1Yehoshafat myghtern Yuda a dhehwelis yn saw dh'y ji yn Yerusalem. 2Yehu mab Hanani an gwelesydh eth dhe vetya ganso hag a leveris dhe vyghtern Yehoshafat, ‘Yw da ty dhe weres an tebelwas ha kara an re hag a gas an Arloedh? Rag henna sorr a dheu warnas dhiworth an Arloedh. 3Byttegyns neppyth a dhader yw kevys ynnos, rag ty re dhiswrug an Asheroth yn-mes a'n tir, ha re settyas dha golonn dhe hwilas Duw.’

Dasfurvyansow Yehoshafat

4Yth esa Yehoshafat trigys yn Yerusalem; ena ev eth yn-mes arta yn mysk an bobel, a Beer-sheba dhe vro venydhyek Efraym, ha'ga daskorr dhe'n Arloedh, Duw aga thasow. 5Ev a apoyntyas breusysi y'n tir yn oll an sitys kerys, sita ha sita, 6hag a leveris dhe'n vreusysi, ‘Prederewgh a'n pyth a wrewgh, rag ny vreusowgh a-barth mab-den mes a-barth an Arloedh; yma ev genowgh ow ri breus, 7Yndella bedhes own an Arloedh warnowgh; attendyewgh an pyth a wrewgh, rag nyns eus anewnder gans an Arloedh agan Duw, na faverans, na kemmeres falswobrow.’

8Yn Yerusalem ynwedh Yehoshafat a apoyntyas re a'n Levysi ha'n oferysi ha pennow teyluyow Ysrael dhe ri breus an Arloedh, ha dhe vos maynoryon yn dadhlow rag an re trigys yn Yerusalem.19:8 rag an re trigys yn Yerusalem: Ow siwya an Septuagint ha'n Vulgat. 9Ev a worhemmynnis dhedha: ‘Hwi a wra hemma yn own an Arloedh, yn lelder hag a leun golonn. 10Yn pub ken a dheu a-ragowgh dhiworth agas breder trigys yn aga sitys, yn skoellya goes, po treuspassow erell erbynn an lagha, an gorhemmynnow, an ordenansow, po an rewlys, ena hwi a's gwarn, rag na vons kablus dre begha erbynn an Arloedh, ha rag na dheffo konnar warnowgh ha war agas breder. Mar kwrewgh yndella, ny vydhowgh kablus. 11Amaria an arghoferyas, yma ev warnowgh yn oll an traow a doch an Arloedh; ha Zebadia mab Yshmael, pennsevik chi Yuda, yn oll antraow a doch an myghtern; ha'n Levysi yw agas soedhogyon. Bedhewgh krev ha hardh, ha re bo an Arloedh gans an re 'vas!’