1Ha ni ow kesoberi, ni a'gas pys ma na dhegemmerrowgh gras Duw yn euver; 2rag ev a lever,

‘Yn termyn plegadow my a'th klewas

hag yn dydh a selwyans my a'th weresas.’

Otta, lemmyn yth yw termyn fest plegadow, otta, lemmyn yth yw dydh a selwyans; 3nyns eson ni ow ri skila vyth a drebuchya, na vo kablys an menystrans 4mes yn pub fordh ni a omgommend avel menystrys Duw, yn meur a wodhevyans, yn galar, yn kaletteryow, yn ahwer, 5yn kastigow, yn prisonyow, yn derays, yn lavuryansow, yn nosow digosk, yn nown, 6yn glander, yn godhvos, yn perthyans, yn kuvder, y'n Spyrys Sans, yn kerensa wiryon, 7yn gwiryonsys a gows, yn nerth Duw, dre arvow a ewnder y'n dhorn dhyghow hag y'n dhorn gledh, 8dre wolewder ha disenor, dre gabel ha ger-da; akontys bos avel toelloryon, mes tus wiryon, 9avel anaswonnys, mes aswonnys yn ta, avel tus ow merwel mes otta, ni a vew; avel tus kessydhys mes nyns on ni ledhys; 10keudhys, hwath prest ow lowenhe; boghosek, hwath ow kul dhe lies bos rych; heb travyth, hwath ni a bew pup-tra.

11Agan ganow re beu igerys yn rydh dhywgh, tus Korinth, ha ledanhes yw agan kolonnow; 12nyns owgh hwi stroethys genen ni, mes stroethys owgh hwi gans agas kolonn agas honan; 13yn attal – my a gews kepar ha dhe fleghes – ledanhewgh agas kolonnow ynwedh.

Tempel an Duw Bew

14Na vedhewgh kamm-gesyewys gans diskryjygyon; rag py kevrenn eus dhe ewnder gans anlaghedh, po py kowethyans eus dhe wolow gans tewlder? 15Ha py kessenyans eus dhe Grist gans Beliar, po py rann eus dhe gryjyk gans diskryjyk? 16Ha py akord eus dhe dempel Duw gans idolys? Rag ni yw tempel an Duw bew, dell leveris Duw,

‘My a wra triga yn aga mysk,

ha my a wra kerdhes yn aga mysk;

aga Duw vydhav vy,

hag ow fobel vydhons i.

17Rakhenna dewgh yn-mes a-dhiworta,

ha bedhewgh diberthys, yn-medh an Arloedh,

ha na dochyewgh travyth avlan,

ha my a wra agas degemmeres,

18ha tas vydhav dhywgh

ha mebyon ha myrghes vydhowgh hwi dhymm,

yn-medh an Arloedh Ollgalloesek.’