1‘Mes pan eth ow mab a-ji dh'y jambour, ev a goedhas yn farow. 2Ytho ni oll a dhifeudhis agan lugern, hag oll ow hentrevogyon a assayas ow honfortya; ytho my a dewis bys yn gorthugher an nessa dydh. 3Wosa i dhe worfenna ow honfortya, rag my dhe dewi, my a sevis y'n nos ha fia, ha dos y'n park ma, dell welydh. 4Ha lemmyn ny vynnav dehweles y'n sita, mes pesya omma, heb naneyl dybri boes nag eva, mes ow kyni heb hedhi bys pan verwiv.’

5Ena my a asas ow ombrederow hag a worthybis dhedha yn sorr, ow leverel, 6‘A ty, moy gokki es benynes oll, a ny welydh agan kynvann, ha'n taklow a hwarva dhyn? 7Rag Sion, an vamm ahanan ni oll, yw yn tristyns bras, hag uvelhes yn town. 8Res yw kyni lemmyn, rag yth eson ni oll ow kyni; ha bos trist, rag ni oll yw trist. Nyns osta trist marnas rag unn mab. 9Govynn orth an nor, hag ev a lever dhis, hi yw neb a dhegoedh kyni, drefenn an niver bras a veu genys ynni. 10A-dhia'n dalleth tus oll a veu genys anedha, hag erell a vydh ow tos; hag otta, nammnag oll a gerdh bys yn koll, ha routh anedha a dheu dhe dhistruyans. 11Piw ytho y tegoedh dhodho kyni moy, hi neb a gollas routh mar vras, po ty usi ow kalari rag onan? 12Mes mar leverydh dhymm, “Nyns yw ow hynvann vy kepar ha kynvann an nor, rag my re gollas frut ow thorr, a dhineythis gans gloesow; 13mes rag an nor, yth yw war-lergh fordh an nor, an routh a-lemmyn a dhe-ves y'n keth fordh dell dheuth”; 14ena my a lever dhis, kepar dell dhineythsys gans angoes, yn kettella an nor re dhaskorras y frut a'n dalleth dhodho ev neb a'n gwrug. 15Lemmyn ytho, gwith dha dristyns dhiso jy dha honan, ha porth yn kolonnek an taklow a dheuth warnas. 16Rag mar aswonnydh ervirans Duw dhe vos ewn, yn termyn ty a dhegemmer dha vab, ha ty a vydh enorys yn mysk benynes. 17Ytho ke a-ji dhe'n sita dhe'th wour.’

Yn-medh hi dhymm, 18‘Ny wrav henna, na nyns av a-ji dhe'n sita, mes my a verow omma.’ 19My a gewsis arta dhedhi, 20‘Na wra henna, mes siw ow husul: rag pygemmys yw eskerens Sion? ha bydh konfortys drefenn dolor Yerusalem. 21Rag ty a wel fatell veu agan sentri forsakys, ha'gan alter terrys dhe'n dor, ha'gan tempel distruys; 22agan telynn re beu uvelhes, agan hymna re dewis, agan lowena re dhiwedhas; golow agan kantolbrenn re beu difeudhys, argh agan kevambos re beu pyllys, agan taklow sans re beu defolys, ha'n hanow a veu gelwys warnan nammna veu disakrys; agan fleghes re wodhevis bismer, agan oferysi re beu leskys, agan Levysi res eth dhe-ves yn kethneth, agan gwyrghesow re beu defolys, ha'gan benynes re beu ravnys; agan tus wiryon re beu degys dhe-ves, ha'gan fleghigyow re beu tewlys mes, agan gwer yowynk res eth yn kethneth ha'gan gwer alloesek re beu gwrys dinerth. 23Ha'n pyth yw an gwetha oll, sel Sion re gollas hy glori, ha re beu daskorrys yn diwleuv an re a wra agan kasa. 24Ty ytho shak dhe-ves dha dristyns bras ha gorr dhe denewen dha dholors pals, may kemmerro an Galloesek truedh ahanas arta, ha may rollo an Ughella powes dhis ha'th difres a'th lavuryow.’

25Pan esen ow kewsel gensi, otta, hy fas a splannas yn pur dromm, ha'y fisment a lughesis, ma'm beu own anedhi, ha my a omwovynnas pandr'a ve hemma. 26Desempis hi a dhellos kri bras leun a own, may kryghyllis an dor drefenn an son. 27My a viras, hag otta ny veu ena an venyn a welis vy na fella, mes yth esa sita ow pos drehevys, ha tyller bras a omdhiskwedhas dhiworth an selyow. Own a'm beu, ha my a grias gans lev ughel, ha leverel, 28‘Ple'ma an el Uriel neb a dheuth dhymm yn kynsa? Rag ev a veu neb a'm dros bys yn oll an sowdhan bras ma; ow diwedh yw treylys dhe bodredhes, ha'm pysadow dhe geredh.’

