An Gour Dhiworth an Mor

1Wosa seyth dydh my a hunrosas hunros y'n nos, 2hag otta yth esa gwyns ow sevel dhiworth an mor hag ankresya oll y donnow. 3My a viras, hag otta yth esa neppyth haval dhe dhen ow nija war-barth gans kommol nev; ha pan dreylya y fas dhe vires, pup-tra gwelys yn-danno a grena; 4ha peskweyth mayth e an lev dhiworth y anow, peub a glewo y levow o leskys kepar dell deudh an koer pan dheu nes dhe'n tan.

5Wosa hemma, otta yth esa routh tus heb niver owth omguntell war-barth dhiworth an peswar gwyns a nev, dhe fetha an den a dheuth yn-bann dhiworth an mor. 6My a viras, hag otta, ev a gervyas menydh bras ragdho y honan, ha nija yn-bann warnodho. 7My a assayas gweles an rannvro po an tyller may fia an menydh kervys anodho, mes ny yllis.

8Wosa hemma, otta yth esa peub a omguntellas war-barth er y bynn rag y fetha, ow perthi own, saw yth esens ow lavasos omladh. 9Pan welas an routh ow tos yn unn herdhya, ny dhrehevis y leuv, na ny synsis kledha, nag arv bresel vytholl; 10unnweyth ev a dhannvonas yn-mes a'y anow neppyth haval dhe liv a dan, hag yn-mes a'y dhiwweus anall a flamm, ha dhiworth y daves yth esa ow tannvon yn-mes gwrygh avel annawel. Oll an re ma a veu kemmyskys war-barth, an liv a dan, an anall a flamm, ha'n annawel veur, 11hag i a goedhas war an routh esa owth herdhya, hag ow pareusi dhe omladh, ha'ga leski oll, ha desempis ny veu gwelys travyth a'n routh heb niver marnas lusu ha'n blas a vog. My a viras, ha sowdhenys veuv.

12Wosa hemma my a viras an keth den ow tos yn-nans dhiworth an menydh, hag ow kelwel dhodho y honan routh arall, onan hebask. 13Y teuth dhodho lies den, re anedha lowen ha re anedha trist; re anedha a veu kelmys, hag yth esa re anedha ow tri erell avel offrynnow.

Styryans an Welesigeth

Ena my a dhifunas yn euth bras, ha my a bysis war an Ughella, ow leverel, 14‘A'n dalleth ty re dhiskwedhas an marthusyon ma dhe'th was, ha'm synsi wordhi may tegemmerres ow fysadow. 15Ytho diskwedh dhymm lemmyn pyth yw styryans an hunros ma ynwedh. 16Rag dell esov ow prederi y'm brys, go-i an re a vydh gesys y'n dydhyow na, ha go-i hwath moy an re nag yw gesys! 17Rag an re nag yw gesys a vydh trist, 18rag i a gonvedh an taklow yw gwithys rag an dydhyow diwettha, mes ny yllons drehedhes dhedha. 19Rakhenna go-i an re yw gesys, rag i a wel peryllow bras hag edhommow pals, dell dhiskwedhas an hunrosow ma dhis. 20Byttegyns esya yw godhav an peryll a dhos y'n taklow ma, ages tremena dhiworth an bys avel kommolenn heb gweles an pyth a hwer y'n dydhyow diwettha.’

Ev a worthybis dhymm, 21‘My a lever dhis styryans an welesigeth, ha my a iger dhis an taklow a gewssys anedha. 22Ty a gewssys a'n re yw gesys, hag a'n re nag yw gesys; hemm yw an styryans. 23Ev neb a dhre an peryll y'n termyn na, ev y honan a with an re a goedh yn peryll, mayth eus dhedha oberow ha fydh troha'n Ughella. 24Godhvydh ytho, moy benniges yw an re yw gesys es an re yw marow.

