Salusyans ha Grasyans

1Powl, abostol Krist Yesu dre vodh Duw, ha Timothi agan broder,

Dhe eglos Duw usi yn Korinth, gans oll an syns dres Aghaia oll:

2Gras dhywgh ha kres dhiworth Duw agan Tas ha'n Arloedh Yesu Krist.

Grasyans Powl wosa Galar

3Benniges re bo Duw ha Tas agan Arloedh Yesu Krist, Tas a druedhow ha Duw a gonfort oll, 4neb a'gan konfort yn oll agan poenvos, may hyllyn ni konfortya an re usi yn pub poenvos, der an konfort mayth on ni agan honan konfortys gans Duw. 5Rag kepar dell balsha godhevyans Krist genen ni, yndella dre Grist agan konfort ynwedh a balsha. 6Lemmyn mar perthyn ni galarow, a-barth agas konfort ha'gas selwyans yth yw; po mars on ni konfortys, a-barth agas konfort yth yw, hag a ober pan berthewgh hwi an keth galarow hag a wodhevyn ni ynwedh. 7Ha fyrv yw agan govenek ragowgh, a-ban wodhon ni hemma: par dell owgh hwi kevrennoryon a'n galarow, yndella ynwedh hwi a gevrenn a'n konfort.

8Rag ny vynnyn hwi dhe vos heb godhvos, breder, a-dro dh'agan galar pan esen ni yn Asia; beghys dres eghenn en ni, dres nerth, mayth esa dhyn desper a vewnans y honan; 9yn hwir, ni a omglewsyn warnan breus an mernans, ma na fytthyen ynnon agan honan, mes yn Duw neb a dhrehav an re varow. 10Ev re'gan delivras dhiworth mernans mar vras, hag ev a wra agan delivra; warnodho ni re worras agan govenek ev dh'agan delivra arta, 11ha hwi ynwedh orth agan gweres dre bysadow ragon, may hwodhvo lies den gras a-barth dhyn a'n ro grassyes res dhyn dre bysadow lies den.

Devedhyans Powl yw Delatys

12Lemmyn, hemm yw agan bost, dustuni agan kowses, ni dhe omdhegi y'n bys yn sempledh1:12 sempledh: War-lergh re a'n dornskrifow sansoleth. ha gwiryonsys Duw, heb skentoleth an kig mes dre ras Duw, ha dres oll orthowgh hwi. 13Rag ny skrifyn dhywgh travyth a-der an pyth a redyowgh ha konvedhes ynwedh, ha govenek a'm beus hwi dhe gonvedhes yn tien, 14dell y'gan konvedhsowgh yn rann seulabrys, rag yn dydh agan Arloedh Yesu, agas bost hwi on ni, kepar dell owgh hwi agan bost ni.

15A-ban en vy sur a hemma, ervirys en dhe vos dhywgh wostalleth, ma'gas be favour diwweyth; 16my a vynnas dos dhywgh, ena tremena dhe Makedonia, ha dhiworth Makedonia dehweles dhywgh ha bos dannvenys yn-rag genowgh dhe Yudi. 17Rakhenna, pan vynnis gul hemma, en vy hedro? Pan ervirav traow, a oberav vy war-lergh an kig, may leverriv yn kettermyn ‘Ya, ya’ ha ‘Na, na’? 18Mes, dell yw Duw lel, nyns yw agan ger dhywgh ‘Ya ha Na.’ 19Rag Mab Duw, Krist Yesu, neb a veu pregewthys genen yn aga mysk, genev vy, ha gans Silvanus ha Timothi, nyns o ev ‘Ya ha Na’, mes ynno ev pup-prys yth yw ‘Ya.’ 20Rag ynno ev pub ambos Duw yw ‘Ya’; rakhenna, dredho ev yth yw ni dhe leverel ‘Amen’ dhe wolewder Duw. 21Mes Duw yth yw neb a'gan gwra fyrv genowgh yn Krist, ha neb re'gan untyas, 22neb re'gan selyas ha ri dhyn mewgh an Spyrys yn agan kolonnow.

23Lemmyn my a elow war Duw yn test war ow enev: rag agas sparya yth o na dhehwelis dhe Korinth, 24Nyns yw ni dhe routya agas fydh, mes kesoberoryon on ni genowgh rag agas joy: rag y'n fydh y sevowgh fyrv.