Re a Weythresow Solomon

1Dhe benn ugens blydhen, dredha may trehavsa chi an Arloedh ha'y ji y honan, 2Solomon a dhastrehevis an sitys res dhodho gans Hiram, hag a worras Ysraelysi ynna.

3Solomon eth dhe Hamath Soba, hag a's synsis. 4Ev a dhrehevis Tadmor y'n gwylvos hag oll an sitys-gwithva a dhrehevsa yn Hamath. 5Ev a dhrehevis ynwedh Beth-horon wartha ha Beth-horon is avel sitys kerys, gans fosow ha yetys gans barrys, 6ha Baalath, keffrys hag oll an sitys-gwithva, hag oll an sitys rag y charettow, ha'n sitys rag y vergh. Ev a dhrehevis pypynag a vynnas yn Yerusalem, yn Lebanon hag yn oll tiredh y vestrynses. 7Oll an dus o gesys a'n Hittysi, a'n Amorysi, a'n Perizzysi, a'n Hivysi, hag a'n Yebusysi, nag esens a Ysrael, 8a'ga diyskynnysi o hwath gesys y'n tir, an re na wrussa an Ysraelysi aga distrui, – an re ma Solomon a worras dhe lavur konstrynys, par dell yw an kas bys y'n jydh hedhyw. 9Ny worras Solomon Ysraelysi dhe lavur konstrynys; kasoryon ens, ha'y soedhogyon, ha kaslewydhyon y jarettow, ha'y varghoglu. 10An re ma o penn-soedhogyon myghtern Solomon, dew kans ha hanter-kans anedha hag i a's tevo maystri war an bobel.

11Solomon a dhros myrgh Faro a sita Davydh dhe'n chi re dhrehevsa rygdhi, rag yn-medh ev, ‘Ny drig gwreg vyth ahanav yn chi Davydh myghtern Ysrael, rag an tylleryow dhedha may teuva argh an Arloedh yw sans.’

12Ena Solomon a offrynnas offrynnow leskys dhe'n Arloedh war alter an Arloedh, re dhrehevsa a-rag an portal, 13dell o dever pub dydh herwydh gorhemmynn Moyses rag an sabotys, an loeryow nowydh, ha'n tri goel blydhenyek – goel an bara heb goell, goel an seythunyow, ha goel an skovvaow. 14Herwydh gorhemmynn Davydh y das, ev a ordenas rannow an oferysi rag aga servis, ha'n Levysi rag aga soedhow a wormola hag a venystra ryb an oferysi avel dever pub-dydhyek dell ve res, ha gwithysi an yetys yn aga rannow rag pub yet; rag yndella y hworhemmynnsa Davydh, gour Duw. 15Ny dreylsons dhe-ves a wul pup-tra re worhemmynnsa an myghtern dhe'n oferysi ha'n Levysi a-dro dhe'n tresorvaow.

16Yndella oll ober Solomon a veu kowlwrys a-dhia dhydh fondyans chi an Arloedh bys may feu gorfennys.

17Ena Solomon eth dhe Esyon-geber hag Eloth war an morrep, yn pow Edom. 18Hiram a dhannvonas dhodho dre leuv y wesyon y honan, gorholyon ha marners gans prevyans a'n mor. I eth the Ofir war-barth gans gwesyon Solomon, hag a ynporthas alena peswar kans ha hanter kans talent a owr ha'ga dros dhe vyghtern Solomon.