Gwelesigethow ha Diskwedhyansow

1Y telledh my dhe vostya; nyns yw dhe les, byttegyns my a wra dos dhe welesigethow ha diskwedhyansow a'n Arloedh. 2My a aswonn den yn Krist neb, nans yw peswardhek blydhen, a veu kemmerys yn-bann dhe'n tressa nev – mars esa y'n korf ny wonn, po mes a'n korf ny wonn, Duw a woer, – 3ha my a woer an den ma – mars esa y'n korf po a-ves dhe'n korf ny wonn, Duw a woer, – 4dhe vos kemmerys yn-bann yn paradhis, ha klewes lavarow12:4 lavarow: Po traow. na yll denvyth aga leverel. 5A-barth den a'n par na my a wra bostya, mes a-barth dhymm ow honan ny wrav bostya, marnas y'm gwannderyow. 6Mes mar mynnav bostya, ny vydhav foll, rag kewsel an gwiryonedh a wrav; mes my a omwith, ma na dyppo denvyth gwell ahanav ages an pyth a wel ev ynnov po klewes ahanav, 7ha dre gnas fest dibarow an diskwedhyansow. Rakhenna, ma na dheffen ha bos re woethus, y feu res dhymm dreynenn y'n kig, el Satnas, ma'm kronkya ma na ven re woethus. 8A-dro dhe hemma, teyrgweyth y pysis war an Arloedh, rag mayth ella dhiworthiv. 9Mes ev a leveris dhymm: ‘Ow gras yw lowr ragos; rag yn gwannder yth yw ow nerth12:9yth yw ow nerth: War-lergh re a'n dornskrifow yth yw nerth. gwrys perfydh.’ Ytho, fest yn lowen y hwrav vy bostya y'm gwannder, may trikko warnav nerth Krist. 10Rakhenna pes da ov vy, yn gwannder, yn despityansow, yn edhommow, yn helghyans ha kaletteryow rag Krist; rag gwann pan ov vy, ena galloesek ov.

Bern Powl a-barth an Eglos yn Korinth

11Deuvev ha bos foll; hwi re'm konstrynas. Y telledh ow bos kommendys genowgh hwi, rag ny fyll dhymm travyth a'n abesteli worughel, kyn na viv evy travyth. 12Yn hwir, toknys abostol a veu oberys yn agas mysk gans perthyans meur, dre doknys ha dre varthusyon ha der oberow galloesek. 13Rag yn py maner yth ewgh hwi a le bri ages an eglosyow erell, marnas nag en vy ow honan begh warnowgh? Gevewgh dhymm an dhrokoleth ma!

14Otta, parys ov vy dhe dhos dhywgh an tressa gweyth, ha ny vydhav vy begh warnowgh; rag ny hwilav agas pythow, mes hwi. Rag ny dhegoedh dhe'n fleghes kuntell tresor a-barth aga herens, mes an gerens a-barth aga fleghes. 15Ytho, fest yn lowen y hwrav vy spena ha bos spenys a-barth agas enevow. Mara'gas karav dhe voy, a vydhav vy kerys dhe le? 16Pur ewn yw, ytho, na veuv vy begh warnowgh; mes, ha my ow pos sotel, gans gil my a'gas dynyas. 17A wrug vy kavoes prow dhiworthowgh dre nebonan a'n re a dhannvenis dhywgh? 18My a bysis Titus a vos, ha my a dhannvonas ganso an broder. A wrug Titus kavoes prow dhiworthowgh? A ny gerdhsyn ni y'n keth spyrys? hag y'n keth olow?

19Seulabrys y tybowgh ni dhe omaskusya dhywgh. A-rag Duw ni a gews yn Krist; mes pup-tra, karadowyon, yw a-barth agas drehevyans. 20Own a'm beus a gavoes, pan dhov, nag owgh hwi par dell vynnav vy, hag ow bos vy kevys genowgh par dell na vynnowgh hwi. Own a'm beus a strivyans, avi, sorr, kedrynnansow, sklanderyow, drokhwystrennow, goeth, derays; 21own a'm beus, pan dhov arta, ow Duw dhe'm uvelhe a-ragowgh, ha my dhe alari a-dro dhe lies a'n re neb re beghas kyns, heb kavoes edrek a'n plosedhes, nag a fornikasyon na drokhwans re wrussons.