Menystrys a'n Kevambos Nowydh

1A dhallethyn ni omgommendya arta? Poken eus dhyn edhomm, dell eus dhe re, a lytherow a gommendyans dhywgh po dhiworthowgh? 2Hwi yw agan lyther, skrifys yn agan kolonnow, aswonnys ha redys gans oll, 3ha diskwedhys owgh hwi dhe vos lyther Krist, der agan menystrans; nyns owgh hwi skrifys der ynk, mes gans Spyrys an Duw bew, a-der yn leghyon a ven mes yn leghyon hag yw kolonnow a gig.

4Dre Grist yma dhyn fydhyans a'n par na orth Duw. 5Nyns on ni gwiw dhyn agan honan dhe rekna travyth a'gan honan, mes agan gwiwder yw a Dhuw, 6neb a'gan gwrug gwiw dhe vos menystrys a gevambos nowydh, a-der a lytherenn mes a spyrys; rag an lytherenn a ladh, mes an spyrys a vewha.

7Lemmyn mar teuth an menystrans a ankow yn golewder, grevys yn leghyon a ven, ma na allas mebyon Ysrael hwithra war fas Moyses drefenn golewder y fas, ow tremena dhe-ves dell esa, 8pygemmys moy yn golewder a dheu menystrans an Spyrys? 9Rag mars esa golewder y'n menystrans a dhampnasyon, pyseul dhe voy y hwra an menystrans a ewnder palshe yn golewder. 10Yn hwir, an pyth a'n jeva golewder kyns ny'n jeves golewder lemmyn y'n mater ma drefenn an golewder splanna agesso. 11Rag mar teuth dre wolewder an pyth esa ow tremena dhe-ves, pyseul dhe voy yn golewder yma'n pyth a dhur.

12Ytho, a-ban eus dhyn govenek a'n par na, ni a ober gans hardhder meur; 13nyns on ni kepar ha Moyses, neb a worra kudhlenn war y fas, ma na hwitthra mebyon Ysrael war dhiwedh an pyth esa ow tremena dhe-ves. 14Mes kaleshes o aga howsesyow. Rag bys y'n jydh hedhyw an keth kudhlenn a worta war an redyans a'n kevambos koth; nyns yw kemmerys dhe-ves, drefenn nag yw defendys dhe-ves saw unnsel yn Krist. 15Mes bys hedhyw, pan yw Moyses redys, kudhlenn a wrowedh war aga holonnow; 16mes den pan dreyl dhe'n Arloedh, an gudhlenn yw kemmerys dhe-ves. 17Lemmyn an Arloedh yw an Spyrys; ha plepynag usi Spyrys an Arloedh, ena rydhses yma. 18Mes, heb kudhlenn war agan fas, hag ow kweles golewder an Arloedh kepar hag yn gweder-mires, yth eson ni oll ow pos chanjys bys y'n keth imaj, dhiworth golewder dhe wolewder kepar ha dhiworth an Arloedh, an Spyrys.