An Pask Meur

1Hezekia a dhannvonas dhe oll Ysrael ha Yuda, hag a skrifas lytherow ynwedh dhe Efraym ha dhe Manasse, may teffons dhe ji an Arloedh yn Yerusalem rag solempnya pask an Arloedh, Duw Ysrael. 2An myghtern ha'y soedhogyon hag oll an kuntelles yn Yerusalem re omgusulsa solempnya an pask y'n nessa mis. 3Ny allsens y solempnya y'n prys ewn, rag ny wrussa myns lowr a oferysi omsakra aga honan, hag ynwedh ny omguntellsa an bobel yn Yerusalem. 4An towl a heveli da dhe'n myghtern ha dhe oll an kuntelles 5I a erviras gul gwarnyans der oll Ysrael, dhiworth Beer-sheba bys yn Dan, rag may teffa an bobel ha solempnya an pask dhe'n Arloedh, Duw Ysrael, yn Yerusalem. Ny via solempnys bythkweth gans niver mar vras, herwydh rewlys an skrif. 6Yndella poenyoryon eth der oll Ysrael ha Yuda gans lytherow dhiworth an myghtern ha'y soedhogyon war-lergh gorhemmynn an myghtern ow leverel, ‘A vebyon Ysrael, dehwelewgh dhe'n Arloedh, Duw Abraham, Ysak, hag Ysrael, rag may treyllyo arta dhe'n re ahanowgh a dhienkas dhiworth leuv myghternedh Assyria. 7Na vedhewgh avel agas tasow ha'gas breder o dislel dhe'n Arloedh, Duw agas tasow, bys ma's gwrug tra a skruth, dell welowgh. 8Na vedhewgh kales agas kilbenn lemmyn dell vedha agas tasow; ystynnewgh leuv dhe'n Arloedh ha dewgh dh'y sentri, re sakras bys vykken, ha servyewgh an Arloedh rag may treyllyo y gonnar dhiworthowgh. 9Rag mar tehwelowgh dhe'n Arloedh, agas breder ha'gas fleghes a gyv truedh gans an re a's divroas, hag i a dhehwel dhe'n tir ma. Rag an Arloedh agas Duw yw grassyes ha truedhek, ha ny dreyl y fas dhiworthowgh mar tehwelowgh dhodho.’

10Yndella an boenyoryon e a sita dhe sita yn pow Efraym ha Manasse, ha maga pell avel Zebulun; mes i a's skornyas yn unn hwerthin orta, hag a wrug ges anedha. 11Byttegyns yth esa gwer a Asher, Manasse ha Zebulun a omuvelhas hag a dheuth dhe Yerusalem. 12Yth esa leuv Duw war Yuda ynwedh rag ri dhedha unn brys dhe wul an pyth a worhemmynnis an myghtern ha'n soedhogyon dre er an Arloedh.

13Lies den a dheuth war-barth yn Yerusalem dhe solempnya goel an bara heb goell y'n nessa mis, kuntelles fest bras. 14I a dhallathas oberi hag a dhug dhe-ves an alteryow esa yn Yerusalem, hag i a dhug dhe-ves oll an alteryow rag offrynna ynkys ha'ga thewlel y'n nans Kidron. 15I a ladhas oen an pask y'n peswardhegves dhydh a'n nessa mis. An oferysi ha'n Levysi a's tevo meth hag i a omsakras aga honan, hag a dhros offrynnow leskys yn chi an Arloedh. 16I a sevis yn aga thylleryow herwydh lagha Moyses, gour Duw; an oferysi a skoellyas an goes a dhegemmersons dhiworth diwla an Levysi. 17Rag bos lies y'n kuntelles na omsakr'sons, res o dhe'n Levysi ladha eyn an pask a-barth pubonan o avlan, dh'aga sakra dhe'n Arloedh. 18Ny omlanhasa aga honan brassa rann an bobel, lies anedha dhiworth Efraym, Manasse, Yssakar, ha Zebulun, saw i a dhybris an pask yn fordh na veu herwydh rewlys an skrif. Mes Hezekia a bysis ragdha, ow leverel. ‘Gaves an Arloedh mas pubonan 19re settyas y golonn dhe hwilas an Arloedh, Duw aga thasow, kyn nag o herwydh rewlys an sentri a-dro dhe lander.’ 20An Arloedh a glewas Hezekia hag ev a yaghhas an bobel. 21An Ysraelysi esa yn Yerusalem a solempnyas goel an bara heb goell seyth dydh gans lowender meur; ha'n Levysi ha'n oferysi a wordhyas an Arloedh pub dydh, ha gansa daffar menestrouthi ughel aga son sakrys dhe'n Arloedh. 22Hezekia a gewsis ow kennertha an Levysi a dhiskwedhas konvedhes da yn servis an Arloedh. Seyth dydh i a dhybris aga rann apoyntys, ow sakrifia offrynnow kres, hag owth aswonn grasow dhe'n Arloedh, Duw aga thasow.

23Ena oll an kuntelles a assentyas war-barth dhe solempnya an goel seyth dydh pella; ytho i a'n solempnyas seyth dydh pella gans lowender. 24Hezekia myghtern Yuda a ros dhe'n kuntelles mil darow ha seyth mil dhavas rag offrynnow, ha'n soedhogyon a ros dhe'n kuntelles mil darow ha deg mil dhavas. Niver meur a'n oferysi a omsakras aga honan. 25Y lowenhas oll kuntelles Yuda, ha'n oferysi ha'n Levysi ha'n kuntelles a dheuth yn-mes a Ysrael, ha'n alyons a dheuth yn-mes a bow Ysrael, ha'n alyons trigys yn Yuda. 26Yth esa joy meur yn Yerusalem, rag a-dhia dhydhyow Solomon mab Davydh myghtern Ysrael, ny via travyth par dhe hemma yn Yerusalem. 27Ena an oferysi ha'n Levysi a sevis yn-bann ha benniga an bobel, ha'ga lev o klewys; ha'ga fysadow a dheuth dh'y drigva sans yn nev.