya yn myghtern Aram, a-der fydhya y'n Arloedh dha Dhuw, lu myghtern Aram re dhienkas dhiworthis. 8A nyns o an Ethiopysi ha'n Libysi lu bras, gans pur lies charett ha marghoglu? Byttegyns drefenn ty dhe fydhya y'n Arloedh, ev re's ros y'th leuv. 9Rag dewlagas an Arloedh a wander dres oll an norvys rag krevhe an re hag yth yw aga holonn lel dhodho. Ty re wrug tra foll y'n dra ma; rag alemma rag ty a' fydh breselyow.’ 10Ena Asa a sorras orth an gwelesydh, hag a'n gorras y'n stokkys, yn prison, drefenn ev dhe berthi konnar orto rag hemma. Hag Asa a debeldhyghtyas re a'n bobel y'n keth termyn na.

Kleves ha Mernans Asa

11Gweythresow Asa, a'n kynsa dhe'n diwettha, yw skrifys yn Lyver Myghternedh Yuda hag Ysrael. 12Y'n nownsegves blydhen warn ugens a'y reyn, Asa a borthas kleves yn y dhewdroes, ha gyllys sevur o; byttegyns kyn y'n jevo y gleves, ny hwilas an Arloedh, mes ev a hwilas gweres gans an vedhogyon. 13Ena Asa a goskas gans y dasow, ow merwel y'n kynsa blydhen ha dew-ugens a'y reyn. 14I a'n ynkleudhyas y'n bedh re droghas ev ragdho y honan yn sita Davydh. I a'n gorras war eler kudhys gans spisys kemmyskys yn konnyk; hag i a wrug tan bras yn y enor.