Powl ha'n Fals Abesteli

1Unnweyth a'm godhaffewgh nebes y'm follneth! mes yn tevri yth esowgh orth ow kodhevel. 2Avi a'm beus ragowgh, gans avi Duw, drefenn my dh'agas dedhewi dhe unn gour, rag agas profya avel gwyrghes pur dhe Grist, 3Mes yma own dhymm, par dell doellas an sarf Eva der y felder, yma own dhymm bos agas brysyow dynys yn neb fordh dhiworth an sempledh ha'n lenduri usi yn Krist. 4Rag yn tevri mar teu nebonan dhe bregoth Yesu arall neb na bregewthsyn ni, po mar tegemmerowgh ken spyrys ages an spyrys a dhegemmersowgh, po ken aweyl ages an aweyl a ressevsowgh, fest yn ta y'n godhevowgh. 5Byttegyns, my a dyb nag ov kammenn vyth gweth ages an abesteli worughel ma. 6Mes mars ov vy yn hwir heb sleyghneth owth arethya, nyns ov vy yndella yn godhvos, hag yn pub fordh ni re wrug henna fest apert dhywgh.

7A beghis vy owth omuvelhe may fewgh hwi ughelhes drefenn my dhe bregoth aweyl Duw heb kost dhywgh? 8Eglosyow erell a ledris vy ow kemmeres gobrow rag menystra dhywgh, 9ha pan esen vy yn agas mysk, ha my edhommek, nyns en vy begh dhe dhenvyth; rag an vreder a dheuth dhiworth Makedonia a brovias an taklow a fylli dhymm, hag yn pub fordh my a omwitha ma na ven vy begh dhywgh, hag yndella my a wra pesya. 10Ynnov vy yma gwiryonedh Krist, ma na vydh lettys ow bostyans yn powyow Aghaia. 11Praga? Drefenn na'gas karav? Gwrav, dell woer Duw.

12Ha'n pyth a wrav, henna my a wra pesya y wul, may tregghiv an grond a-dhann an re a hwila chons dhe vos aswonnys agan parow y'n taklow a vostyons anedha. 13Tus a'n par na yw fals abesteli, gonisogyon ow toella, neb a dreusfurv aga honan dhe abesteli Krist. 14Nyns yw marth: rag Satnas y honan a dreusfurv y honan dhe el a wolow. 15Nyns yw ankoth, ytho, mar kwra y venysters treusfurvya aga honan dhe venysters a ewnder: may fydh aga diwedh herwydh aga oberow.

Godhevyans Powl avel Abostol

16My a lever arta, na dybes denvyth ow bos foll; mes mar kwrewgh hwi, degemmerewgh vy poran kepar ha foll, may hwrylliv nebes bostya. 17An pyth a gowsav, ny gowsav herwydh an Arloedh, mes yn fydhyans a vostya, kepar hag yn follneth. 18A-ban vost lies war-lergh an kig, my ynwedh a wra bostya. 19Rag yn lowen, ow pos fur, hwi a wodhav fellyon; 20rag y'n godhevowgh, nebonan mara'gas gwra kethyon, nebonan mara'gas preydh, nebonan mar kwra maystri warnowgh dh'y les y honan, nebonan mar omdhrehav, nebonan mara'gas gwysk y'n fas. 21Dhe'm meth, my a lever agan bos re wann.

Mes yn pypynag nebonan a vettho (yn follneth y kowsav), my a vedh ynwedh. 22Ebrowyon yns i? My ynwedh. Ysraelysi yns i? My ynwedh. Has Abraham yns i? My ynwedh. 23Menystoryon Krist yns i? (My a gews kepar hag onan mes a'y rewl) onan gwell ov vy: my re lavuryas kalessa meur, my re beu prisonys moy menowgh, my re beu kastigys moy a-has,11:23 my re beu prisonys moy menowgh, my re beu kastigys moy a-has: War-lergh re a'n dornskrifow my re beu kastigys moy a-has, my re beu prisonys moy menowgh. my re beu ogas dhe'n mernans lieskweyth. 24Pymp gweyth my a gavas dhiworth an Yedhewon an dew-ugens lash marnas onan. 25Teyrgweyth kronkys veuv gans gwelynni, unnweyth labydhys veuv, teyrgweyth my a borthas gwrekk gorhel. My re beu y'n mor unn nos hag unn jydh; 26ow vyajya lieskweyth, yn peryll a avonyow, yn peryll a ladron, yn peryll a'm tus ow honan, yn peryll a Jentilys, yn peryll yn sita, yn peryll yn difeyth, yn peryll y'n mor, yn peryll a fals vreder, 27yn lavur ha gweyth kales, yn meur a nosow heb kosk, yn nown ha syghes, yn divoetteryow menowgh, yn yeynder ha noethedh. 28Heb kewsel a daklow erell, an bern a'n eglosyow oll a boes warnav pub dydh. 29Piw yw gwann, ha nyns ov evy gwann? Piw yw gwrys dhe drebuchya, ha ny dhewav vy?

30Mar telledh my dhe vostya, my a vost a'n traow a dhiskwa ow gwannder. 31Duw ha Tas an Arloedh Yesu, re bo ev benniges trank heb worfenn, a woer nag esov vy ow leverel gowyow. 32Yn Damaskus an ethnargh yn-dann vyghtern Aretas a worras gwithysi yn sita tus Damaskus rag ow dalghenna, 33ha dyllys dhe'n leur veuv yn kanstell dre fenester y'n fos ha diank dhiworth y dhiwla.