Uriel a Styr an Welesigeth

29Pan esen ow kewsel an geryow ma, otta, y teuth dhymm an el a dheuth dhymm yn kynsa, ha mires orthiv. 30Yth esen ow krowedha kepar ha korf marow, ha'm skians re bia kemmerys dhe-ves. Ev a synsis ow leuv dhyghow ha'm konfortya, ha'm settya war ow threys. Yn-medh ev dhymm, 31‘Pandr'a hwer dhis? Prag yth osta sowdhenys, ha prag yth yw dha skians ha prederow dha golonn sowdhenys?’

32Yn-medhav, ‘Rag ty a'm forsakyas yn tien. My a wrug war-lergh dha eryow ha mos y'n park, hag otta, my a welas, hag a wel lemmyn, taklow na allav aga derivas.’ 33Yn-medh ev dhymm, ‘Sav yn-bann avel gour, ha my a'n styr dhis.’ 34Yn-medhav, ‘Kows, ow arloedh, saw na wra ow forsakya, ma na verwiv yn euver. 35Rag my re welas taklow na wodhvev, ha klewes taklow nag esov orth aga konvedhes. 36Po yw ow brys toellys, ha'm enev ow koska? 37Lemmyn ytho, my a'th pys, diskwedh dhymm styr an welesigeth ma.’

Ev a worthybis dhymm, 38‘Goslow orthiv, ha my a dhysk dhis, ha leverel dhis a-dro dhe'n taklow a ownydh; rag an Ughella re dhiskudhas dhis lies kevrin. 39Ev re welas dha fordh wiryon, rag ty o trist heb hedhi rag dha bobel, ha ty a gynis yn feur war Sion. 40Hemma ytho yw styr an welesigeth. An venyn a welsys nammnygen, 41neb a welsys ow kyni, ha ty a dhallathas hy honfortya, 42(mes lemmyn ny welydh furv an venyn, mes yth omdhiskwedhas dhis sita ow pos drehevys), 43ha neb a dherivas dhis a-dro dhe anfeus hy mab: hemm yw an gwir styryans. 44An venyn a welsys yw Sion, a welydh lemmyn avel sita ow pos drehevys. 45An reson hi dhe leverel dhis hy bos anvap deg blydhen warn ugens yw, rag y feu tri mil vlydhen pan na veu offrynnow hwath gwrys ynni. 46Ha wosa tri mil vlydhen Solomon a dhrehevis an sita, hag offrynna offrynnow; henn yw an termyn may tineythis an anvap mab. 47Pan leveris hi dhis hi dh'y vaga gans rach, hemm yw an termyn may feu Yerusalem annedhys. 48Pan leveris hi dhis “Ow mab a verwis hag ev ow mos a-berth yn y jambour”, hag anfeus dhe dhos warnedhi, henn yw an terroes a veu gwrys dhe Yerusalem. 49Otta, ty a welas hy hevelep, fatell gynis rag hy vab, ha ty a dhallathas hy honfortya rag an taklow a hwarva. An re ma yw an taklow yw res aga diskudha dhis.

50‘Lemmyn an Ughella, ow kweles ty dhe vos trist a'n enev, hag ow kodhav rygdhi a leun golonn, re dhiskwedhas dhis splannder hy glori, ha'y semlans teg. 51Rag an reson ma my a leveris dhis bos res ty dhe wortos y'n park, tyller le na via chi drehevys. 52Rag my a wodhva, an Ughella dhe vos ow talleth diskwedhes an taklow ma dhis. 53Ytho my a leveris dhis, res yw dhis mos y'n park, le na via sel a dhrehevyans vytholl. 54Rag ny yll drehevyans vytholl a vab-den pesya yn tyller may fydh sita an Ughella diskudhys.

55‘Ty ytho, na borth own, ha na as dha golonn dhe vos dyegrys; mes deus a-bervedh ha gwel splannder ha braster an drehevyans, kemmys dell yll dha dhewlagas y weles. 56Wosa henna ty a glew, kemmys dell yll dha dhiwskovarn y glewes. 57Rag moy gwynnvys os es lies, ha ty re beu gelwys dhe vos gans an Ughella, dell na veu gelwys marnas boghes tus. 58Mes gorta omma bys nos a-vorow, 59ha'n Ughella a dhiskwedh dhis gwelesigethow an taklow a vydh ev ow kul dhe'n re yw trigys y'n nor y'n dydhyow diwettha.’ Ytho my a goskas an nos na ha ternos, kepar dell leveris dhymm.