Reyn Yehoshafat

1Y vab Yehoshafat a reynyas yn y le, hag a grevhas y savla erbynn Ysrael. 2Ev a worras kasoryon yn oll an sitys kerys a Yuda hag a worras savleow-gwithysi yn pow Yuda hag y'n sitys a Efraym re beu kemmerys gans y das Asa. 3Yth esa an Arloedh gans Yehoshafat drefenn ev dhe gerdhes yn fordhow y das kyns; ny hwilas an Baalim, 4mes ev a hwilas Duw y das hag a gerdhas yn y worhemmynnow, a-der fordhow Ysrael. 5Yndella an Arloedh a fastyas an wlaskor yn y leuv. Oll Yuda a dhros trubyt dhe Yehoshafat, hag ev a'n jevo rychys meur hag enor. 6Y golonn o len yn fordhow an Arloedh; ha dres henna ev a dhileas an tylleryow ughel ha'n Asherim dhiworth Yuda.

7Yn tressa blydhen y reyn ev a dhannvonas y soedhogyon, Ben-hayl, Obadia, Zekaria, Nethanel, ha Mikaya, dhe dhyski yn sitys Yuda. 8Gansa yth esa an Levysi, Shemaia, Nethania, Zebadia, Asahel, Shemiramoth, Yehonathan, Adoniya, Tobiya, ha Tob-adoniya, ha gansa an oferysi Elishama ha Yehoram. 9I a dhyski yn Yuda ha gansa lyver lagha an Arloedh; i e oll a-derdro der oll sitys Yuda ow tyski yn mysk an bobel.

10Own an Arloedh a goedhas war oll gwlaskordhow an tiryow yn kyrghynn Yuda, ha ny vreselsons erbynn Yehoshafat 11Re a'n Filistysi a dhros trubyt dhe Yehoshafat, ha shour a arghans; ha'n Arabyon ynwedh a dhros dhodho seyth kans hordh, ha seyth kans gaver gorow ha seyth mil. 12Gyllys o Yehoshafat moy ha moy krev. Ev a dhrehevis dinasow ha sitys-gwithva yn Yuda. 13Ev a wrug oberow meur yn sitys Yuda. Ev a'n jevo soudoryon, kasoryon alloesek, yn Yerusalem. 14Hemm o an rol anedha herwydh chi aga thasow: a Yuda kaslewydhyon milyow: Adna an kaslewydh, gans tri hans mil gasor galloesek, 15ha nessa dhodho Yehohanan an kaslewydh gans dew kans ha peswar ugens mil, 16ha nessa dhodho Amasia mab Zikri, bolonjedhek yn servis an Arloedh, gans dew kans mil gasor galloesek. 17A Benyamin: Elyada, kasor galloesek, gans dew kans mil ervys gans gwarak ha skoes, 18ha nessa dhodho Yehozabad gans kans mil ha peswar ugens parys rag bresel. 19Yth esa an re ma yn servis an myghtern, ha dres henna an re a worras an myghtern y'n sitys kerys der oll Yuda.