Powl a Worthyp dhe Grodhvolyow

1My ow honan, Powl, a'gas pys dre glorder ha jentilys Krist, my neb yw uvel pan esov fas orth fas yn agas mysk mes hardh dhywgh pan esov dhe-ves ahanowgh: 2lemmyn my a'gas pys, ha my yn agas mysk, na vo edhomm dhymm bos hardh, gans an fydhyans dredho may prederav bedha bos hardh erbynn an re a breder ni dhe gerdhes war-lergh an kig. 3Rag ni a gerdh y'n kig mes ny werryn war-lergh an kig, 4rag arvow agan gwerryans nyns yns a'n kig mes yma dhedha nerth Duw dhe dhomhwel kastylli, ow tomhwel dadhlow 5ha pub tra woethus hag a sett orth godhvos Duw, hag ow talghenna yn keth pub tybyans rag gul dhodho bos gostydh dhe Grist, 6ha parys on ni dhe gessydhya pub diwostytter pan vo kowlwrys agas gostytter.

7Hwi a vir orth traow herwydh aga semlans. Mar trest nebonan y vos dhe Grist, perthes kov a hemma: kepar dell yw ev dhe Grist, yndella ynwedh yth on ni. 8Rag kyn fostiv nebes re a-dro dh'agan awtorita hag a ros an Arloedh dhyn rag agas drehevyans, a-der agas terri dhe'n leur, ny'm bydh meth anodho. 9Ny vynnav heveli bos ow hwilas agas ownekhe der ow lytherow. 10Y leverir gans nebonan, ‘Yn tevri, poesek ha krev yw y lytherow, mes yn agan mysk gwann yw y gorf, ha'y gows y hyllir y dhispresya.’ 11Konvedhes hemma onan a'n par na: an pyth on ni yn ger der agan lytherow, ha ni dhe-ves ahanowgh, yndella ynwedh y fydhyn yn agan ober ha ni yn agas mysk.

12Rag ny vedhyn klassa po keheveli agan honan dhe rann a'n re neb a omgommend aga honan, mes pan vusurons aga honan an eyl orth y gila, ha keheveli aga honan an eyl dh'y gila, ny gonvedhons. 13Byttegyns ny wren ni bostya dres musur, mes herwydh musur an rewl re rannas Duw dhyn, dhe dhrehedhes ynwedh bys dhywgh hwi. 14Rag nyns esen ni dres agan oryon ow trehedhes dhywgh, rag ynwedh bys dhywgh hwi ni a dheuth yn aweyl Krist, 15heb bostya dres musur yn lavur re erell, mes govenek a'gan beus, dell wra agas fydh tevi, agan gwrians dhe gressya yn feur, herwydh an rewl res dhyn, 16may pregewtthyn an aweyl y'n powyow yn-hons dhywgh, heb bostya a-dro dhe ober gwrys seulabrys yn ranndir nebonan arall, 17mes ‘Neb a vostyo, bostyes y'n Arloedh’; 18rag nyns yw ev neb a omgommend y honan neb yw degemmerys, mes ev neb yw kommendys gans an Arloedh.