1Pan veu gorfennys oll an ober a wrug Solomon rag chi an Arloedh, Solomon a dhug a-ji oll an taklow sakrys gans y das Davydh, hag ev a worras an arghans, an owr, hag oll an lestri yn tresorvaow chi Duw.

Devedhyans an Argh a-ji dhe'n Tempel

2Ena Solomon a guntellas henavogyon Ysrael, hag oll pennow an loethow, pennow teyluyow a vebyon Ysrael, yn Yerusalem, rag doen yn-bann argh kevambos an Arloedh, yn-mes a sita Davydh, yw Sion. 3Oll gwer Ysrael a omguntellas a-rag an myghtern, yn goel an seythves mis. 4Oll an henavogyon a dheuth, ha'n Levysi a dhrehevis an argh. 5I a dhug an argh yn-bann; ha'n oferysi ha'n Levysi a dhug yn-bann tylda an kuntelles hag oll daffar san s an tylda. 6Yth esa myghtern Solomon hag oll kuntelles Ysrael kuntellys ganso a-rag an argh, ow sakrifia deves hag oghen na yllys aga homptya na'ga nivera. 7Ena an oferysi a dhug argh an kevambos dh'y thyller yn sentri pervedhel an chi, y'n tyller an moyha sans, yn-dann dhiwaskell an cherubim. 8An cherubim a ystynnas aga diwaskell war dyller an argh, ha goskeusi dres an argh ha'y gwelennow. 9Mar hir o an gwelennow bys mayth o gwelys aga fennow dhiworth an tyller sans a-rag an sentri pervedhel, mes ny yllys aga gweles a'n tylleryow a-ves; ymons i ena bys y'n jydh ma. 10Nyns esa travyth y'n argh marnas an dhiw leghenn a worras Moyses ena yn Horeb, le ma kevambosas an Arloedh gans pobel Ysrael wosa i dhe dhos yn-mes a Ejyp.

11An oferysi a omdennas dhiworth an tyller sans. Oll an oferysi esa ena a wrussa omsakra aga honan, heb prederi a-dro dh'aga rannow, 12hag oll kanoryon an Levysi, Asaf, Heman, ha Yeduthun, aga mebyon ha'ga breder, gwiskys yn lien fin, gans symbalys, telynnow, ha sowtris, a sevis a'n howldrehevel dhe'n alter, keveylys gans kans oferyas warn ugens ow hwytha hirgern. 13An hirgernysi ha'n ganoryon a junyas war-barth yn unnson yn gormola hag yn grasow dhe'n Arloedh. Keveylys gans hirgern ha gans symbalys, ha daffar menestrouthi arall, i a ganas gormola dhe'n Arloedh,

‘Rag ev yw da,

ha'y dregeredh a dhur bys vykken’;

ha'n chi, chi an Arloedh, o lenwys a gommolenn, 14ha ny allas an oferysi sevel dhe venystra drefenn an gommolenn; rag glori an Arloedh a lenwis chi Duw.