Reyn Manasse

1Manasse o dewdhek bloedh pan dhallathas reynya, hag ev a reynyas pymthek blydhen ha dew-ugens yn Yerusalem. 2Ev a wrug an pyth o drog yn golok an Arloedh, war-lergh oberow kasadow an kenedhlow a wrussa an Arloedh aga fesya a-rag pobel Ysrael. 3Rag ev a dhastrehevis an tylleryow ughel re beu tennys yn-nans gans y das Hezekia, hag ev a dhrehevis alteryow dhe'n Baalim, hag a wrug Asherim. Ev a wordhyas oll lu an nev, ha'ga servya. 4Ev a dhrehevis alteryow yn chi an Arloedh, may lavarsa an Arloedh anodho, ‘Yn Yerusalem ow hanow a vydh bys vykken.’ 5Ev a dhrehevis alteryow rag oll lu an nev yn dew glos chi an Arloedh. 6Ev a wre dh'y vebyon tremena dre dan yn nans mab Hinnom, hag a wre dewinieth ha pystri ha hus, hag a hwila kusul dhiworth nygromons. Ev a wrug droktraow pals yn golok an Arloedh, orth y brovokya dhe sorr. 7Ev a worras an imaj gravys re wrussa yn chi Duw, anodho may leveris Duw dhe Davydh ha dh'y vab Solomon, ‘Y'n chi ma, hag yn Yerusalem re dhewisis yn-mes a oll kordhow Ysrael, y hworrav ow hanow bys vykken. 8Nevra ny gemmerav troes Ysrael dhiworth an tir re apoyntis rag agas tasow, mar kwaytyons gul pup-tra a worhemmynnis dhedha, oll an lagha, an ordenansow, ha'n breusow res dre leuv Moyses.’ 9Manasse a ledyas Yuda ha trigoryon Yerusalem yn stray, bys may hwrussons moy drog ages an kenedhlow a dhiswrussa an Arloedh a-rag pobel Ysrael.

Manasse Daskorrys wosa Edrega

10An Arloedh a gewsis dhe Manasse ha dh'y bobel, mes ny woslowsons. 11Yndella an Arloedh a dhros er aga fynn kaslewydhyon lu myghtern Assyria, hag i a synsis Manasse avel prisner, ha gorra higenn yn y droen ha'y gelmi gans sprallow a vrons ha'y dhri dhe Babylon. 12Pan o yn ahwer ev a bysis favour an Arloedh y Dhuw hag yth omuvelhas yn fen a-rag Duw y dasow. 13Ev a bysis dhodho, ha Duw a gemmeras y bysadow hag a glewas y bledyans, hag a'n dros arta dhe Yerusalem ha'y dhaskorra dh'y ruvaneth. Ena Manasse a wodhya bos an Arloedh an gwir Dhuw.

14Wosa henna ev a dhrehevis fos tu a-ves rag sita Davydh, a'n howlsedhes dhe nans Gihon, owth hedhes dhe'n entrans Yet an Puskes; ev a's gorras a-dro dhe Ofel, hag a's drehevis dhe ughelder bras. Ev a worras ynwedh kaslewydhyon an lu yn oll an sitys kerys yn Yuda. 15Ev a dhug dhe-ves an duwow estren ha'n imaj gravys dhiworth chi an Arloedh, hag oll an alteryow re dhrehevis war venydh chi an Arloedh hag yn Yerusalem, hag ev a's tewlis dhe-ves an sita. 16Ev a ewnhas alter an Arloedh hag a offrynnas warnedhi sakrifisow kres ha grasow; hag ev a worhemmynnis dhe Yuda servya an Arloedh, Duw Ysrael. 17Byttegyns an bobel a besyas ow sakrifisow y'n tylleryow ughel, mes i a's gwrug unnsel dhe'n Arloedh aga Duw.

Mernans Manasse

18Gweythresow erell Manasse, y bysadow dh'y Dhuw ha geryow an welesydhyon kewsys dhodho yn hanow an Arloedh Duw a Ysrael, yma an re ma yn kovadhow myghternedh Ysrael 19Y bysadow ha fatell dhegemmeras Duw y bledyans, oll y begh ha'y dhislelder, an tylleryow warnedha may trehevis tylleryow ughel ha drehevel an Asherim ha'n imajys gravys a-ragdha mayth omuvelhi, an re ma yw skrifys yn kovadhow an welesydhyon. 20Ytho Manasse a goskas gans y dasow, hag i a'n ynkleudhyas yn y ji; ha'y vab Amon a reynyas yn y le.

Reyn Amon ha'y Vernans

21Amon o dew bloedh warn ugens pan dhallathas reynya, hag ev a reynyas diw vlydhen yn Yerusalem. 22Ev a wrug an pyth o drog yn golok an Arloedh, par dell wrug y das, Manasse. Amon a sakrifia dhe oll an imajys gravys a wrussa Manasse, ha'ga servya. 23Ny omuvelhas a-rag an Arloedh, dell omuvelhasa y das Manasse, mes an keth Amon ma a drespassas moy ha moy. 24Y wesyon a vrasas er y bynn ha'y ladha yn y ji. 25Mes pobel an tir a ladhas oll an re re vrassa erbynn myghtern Amon; ha pobel an tir a wrug y vab Yosia myghtern yn y le.