Gwarnyans ha Salusyansow

1Homm yw an tressa gweyth may tov dhywgh; ‘Res yw pub mater dhe vos skoedhys dre anow dew po tri dustunier.’ 2My a leveris dhe'n re neb re beghsa kyns ha dhe oll an re erell, ha lemmyn y lavarav, ha my dhe-ves ahanowgh, dell wrug pan esen vy yn agas mysk an nessa gweyth: mar tov arta, ny sparyav, 3a-ban hwilowgh hwi prov a Grist ow kewsel ynnov. Nyns yw ev gwann genowgh, mes galloesek yw yn agas mysk. 4Rag krowsys veu dre wannder,13:4 Rag krowsys veu dre wannder: War-lergh re a'n dornskrifow Rag kyn feu krowsys dre wannder. mes ev a vew dre nerth Duw. Yn tevri, gwann on ni ynno ev, mes ragowgh hwi ni a wra bewa ganso dre nerth Duw.

5Omhwithrewgh mars esowgh hwi y'n fydh, prevewgh agas honan; a ny wodhowgh hwi bos Yesu Krist ynnowgh – marnas hwi a fyll an prov? 6Govenek a'm beus hwi dhe wodhvos na fyllyn ni an prov. 7Lemmyn ni a bys Duw na wryllowgh drog vyth; nyns yw henna may fo gwelys agan bos sewen y'n prov, mes may hwryllowgh hwi an pyth yw da, kyn havallo ni dhe fyllel. 8Rag ny yllyn ni gul travyth erbynn an gwiryonedh, saw unnsel a-barth an gwiryonedh. 9Rag ni a lowenha pan on ni gwann, ha hwi krev; keffrys ni a bys hemma: agas keweras. 10Rakhenna my a skrif an traow ma, ha my dhe-ves ahanowgh, ma na dhyghtiv yn asper herwydh an awtorita a veu res dhymm gans an Arloedh rag drehevyans, a-der rag diswrians.

11Gordhiwedh, breder, lowenhewgh; gwrewgh agas honan perfydh, kennerthewgh an eyl y gila, bedhewgh unnverhes, bedhewgh yn kres; ha'n Duw a gerensa hag a gres a vydh genowgh. 12Salusewgh an eyl y gila gans bay sans. 13An syns oll a'gas salus.

Gras agan Arloedh Yesu Krist ha kerensa Duw ha kowethyans an Spyrys Sans re bo genowgh hwi oll.13:13 War-lergh re a dhyllansow a'n tekst greka ha niver a dreylyansow, an geryow ma yw reknys avel gwers 14.