Omsettyans Sennagherib

1War-lergh an traow ma ha'n gweythresow a lelduri, Sennagherib myghtern Assyria a dheuth hag omsettya orth Yuda, hag ev a gampyas erbynn an sitys kerys, ow tybi y's synsi ragdho y honan.

2Pan welas Hezekia Sennagherib dhe dhos, hag ev dhe ervira dhe omladh erbynn Yerusalem, 3ev a dewlis towl gans y soedhogyon ha'y gasoryon stoppya an fentynyow esa a-ves dhe'n sita; hag i a'n gweresas. 4I a guntellas lies tus, hag i a stoppyas oll an fentynyow, keffrys ha'n gover a resa der an tir, ow leverel, ‘Prag y to myghternedh Assyria ha kavoes dowr yn palster?’ 5Hezekia a gemmeras kolonn, hag a dhastrehevis oll rannow an fos o koedhys yn-nans, hag a dhrehevis touryow warnedhi, ha tu a-ves dhedhi ev a dhrehevis fos arall; ha dres henna ev a grevhas Millo yn sita Davydh, hag ev a wrug arvow ha skoesow, pals anedha. 6Ev a apoyntyas kaslewydhyon war an bobel, hag a's kuntellas war-barth dhodho y'n plen orth yet an sita, hag a gewsis dhedha yn unn golonnekhe, ow leverel, 7‘Bedhewgh krev hag a golonn dha. Na berthewgh own na bos penndegys a-rag myghtern Assyria hag oll an routh usi ganso; rag yma onan kreffa genen ni es dell eus ganso ev. 8Yma ganso bregh a gig; mes yma genen ni an Arloedh agan Duw rag agan gweres ha dhe vatalyas agan batelyow.’ An bobel o kolonnekhes gans geryow Hezekia myghtern Yuda.

9Wosa hemma, pan esa Sennagherib myghtern Assyria owth omsettya a-dro dhe Lakish gans oll y nerth breselek, ev a dhannvonas y wesyon dhe Yerusalem, dhe Hezekia myghtern Yuda, ha dhe oll tus Yuda esa yn Yerusalem, ow leverel, 10‘Yndella y lever Sennagherib myghtern Assyria: Pyth yw an dra mayth esowgh ow trestya warnodho, y hyllowgh perthi esedhva a-dro dhe Yerusalem? 11A ny'gas toell Hezekia, orth agas ri dhe verwel gans divoetter ha syghes, pan lever ev, “An Arloedh agan Duw a'gan saw a leuv myghtern Assyria?” 12A ny gemmeras Hezekia y honan dhe-ves y dylleryow ughel ha'y alteryow, hag a worhemmynnis dhe Yuda ha Yerusalem, ow leverel, “A-rag unn alter hwi a wra gordhya, ha warnedhi hwi a lesk offrynnow”? 13A ny wodhowgh an pyth a wrug vy ha'm tasow dhe oll pobel an tiryow erell? A ylli duwow an kenedhlow na sawya aga thiryow yn-mes a'm leuv? 14Piw yn mysk oll duwow an kenedhlow a wrug ow thasow aga kowldhiswul, a ylli sawya y bobel a'm leuv? Pyseul dhe le y hyll agas Duw agas sawya a'm leuv? 15Lemmyn ytho na esewgh Hezekia dh'agas toella na'gas kammledya yndella. Na drestyewgh ynno, rag ny allas duw vytholl a genedhel bynag na ruvaneth bynag sawya y bobel a'm leuv na a leuv ow thasow. Pyseul dhe le y hwra agas Duw a'gas sawya hwi yn-mes a'm leuv!’

16Y wesyon a leveris moy erbynn an Arloedh Duw hag erbynn y was Hezekia. 17Ev a skrifas lytherow ynwedh ow tespitya an Arloedh, Duw Ysrael, ow leverel, ‘Par dell na allas duwow kenedhlow erell delivra aga fobel a'm diwleuv, yndella ny dhelirv Duw Hezekia y bobel a'm leuv.’ 18I a'n garmas yn lev ughel yn yeth Yuda dhe bobel Yerusalem esa war an fos, rag aga ownhe ha'ga euthega, rag may hallens kemmeres an sita. 19I a gewsis a-dro dhe Dhuw Yerusalem par dell ve ev par dhe dhuwow pobel an norvys, ober diwleuv dhenel.

Fethans Sennagherib ha'y Vernans

20Ena myghtern Hezekia ha'n profoes Ysay mab Amos, a bysis a-dro dhe hemma, hag i a grias dhe nev. 21Ha'n Arloedh a dhannvonas el neb a ladhas oll an gasoryon alloesek ha'n gaslewydhyon ha'n soedhogyon yn kamp myghtern Assyria. Ytho ev a gildennas yn disenor dh'y dir y honan. Pan dheuth yn chi y dhuw, re a'y vebyon a'n weskis dhe'n dor gans an kledha.

22Yndella an Arloedh a sawyas Hezekia ha trigoryon Yerusalem a leuv Sennagherib myghtern Assyria hag a leuv oll y eskerens; ev a ros dhedha powes32:22 ev a ros dhedha powes: Ow siwya an Septuagint ha'n Vulgat. Ebrow ev a's ledyas. a bub tu 23Lies a dhros offrynnow dhe'n Arloedh yn Yerusalem ha rohow fethus dhe Hezekia myghtern Yuda. Wosa henna y feu ughelhes yn golok oll an kenedhlow.

Kleves Hezekia

24Y'n dydhyow na gyllys klav o Hezekia hag ev a veu yn eneworres. Ev a bysis dhe'n Arloedh, hag ev a worthybis dhodho hag a ros dhodho tokyn. 25Mes ny worthybis Hezekia yn grasyans a'n dader gwrys dhodho, rag bos y golonn goethus. Ytho konnar a dheuth warnodho ha war Yuda ha war Yerusalem. 26Ena Hezekia a omuvelhas rag goeth y golonn, ev y honan ha trigoryon Yerusalem, bys ma na dheuth konnar an Arloedh warnedha yn dydhyow Hezekia.

Sewena Hezekia ha'y Weythresow

27Hezekia a'n jevo rychys meur hag enor, hag ev a wre ragdho y honan tresorvaow rag arghans, rag owr, rag meyn drudh, rag spisyow, rag skoesow, ha rag traow kostek a lies eghenn; 28gwithvaow rag oll an drevas a ys, gwin, hag oyl; ha stallow rag chatel a lies eghenn, ha korlannow deves. 29Ev a brovia ynwedh sitys ragdho y honan, ha flokkys ha greow pals, rag Duw re ros dhodho pythow meur. 30An keth Hezekia ma a dhegeas an ughella fenten a dhowrow Gihon ha'ga threylya yn-nans dhe du an howlsedhes dhe sita Davydh. Hezekia a sewenis yn oll y weythresow. 31Yndella yn kas kannasow ledyoryon Babylon ynwedh, an re a veu dannvenys dhodho rag govynn orto a-dro dhe'n marathus re bia gwrys y'n tir, Duw a'n gasas y honan oll rag y brevi ha rag godhvos oll esa yn y golonn.

32Gweythresow erell Hezekia, ha'y oberow a dregeredh, yw skrifys yn gwelesigeth an profoes Ysay mab Amos yn Lyver Myghternedh Yuda hag Ysrael. 33Hezekia a goskas gans y dasow, hag i a'n ynkleudhyas war an fordh yn-bann dhe vedhow mebyon Davydh, hag oll Yuda ha trigoryon Yerusalem a ros dhodho enor yn y vernans. Y vab Manasse a reynyas yn y le.