Omsettyans dhiworth an Howldrevel

1Wosa hemma an Moabysi, an Ammonysi, ha gansa re a'n Meunysi, a dheuth erbynn Yehoshafat rag batalyas. 2Kannasow a dheuth hag y lavarsons dhe Yehoshafat, ‘Yma routh vras ow tos er dha bynn dhiworth tu arall an Mor, dhiworth Edom; ymons seulabrys yn Hasason-tamar’ (honn yw En-gedi). 3Yehoshafat a berthi own; ev a erviras hwilas an Arloedh, hag ev a ordenas penys der oll Yuda. 4Yuda a omguntellas rag hwilas gweres gans an Arloedh; dhiworth oll sitys Yuda y teuthons rag hwilas an Arloedh.

Pysadow Yehoshafat ha'y Drygh

5Yehoshafat a sevis yn kuntelles Yuda ha Yerusalem, yn chi an Arloedh, a-rag an klos nowydh, 6hag a leveris, ‘A Arloedh, Duw agan tasow, a nyns osta Duw y'n nev? A ny rewlydh war oll gwlaskordhow an kenedhlow? Yma y'th leuv galloes ha nerth, bys ma na yll nebonan sevel orthis. 7A ny fessys, agan Duw, trigoryon an tir ma a-rag dha bobel Ysrael, ha'y ri bys vykken dhe has Abraham dha goweth? 8I re drigas ynno, ha re dhrehevsons ragos sentri ynno rag dha hanow, ow leverel, 9Mar teu anfeusi warnan, an kledha, breus,20:9 breus: Po amendyans liv. kleves, po divoetter, ni a sev a-rag an chi ma, hag a-ragos, rag yma dha hanow y'n chi ma, ha ni a gri dhis yn agan ahwer, ha ty a glew, ha sawya. 10Lemmyn, awotta mebyon Ammon, Moab, ha Menydh Seir! Ny essys dhe'n Ysraelysi dos yn aga tiredh pan dheuthons yn-mes a bow Ejyp; ytho i a dreylyas dhiworta heb aga diswul. 11Mir fatell y'gan gobrons dre dhos dh'agan fesya yn-mes a'gan perghennogeth a resys dhyn dh'y erita. 12A agan Duw ni, a ny wredh breus warnedha? Rag ni yw dialloes erbynn an routh vras ma, re dheuth er agan pynn. Ny wodhon pyth dhe wul, mes yma agan dewlagas warnas.’

13Yth esa oll Yuda ow sevel a-rag an Arloedh, gans aga fleghesigow, aga gwragedh, ha'ga mebyon. 14Ena spyrys an Arloedh a dheuth war Yahaziel mab Zekaria mab Benaya mab Yeiel mab Mattania, Levyas a vebyon Asaf, yn kres an kuntelles. 15Ev a leveris, ‘Goslowewgh oll Yuda ha trigoryon Yerusalem, ha myghtern Yehoshafat: Yndellma y lever an Arloedh dhywgh: “Na vedhewgh ownek na digolonnek orth an routh vras ma; rag nyns yw an vatel dhywgh mes dhe'n Arloedh. 16A-vorow kewgh yn-nans er aga fynn; i a dheu yn-bann war leder Sis; hwi a's kyv orth penn an nans, a'n est dhe wylvos Yeruel. 17Nyns yw an vatel ragowgh hwi dhe omladh; kemmerewgh agas le, sevewgh fyrv ha gwelewgh trygh an Arloedh a'gas govis, A Yuda ha Yerusalem.” Na vedhewgh ownek na digolonnek; a-vorow kewgh dh'aga dyerbynna, ha'n Arloedh a vydh genowgh.’

18Ena Yehoshafat a blegyas ha'y fas dhe'n dor, hag oll Yuda ha trigoryon Yerusalem a goedhas dhe'n dor a-rag an Arloedh, ow kordhya an Arloedh. 19Ena re a'n Levysi dhiworth an Kohathysi ha'n Koraghysi, a sevis yn-bann rag gormel an Arloedh, ha Duw Ysrael, gans lev fest ughel.

