Devedhyans Myghternes Sheba

1Pan glewas myghternes Sheba a vri Solomon, hi a dheuth dhe Yerusalem rag ma'n proffa gans govynnow kales, ha gensi koskordh pur vras, kowrvergh ow toen spisyow, ha kals a owr ha meyn drudh. Pan dheuth dhe Solomon, hi a gewsis ganso a bup-tra esa yn hy brys. 2Solomon a worthybis dhe oll hy govynnow; nyns esa nagonan anedha re gales rag Solomon dh'y styrya dhedhi. 3Pan welsa myghternes Sheba furneth Solomon, ha'n chi re dhrehevsa, 4an boes war y voes, rester esedhyans y soedhogyon, an servysi ha'ga gwisk, y hanaforyon ha'ga gwisk, ha'y offrynnow leskys a offrynna yn chi an Arloedh, nyns esa spyrys ynni namoy.

5Yn-medh hi dhe'n myghtern, ‘Gwir o an derivas a glewis y'm tir ow honan, a'th weythresow, hag a'th furneth, 6mes ny grysis aga geryow kyns my dhe dhos ha gweles gans ow dewlagas ow honan. Ny veu leveris dhymmo bys yn hanter a veurder dha furneth; fest gwell yth os ages an derivas a glewis. 7Gwynnvys dha wer! Gwynnvys an re ma dha wesyon a sev a-ragos heb hedhi, ha klewes dha furneth! 8Benniges re bo an Arloedh dha Dhuw a'n jevo plesour ynnos hag a'th worras war y dron avel myghtern an Arloedh dha Dhuw. Drefenn an kerensa a'n jeves dha Dhuw rag Ysrael, orth y fastya bys vykken, ev re'th worras warnedha avel myghtern, dhe wul gwirvreus ha gwiryonedh.’ 9Ena hi a ros dhe'n myghtern hwegh-ugens talent a owr, shour a spisys ha meyn drudh: ny via bythkweth spisys parow dhe'n re a ros myghternes Sheba dhe vyghtern Solomon. 10Hag ynwedh Hiram ha gwesyon Solomon a dhrosa owr dhiworth Ofir, hag a dhros prenn algum ha meyn drudh. 11An myghtern a wrug devnydh a'n prenn algum dhe wul grisyow rag chi an Arloedh ha rag chi an myghtern, hag ynwedh sowtris ha telynnow rag an ganoryon. Ny via gwelys aga farow bythkweth yn pow Yuda.

12Myghtern Solomon a ros dhe vyghternes Sheba pup-tra a's tevo hwans anodho ha'y wovynn; ev a ros dhedhi yn hel yn attal9:12 ev a ros dhedhi yn hel yn attal: Ow siwya an Targum. an pyth a dhrosa hi dhe'n myghtern. Ena hi a dhehwelis arta dh'y thir hy honan gans hy gwesyon.

Rychys Meur Solomon

13Poester an owr a dheuth dhe Solomon a-ji dhe unn vlydhen o hwegh kans talent a owr ha hwegh ha tri ugens, 14dres an pyth o dres gans an wikoryon ha gans an varchons; hag oll myghternedh Arabia ha governours an tir a dhros owr hag arghans dhe Solomon. 15Myghtern Solomon a wrug dew kans skoes bras a owr mortholys; hwegh kans shekel a owr mortholys eth yn pub skoes. 16Ev a wrug ynwedh tri hans bokler a owr mortholys; tri hans shekel a owr eth yn pub bokler. An myghtern a's gorras yn Chi Koes Lebanon. 17An myghtern a wrug ynwedh tron bras a dhans-olifans hag a'n gorowras gans owr pur. 18Yth esa dhe'n tron hwegh gris ha skavell-droes, hag i a veu stegys orth an tron. A bub tu dhe'n esedhva yth esa breghva, ha dew lew a'ga sav ryb an breghvaow, 19ha dewdhek lew a'ga sav onan dhe benn bub gris war an hwegh gris. Ny via gwrys y bar bythkweth yn gwlaskor vytholl. 20Pub lester-eva a vyghtern Solomon o a owr hag oll lestri Chi Koes Lebanon o a owr pur; ny veu arghans reknys dhe vos talvosek yn dydhyow Solomon. 21Gorholyon an myghtern e dhe Tarshish gans gwesyon Hiram; unnweyth pub teyr blydhen gorholyon Tarshish a dho ow toen owr, arghans, dans-olifans, apys, ha payones.

22Yndella myghtern Solomon a dremenas dres oll myghternedh an norvys yn rychys hag yn furneth. 23Oll myghternedh an norvys a hwila bos gans Solomon rag klewes y furneth, a worrsa Duw yn y vrys. 24Pubonan a dhros ro, lestri a arghans hag owr, mantelli, melysethow, spisys, mergh, ha mulyon, blydhen wosa blydhen. 25Solomon a'n jevo peswar mil stall rag mergh ha charettow, ha dewdhek mil vargh; ev a's gwithas yn sitys charettow ha gans an myghtern y honan yn Yerusalem. 26Ev a reynyas war oll an vyghternedh dhiworth an avon Ewfrates bys pow an Filistysi, ha bys or Ejyp. 27An myghtern a wre arghans maga kemmyn yn Yerusalem avel men, ha keder maga kemmyn avel sykamin an Shefela. 28Mergh o ynperthis rag Solomon dhiworth Ejyp, ha dhiworth oll tiryow.

Mernans Solomon

29Gweythresow erell Solomon a'n kynsa dhe'n diwettha anedha, a nyns yns i skrifys yn istori Nathan an profoes, hag yn profoesans Ahiya an Shilonyas hag yn gwelesigethow an gwelesydh Iddo a-dro dhe Yeroboam mab Nebat? 30Solomon a reynyas yn Yerusalem war oll Ysrael dew-ugens blydhen. 31Solomon a goskas gans y dasow hag i a'n ynkleudhyas yn sita y das Davydh, ha'y vab Rehoboam a reynyas yn y le.