1Pan esa an lew ow kewsel an geryow ma dhe'n er, my a viras, 2hag otta an penn a veu gesys galsa mes a wel. An peder askell a wrussa tremena dhodho, a sevis dhe reynya, mes aga reyn a veu gwann ha leun a dervans. 3My a viras, hag otta yth esens i ynwedh ow mos mes a-wel, hag yth esa oll korf an er gans tan, ha'n nor a veu dyegrys bras.

Ena my a dhifunas pur benndegys y'm brys hag yn own meur, ha my a leveris dhe'm spyrys, 4‘Ty re dhros hemma warnav, ow hwilas fordhow an Ughella. 5Yth ov vy hwath skwith y'm enev ha pur wann y'm spyrys, ha nyns eus ynnov nerth vytholl, drefenn an own meur a veu dhymm an nos ma. 6Lemmyn ytho my a bys an Ughella, may hwrello ow honfortya bys y'n diwedh.’

Styryans an Welesigeth

7Yn-medhav, ‘A Arloedh galloesek, mar kevis gras y'th wolok, mars ov kevys gwiryon genes moy es re erell, ha mar teuth ow pysadow yn-bann yn hwir a-rag dha fas, 8gwra ow honfortya, ha diskwedh dhymm, dha was, an styryans ha'n dielvennans a'n welesigeth euthyk ma, dhe dhri konfort leun dhe'm enev. 9Rag ty re'm synsis wordhi may fo diskwedhys dhymm diwedh an termynyow, ha'n termynyow diwettha.’

Yn-medh ev dhymm, 10‘Hemm yw styryans an welesigeth ma a welsys. 11An er a welsys ow mos yn-bann dhiworth an mor yw an peswora gwlaskor a veu gwelys yn gwelesigeth Daniel dha vroder. 12Mes ny veu styrys dhodho, dell wrav vy po dell wrugavy y styrya dhis. 13An dydhyow a dheu pan sev gwlaskor war an nor, hag y fydh moy euthyk es oll an gwlaskordhow a veu kyns. 14Ynni dewdhek myghtern a vydh ow reynya, onan wosa y gila. 15An nessa anedha ow talleth reynya a syns an rewl termyn hirra es nagonan arall a'n dewdhek. 16Hemm yw styryans an dewdhek askell a welsys.

17‘A-dro dhe'n lev a glewsys ow kewsel dhiworth kres y gorf, a-der dhiworth y bennow, hemm yw an styryans. 18Yn kres termyn y reyn y sord strifow nag yns byghan, hag y fydh an wlaskor yn peryll a goedha. Ny goedh y'n termyn na, mes y fydh ow taskavoes hy hynsa nerth. 19Ha pan welsys an eth askell vyghan ow klena orth y eskelli, hemm yw an styryans. 20Eth myghtern a sev ynno, may fydh aga thermynyow anpoesek ha'n blydhynyow skav. 21Pan vydh kres an termyn ow tos nes, peswar anedha a vydh gwithys bys y'n termyn may fydh diwedh an vyghterneth ow tos nes, mes dew a vydh gwithys bys y'n diwedh.

22‘A-dro dhe'n tri fenn a welsys ow powes yn kosel, 23hemm yw an styryans. Y'n y dhydhyow diwettha an Ughella a drehav tri myghtern, hag i a nowydhha lies tra ynni, hag i a gyv maystri war an nor 24ha war an re trigys ynno, gans moy kompressans es oll an re a veu kyns. Rakhenna gelwys yns pennow an er, 25rag i a vydh an re a gowlwra y dhrog weythresow, ha gorfenna y dhiwettha gwriansow. 26A-dro dhe'n penn bras a welsys ow mos mes a wel, onan a'n vyghternedh a verow yn y weli, mes gans tormentys. 27A-dro dhe'n dhew a veu gesys, an kledha a's devor. 28Rag onan anedha a vydh devorys gans kledha an arall yw ganso, mes y'n diwettha dydhyow ev ynwedh a goedh dre an kledha.

