1Rakhenna a-ban eus dhyn an ambosow ma, karadowyon, gwren glanhe agan honan dhiworth pub defolans a gig hag a spyrys, ow kul dhe sansoleth bos perfydh y'n own a Dhuw.

Joy Powl orth Edrek an Eglos

2Gwrewgh spas ragon yn agas kolonnow; ny gammwrussyn erbynn denvyth, ny pystigsyn denvyth gans mona7:2 ny pystigsyn denvyth gans mona: Po ny legrysyn denvyth., ny doellsyn denvyth. 3Ny lavarav hemma rag agas dampnya; seulabrys my re leveris agas bos yn agan kolonnow, dhe verwel war-barth ha dhe vewa war-barth. 4Hardhder meur a'm beus orthowgh hwi; meur yw ow bostyans ynnowgh. My re beu lenwys a gonfort; yn oll agan galar ow joy a balsha.

5Yn tevri, pan dheuthen ni yn Makedonia nyns esa dh'agan korf powes vyth, mes galar a berthsyn ni yn pub fordh; strifow a-ves ahanan, own a-ji dhyn. 6Mes Duw, neb a gonfort an re uvel, a'gan konfortyas dre dhevedhyans Titus; 7ha nyns o unnsel der y dhevedhyans, mes ynwedh der an konfort may feu ev konfortys a-dro dhywgh; ev a dherivas dhyn a-dro dh'agas hwans freth, agas kynvann, agas gwres a-barth dhymm, may lowenhis vy dhe voy. 8Rag mara'gas keudhis vy der ow lyther, ny'm beus edrek; kynth y'm bo edrek yn tevri, rag my a wel ow lyther dh'agas keudhi, mes unnsel a verr spas. 9Lemmyn my a lowenha; ny'n gwrav drefenn agas bos keudhys, mes drefenn agas bos keudhys dhe edrek; rag duwek o agas keudh, ma na vewgh hwi pystigys kammenn genen. 10Rag keudh duwek a ober edrek heb govisyon, bys yn selwyans; mes keudh a'n bys a ober mernans. 11Otta lemmyn, an keudh duwek ma, dredho pana frethter a veu oberys ynnowgh, pana omaskusyans, pana sorrvann, pana own, pana hwans ter, pana dhiwysygneth, pana gessydhyans. Yn pup-tra hwi re ombrovas ankablus y'n mater ma. 12Ytho, kyn skrifis vy dhywgh, nyns o drefenn an den a wrussa kamm, na drefenn an den a wodhavsa an kamm, mes may fe diskwedhys dhywgh dherag Duw agas diwysygneth a'gan govis. 13Dre hemma ni re beu konfortys.

Mes moy es agan konfort, ni a lowenhas hwath moy drefenn joy Titus, hag a veu disyghys y spyrys genowgh hwi oll; 14rag mar postis vy dhodho a-dro dhywgh, ny'm beu meth, mes par dell o gwir an traow oll a leversyn dhywgh, keffrys agan bostyans dhe Titus re beu prevys gwir. 15Hag ystynnys dhywgh dhe voy yw y golonn hag ev ow perthi kov agas bos gostydh, hwi oll, pan y'n degemmersowgh gans own ha krena. 16My a lowenha y'm beus fydhyans leun ynnowgh.