1Ytho, my a erviras hemma: na dhen vy dhywgh arta yn keudh. 2Rag mara'gas keudhav, piw eus neb a'm heudhha, marnas ev yw keudhys genev vy? 3My a skrifas poran kepar dell wrug, ma na'm be keudh, pan dheffen vy, dhiworth an re may tegoedh dhedha ow heudhhe, rag yma fydhyans dhymm ynnowgh, ow joy dhe vos agas joy hwi oll. 4My a skrifas dhywgh a alar meur ha fienasow kolonn ha gans meur a dhagrow; ny wrug vy henna may fewgh hwi keudhys, mes mayth aswonnewgh an gerensa pur vras hag a'm beus ragowgh.

Gevyans rag an Kammwrier

5Mes, mar keudhis nebonan, ny'm keudhis evy, mes yn rann (ny vynnav meurhe an dra) ev re'gas keudhis hwi oll. 6An kessydhyans ma gans an rann vrassa a'n dus yw lowr rag den a'n par na; 7ytho lemmyn, yn le henna y tegoedh dhywgh gava dhodho ha'y gonfortya, ma na ve den a'n par na fethys dre alar re vras; 8rakhenna my a'gas pys a afia agas kerensa dhodho; 9rag hemm yw an acheson may skrifis vy: rag previ agas gnas, ha godhvos mars owgh hwi gostydh yn pup-tra. 10Lemmyn, dhe neb a evowgh neppyth, my ynwedh a'n gwra; rag mar kwrugavy gava neppyth, my ynwedh re'n gavas ragowgh hwi yn golok Krist, 11ma na wrella Satnas agan treylya dh'y les y honan; rag nyns on ni heb godhvos a-dro dh'y dowlow.

Fienasow Powl ha'y Heudhder

12Pan dheuth vy dhe Troas rag aweyl Krist, daras a veu igerys dhymm gans an Arloedh; 13mes ny'm beu powes a'm spyrys pan na gevis Titus ow broder, ytho my a leveris farwell dhedha ha mos yn-rag dhe Makedonia.

14Mes dhe Dhuw re bo grasow, neb a'gan hembronk pup-prys yn trygh2:14 yn trygh: Po yn y geskerdh trygh. yn Krist, ow lesa dredhon yn pub le odour an godhvos anodho; 15drefenn agan bos odour hweg Krist dhe Dhuw yn mysk an re ow pos selwys hag yn mysk an re usi ow mos dhe goll, 16dhe'n re ma odour a vernans dhe'n mernans, ha dhe'n re na odour a vewnans dhe vewnans. Piw yw da lowr rag an traow ma? 17Rag nyns on ni gwikoryon a er Duw, kepar ha lies; mes dell ve a lenduri, yn hwir dell ve dhiworth Duw, ha dherag Duw, ni a gews yn Krist.