29‘A-dro dhe'n dhiw askell vyghan a welsys ow tremena dhe'n penn usi y'n barth dhyghow, 30hemm yw an styryans. I yth yw an re a wrug an Ughella aga gwitha bys yn diwedh an er; hemm o an reyn gwann ha leun a dervans 31dell welsys. An lew a welsys ow tifuna yn-mes a'n goeswik hag owth usa, hag ow kewsel orth an er, ha'y geredhi rag y anewnder, hag a-dro dhe oll y lavarow a glewsys, 32hemm yw an Untys, neb a wrug an Ughella y witha bys yn diwedh an dydhyow, neb a sev dhiworth agh Davydh, neb a dheu ha kewsel12:32 an dydhyow, neb a sev dhiworth agh Davydh, neb a dheu ha kewsel: Ow siwya an Syriek. Nyns usi an geryow ma y'n Vulgat. dhedha. Ev a's keredh rag aga gweythresow didhuw, ha rag aga anewnderyow, hag ev a dhisplet a-ragdha aga gweythresow arvedhus. 33Rag yn kynsa ev a's dre yn few a-rag y vreus, ha'ga heredhi, ena aga distrui. 34Mes gans mersi ev a dhelirv remenant ow fobel, an re a veu sawys y'm oryon, hag ev a re dhedha lowena bys pan dheu an diwedh, dydh breus, a gewsis orthis anodho y'n dalleth. 35Hemm yw an hunros a welsys, ha'n re ma yw y styryans. 36Ty unnsel yw wordhi dhe dhyski an kevrin ma a'n Ughella. 37Ytho skrif yn lyver oll an taklow ma a welsys, ha'ga gorra yn tyller kudhys; 38ha ty a's dysk dhe'n dus fur yn mysk dha bobel, may hwodhes y hyll aga kolonn konvedhes ha gwitha an kevrinyow ma. 39Mes ty worta omma seyth dydh moy, may fo diskwedhys dhis pypynag a vydh orth bodh an Ughella dhe dhiskwedhes dhis.’ Ena ev a omdennas dhiworthiv.

An Bobel a Dheu dhe Ezra

40Pan welas oll an bobel an seyth dydh dhe vos passys, ha ny dhehwelsen vy y'n sita, i oll a omguntellas war-barth, byghan ha bras, ha leverel dhymm, 41‘Fatell wrussyn pegha er dha bynn, ha py kamm a wrussyn dhis, ty dh'agan forsakya, hag esedha y'n tyller ma? 42Rag yn-mes a'n brofoesi oll ty unnsel yw gesys dhyn, kepar ha bagas a grappys, ha kepar ha lugarn yn tyller tewl, ha kepar ha porth rag gorhel gwithys saw dhiworth annawel. 43A nyns yw lowr an droglammow a wrug agan tochya? 44Mar kwredh agan forsakya, pygemmys gwell via ragon mar pen ni ynwedh leskys y'n tan a loskas Sion. 45Rag nyns on ni gwell es an re a verwis ena.’ Hag i a oelas gans lev ughel.

Ena my a worthybis dhedha, 46‘Bydh kolonnek, Ysrael; ha na vydh trist, chi Yakob. 47Rag an Ughella a berth kov ahanowgh, ha ny wra a'n Galloesek agas ankevi yn agas strif. 48Rag ny wrugavy agas forsakya, na omdenna dhiworthowgh, mes my re dheuth y'n tyller ma dhe bysi rag ynyalder Sion, ha dhe hwilas tregeredh, drefenn uvelheans agan12:48 agan: Ow siwya an Syriek. sentri. 49Lemmyn ytho kewgh tre pubonan ahanowgh, ha my a dheu dhywgh wosa an dydhyow ma.’ 50Ytho an bobel eth yn-rag dhe'n sita, dell leveris vy dhedha. 51Mes my a besyas esedha y'n park seyth dydh, dell y'm gorhemmynnis an el; ha ny dhybris marnas bleujyow an gwel; losow o ow boes y'n dydhyow na.