Gwelesigeth an Er

1Y'n nessa nos my a welas hunros, hag otta, er a dheuth yn-bann dhiworth an mor, may feu dhodho dewdhek askell bluvennek ha tri fenn 2My a viras, hag otta ev a lesas y eskelli dres oll an nor, hag oll gwynsow nev a hwythas warnodho, ha'n kommol a guntellas a-dro dhodho. 3My a viras, hag yn-mes a'y eskelli y tevis eskelli a-dal dhedha, mes y fons gwrys byghan ha munys. 4Yth esa y bennow ow powes yn kosel; an penn y'n kres o brassa es an pennow erell, mes yth esa ev ynwedh ow powes gansa. 5My a viras, hag otta yth esa an er ow nija gans y eskelli, hag ev a reynyas war an nor ha war an re trigys ynno. 6My a welas, fatell o pup-tra yn-dann nev gostydh dhodho, ha ny wre nagonan y gontradia – nagonan a'n kreaturs war an nor. 7My a viras, hag otta an er a yskynnas war y ewines, ow leverel, 8‘Na woelyewgh hwi oll y'n keth termyn. Koskes pubonan yn y dyller, ha goelyewgh an eyl wosa y gila, 9mes bedhes an pennow gwithys dhe'n diwedh.’

10My a viras, hag otta nyns esa an lev ow tos dhiworth y bennow, mes yn-mes a gres y gorf. 11My a reknas y eskelli a-dal, hag otta, yth ens i eth. 12My viras, hag otta, unn askell a yskynnas a'n barth dhyghow, ha hi a reynyas war oll an nor. 13Ha pan esa ow reynya, hy diwedh a dheuth, hag yth eth dhe goll, ha ny veu gwelys hy thyller. Ena an nessa a yskynnas ha reynya, ha hi a besyas reynya termyn hir. 14Pan esa ow reynya, hy diwedh ynwedh a dheuth, hag yth eth dhe goll avel an kynsa. 15Hag otta, lev a dheuth mes, ow leverel dhe'n askell, 16‘Klew, ty neb re reynyas war an nor oll an termyn ma. My a dheriv hemma dhis, kyns ty dhe dhalleth mos dhe goll. 17War dha lergh, ny wra nagonan reynya termyn mar hir, na hwath hanter an termyn.’

18Ena an tressa askell a omdhrehevis ha synsi rewl avel an eskelli kyns, ha hi ynwedh eth dhe goll. 19Hag yndella y feu gans oll an eskelli erell an eyl wosa hy ben; yth esens ow synsi rewl hag ena ny vons gwelys arta. 20My a viras, hag otta y'n termyn ow siwya yth esa eskelli owth omdhrehevel, i ynwedh a'n barth dhyghow, dhe synsi rewl. Re anedha a synsi rewl, mes yth ethons dhe goll desempis; 21hag yth esa re erell owth omdhrehevel, mes ny yllens synsi rewl.

22Wosa an taklow ma, my a viras, hag otta an dewdhek askell ha diw a'n eskelli byghan res eth dhe goll, 23ha ny veu travyth gesys war gorf an er marnas an tri fenn esa ow powes yn kosel, ha hwegh askell vyghan.

24My a viras, hag otta diw a'n eskelli byghan a veu diberthys, hag i a veu gesys yn-dann an penn a-dhyghowbarth, mes peder anedha a veu gesys yn aga thyller. 25My a viras, hag otta yth esa an eskelli byghan ma ow tewlel towl dhe omdhrehevel ha synsi rewl. 26My a viras, hag otta onan a veu drehevys yn-bann, mes desempis yth eth mes a wel; 27ha nessa ynwedh, ha skaffa es an kynsa yth eth mes a wel. 28My a viras, hag otta yth esa an dhiw a veu gesys ow tewlel towl dhe synsi rewl aga honan. 29Pan esens i ow tewlel towl, onan a'n pennow esa ow powes yn kosel, an penn y'n kres, a dhifunas. Hemma a veu brassa es an dhew benn arall. 30My a viras fatell veu an dhew benn kesunys ganso, 31hag otta, an penn a dreylyas gans an re esa ganso, ha dybri an dhiw askell byghan esa ow tewlel towl dhe reynya. 32Mes an penn ma a waynyas maystri war oll an nor ha lordya war an re trigys ynno gans meur kompressans. Y feu dhodho galloes war an norvys oll, moy es oll an eskelli a veu kyns.

33My a viras wosa hemma, hag otta an penn y'n kres eth mes a wel desempis, kepar ha'n eskelli erell. 34Mes y feu gesys dew benn, a reynyas yn kepar maner war an nor ha war an re trigys ynno. 35My a viras, hag otta an penn a-dhyghowbarth a dhybris an penn a-gledhbarth.

Lew a Dhifun yn-mes a'n Goeswik

36Ena my a glewas lev ow leverel dhymm, ‘Mir a-ragos ha preder an pyth welydh.’ 37My a viras, hag otta neppyth kepar ha lew difun hag owth usa yn-mes a'n goeswik. My a glewas fatell dhellos lev mab-den dhe'n er, ha leverel, 38‘Klew, ha my a gews orthis. An Ughella a lever dhis, 39“A nyns osta jy an diwettha a'n peswar best a wrugavy aga kreatya dhe reynya y'm bys, dredha may teffa diwedh ow thermynyow? 40Ty, an peswora neb re dheuth, re fethas oll an bestes a dheuth kyns, ha ty re synsis rewl war an bys gans euth bras, ha war oll an norvys gans an gwetha kompressans. Hag i11:40 i: Po amendyans ty. a annedhis oll an norvys termyn mar hir gans toell. 41Ty re vreusis an norvys, a-der gans gwirder; 42rag ty re blagyas an re hwar ha pystiga an re gosel. Ty re gasas an re a gews an gwir, ha kara gowleverysi; ty re dhistruis annedhow an re a dheg frut, ha terri dhe'n dor fosow an re na wrug dregynn dhis. 43Dha donteth re dheuth yn-bann bys y'n Ughella, ha'th woeth bys y'n Galloesek. 44An Ughella re viras orth y dermynyow, hag otta diwedhys yns, ha kowlwrys yw y oesow. 45Rakhenna, ty er, ty a dhe goll, ha'th eskelli euthyk, ha'th eskelli byghan pur dhrog, dha bennow spitus, dha ewines pur dhrog, hag oll dha gorf koeg. 46Ena an norvys oll a vydh difresys ha hebaskhes, delivrys dhiworth dha nell, ha may fo dhe'n norvys govenek y'n vreus, hag yn y dregeredh ev neb a'n gwrug.” ’