25‘Hemm yw styryans an welesigeth. Ty a welas gour ow tos yn-bann yn-mes a golonn an mor; 26hemm yw ev may hwrug an Ughella y witha dre oesow pals; ev y honan a dhelirv y greasyon, hag ordena tenkys an re yw gesys. 27Ty a welas gwyns ha tan hag annawel ow tos yn-mes a'y anow, 28ha nyns esa ow synsi kledha nag arv bresel, mes ev a dhistruis an routh a dheuth yn unn herdhya dh'y fetha. Hemm yw an styryans: 29An dydhyow a dheu pan wra an Ughella delivra an re usi war an nor, 30ha sowdhan brys a dheu war an re trigys y'n nor. 31I a dewl towl dhe werrya an eyl erbynn y gila, sita erbynn sita, tyller erbynn tyller, pobel erbynn pobel, ha gwlaskor erbynn gwlaskor. 32Pan dheu an taklow ma, ha pan hwer an toknys a dhiskwedhis vy dhis kyns, ena ow Mab a vydh diskudhys, an gour a welsys ow tos yn-bann.

33‘Ena pan glew oll an kenedhlow y lev, i oll a as aga thir, ha'n vresel usi dhedha an eyl erbynn y gila. 34Ha routh heb niver a omguntell, dell welsys, ow mynnes dos dh'y fetha. 35Mes ev a sev war benn menydh Sion, 36ha Sion a dheu, apert dhe beub oll, pareusys ha drehevys, avel an menydh a welsys, kervys heb gweres diwleuv. 37Ena ev, ow Mab, a geredh an kenedhlow kuntellys drefenn aga kammweythresow: hemm yw haval dhe'n annawel. 38Hag ev a's keredh fas orth fas rag aga drog brederow ha'n tormentys a vydhons ow kodhav: hemm yw haval dhe'n flammow. Hag ev a's distru yn es, dre an lagha: hemm yw haval dhe'n tan.

39‘Ty a welas ev dhe guntell dhodho routh arall, hebask. 40Hemm yw an naw loeth a veu degys dhe-ves yn kethneth dhiworth aga thir aga honan yn dydhyow myghtern Hoshea, neb a wrug Shalmaneser, myghtern Assyria aga dri yn kethneth. Ev a's dug dres an avon, hag i a veu degys yn tiredh arall. 41Mes i a dewlis tewl ragdha i aga honan, i dhe asa routh an kenedhlow, ha mos yn-rag bys yn rannvro bell, ma nag esa agh mab-den trigys bythkweth, 42may hallens gwitha ordenansow aga lagha ena, na allsons aga gwitha yn aga rannvro aga honan 43I a entras dre entransow ynn an avon Ewfrates. 44Rag y'n termyn na an Ughella a wrug toknys ragdha, ha stoppya kanolyow an avon bys pan vedhens tremenys dresti. 45Der an rannvro na yth esa vyaj hir a vlydhen ha hanter; hanow an rannvro yw Arzareth.

46‘Wosa henna yth esens trigys ena bys y'n diwettha termyn; ha lemmyn, hag i ow talleth dos arta, 47an Ughella a stopp kanolyow an avon arta, may hyllons tremena dresti. Hemm yw an reson ty dhe weles an routh omguntellys yn hebask. 48Mes an re gesys a'th pobel, kevys a-ji dhe'm oryon sans, a vydh sawys. 49Ytho pan dhalleth ev distrui routh an kenedhlow yw omguntellys, ev a dhifres an bobel yw gesys, 50hag ena ev a dhiskwedh dhedha lies marthus bras.’

51Yn-medhav, ‘A Arloedh galloesek, styr dhymm prag y hwelis vy an gour ow tos yn-bann dhiworth kolonn an mor.’ Yn-medh ev dhymm, 52‘Par dell ny yll denvyth hwithra po godhvos pyth eus yn downder an mor, yndella ynwedh ny yll denvyth war an nor gweles ow Mab na'n re usi ganso marnas yn termyn y dhydh. 53Hemm yw styryans an hunros a welsys, ha ny veu henna klerhes dhe dhenvyth marnas ty; 54rag ty re forsakyas dha hynsyow dha honan, hag omri dhe'm hynsyow vy, ha hwithra ow lagha. 55Ty re ros dha vewnans dhe furneth, ha ty a elwis konvedhes dha vamm. 56Rakhenna my re dhiskwedhas dhis an taklow ma, avel gober gans an Ughella. Wosa tri dydh moy my a gews taklow erell dhis, ha styrya taklow poesek ha marthys.’

57Ena my eth yn-rag ha tremena a-dreus dhe'n park, ow klorifia hag ow kormel an Ughella yn feur drefenn an marthusyon esa orth aga gul a dermyn dhe dermyn, 58ha rag ev dhe woverna an termynyow ha pypynag a hwer yn y seson. Ha my a wortas ena tri dydh.