20I a sevis ternos myttin ha mos yn-mes dhe wylvos Tekoa; hag i ow mos yn-mes, Yehoshafat a sevis ha leverel, ‘Goslowewgh orthiv, A Yuda ha trigoryon Yerusalem! Trestyewgh y'n Arloedh agas Duw ha hwi a vydh fastys; trestewgh yn y brofoesi ha hwi a sewen.’ 21Wosa omgusulya gans an bobel, ev a apoyntyas kanoryon dhe gana dhe'n Arloedh ha'y wormel rag splannder y sansoleth, hag i ow mos yn-mes a-rag an lu, ow kana,

‘Rewgh grasow dhe'n Arloedh,

rag y dregeredh a dhur bys vykken.’

22Pan dhallathsons kana ha gormel, an Arloedh a gontrewaytyas erbynn mebyon Ammon, Moab, ha menydh Seir, esens ow tos erbynn Yuda, hag i a veu fethys. 23Rag mebyon Ammon ha Moab a omsettyas erbynn trigoryon menydh Seir, dh'aga diswul yn tien; ha wosa diswul trigoryon Seir, i eth yn-rag ow tistrui an eyl y gila.

24Pan dheuth Yuda dhe'n pennoelva y'n gwylvos, i a viras war-tu ha'n routh; gyllys ens yn korfow a'ga growedh war an dor; ny dhienkas onan vytholl. 25Pan dheuth Yehoshafat ha'y bobel dhe gemmeres an preydh, i a gavas chatel pals, shour a dhaffar, dillas, ha taklow drudh, hag i a's pyllas ragdha aga honan bys pan na's tevo degi moy. Tri dydh yth esens ow pylla an preydh, drefenn y balster. 26Y'n peswora dydh yth omguntellsons yn nans Beraka, hag ena i a vennigas an Arloedh; rakhenna an tyller na re beu henwys nans Beraka bys y'n jydh ma. 27Ena oll pobel Yuda ha Yerusalem a dhehwelis dhe Yerusalem, gans Yehoshafat orth aga fenn, gans lowender, rag an Arloedh re rosa dhedha lowena dres aga eskerens. 28I a dheuth dhe Yerusalem, gans telynnow ha gans sowtris ha gans hirgern, dhe ji an Arloedh. 29Own an Arloedh a dheuth war oll gwlaskordhow an tiryow pan glewsons an Arloedh dhe omladh erbynn eskerens Ysrael. 30Gwlaskor Yehoshafat o kosel, rag y Dhuw a ros dhodho powes oll a-derdro.

Diwedh Reyn Yehoshafat

31Yndella Yehoshafat a reynyas war Yuda. Ev a veu pymthek bloedh warn ugens pan dhallathas reynya; ev a reynyas pymp blydhen warn ugens yn Yerusalem. Hanow y vamm o Azuba myrgh Shilhi. 32Ev a gerdhas yn fordh y das Asa ha ny dreylyas dhiworti, ow kul an pyth o ewn yn golok an Arloedh. 33Byttegyns nyns o defendys dhe-ves an tylleryow ughel; ny wrussa an bobel hwath settya aga holonn war Duw aga thasow.

34Gweythresow erell Yehoshafat, a'n kynsa dhe'n diwettha, yw skrifys yn istori Yehu mab Hanani, yw kovadhys yn Lyver Myghternedh Ysrael.

35Wosa hemma Yehoshafat myghtern Yuda a junyas gans an tebelwrier Ahazia myghtern Ysrael. 36Ev a junyas ganso ow trehevel gorholyon rag mos dhe Tarshish; i a dhrehevis an gorholyon yn Esyon-geber, 37Ena Eliezer mab Dodavahu a Maresha a brofoesas orth Yehoshafat, ow leverel, ‘Drefenn ty dhe junya gans Ahazia, an Arloedh a dhiswra an pyth re wrussys.’ An gorholyon a veu shyndys ha ny allsons mos dhe Tarshish.