An Arloedh a Re Gorhemmynn dhe Ezra

1Y'n tressa dydh, yth esen owth esedha yn-dann dherwenn, 2hag otta, lev a dheuth dhiworth bos a-dal dhymm ha leverel, ‘Ezra, Ezra!’ Yn-medhav ‘Ottavy, Arloedh’, ha my a sevis war ow threys. Yn-medh ev dhymm, 3‘My a omdhiskwedhas y'n bos ha kewsel dhe Moyses, pan esa ow fobel yn kethneth yn Ejyp, 4ha my a'n dannvonas, ha ledya ow fobel yn-mes a Ejyp; ha my a'n dros yn-bann dhe venydh Sinay, ha'y witha genev lies dydh. 5My a dherivas dhodho marthusyon pals, ha diskwedhes dhodho kevrinyow an termynyow ha termynyow an diwedh. My a ros gorhemmynn dhodho, ow leverel, 6Dyllo an geryow ma yn apert, ha kudh an re erell. 7Ha lemmyn my a lever dhis: 8Gwith y'th kolonn an toknys a dhiskwedhis ha'n gwelesigethow a welsys, ha'n styryansow a glewsys; 9rag ty a vydh kemmerys dhe-ves dhiworth tus, hag alemma rag ty a drig gans ow Mab ha gans an re haval dhis, bys yn diwedh an termynyow. 10Rag an bys re gollas y yowynkneth, hag yma an termynyow ow talleth bos koth. 11An bys yw rynnys yn dewdhek rann, ha naw rann re dremenas, ha hanter an degves rann. 12Nyns eus marnas diw ow kortos, war-barth gans hanter an degves rann. 13Lemmyn ytho kempenn dha ji, ha keredh dha bobel; konfort an re uvel anedha; ha lemmyn nagh an bewnans legrys. 14Gorr dhiworthis prederow marwel; tewl dhe-ves dhiworthis an beghyow denel, ha diwisk dhiworthis dha gnas wann; gorr dhe denewen an prederow an moyha beghus dhis, ha fysk dhe fia dhiworth an termynyow ma. 15Rag drogow gweth es an re a welsys a vydh gwrys. 16Rag dhe voy an bys a dheu ha bos gwann dre gothni, dhe voy y hwra drogow kressya war y drigoryon. 17Yth a gwirder pell dhe-ves, ha gowegneth a dheu nes. Rag an er a welsys y'n gwelesigeth a fysk seulabrys dhe dhos.’

An Lagha dhe vos Skrifys Arta

18My a worthybis, ‘A wrav vy kewsel a-ragos, Arloedh? 19Rag yth av dell worhemmynnsys dhymm. My a geredh an bobel yw bew lemmyn; mes piw a warn an re a vydh genys a-wosa? 20An bys a wrowedh yn tewlder, ha'n re trigys ynno yw heb golow. 21Rag dha lagha yw leskys, ha ny woer denvyth an taklow re beu gwrys genes, po a vydh gwrys. 22Ytho mar kevis gras y'th wolok, dannvon an spyrys sans ynnov, ha my a skrif pup-tra a hwarva y'n bys a'n dalleth, a veu skrifys y'th lagha, may hallo tus trovya an hyns, ha may fewo an re a vynn bewa y'n dydhyow diwettha.’

23Ev a worthybis dhymm, ‘Ke ha kuntell an bobel ha leverel dhedha, na'th hwillons dewgens dydh. 24Mes ty, darbar dhis lies legh-skrifa, ha kemmer genes Sarea, Selemia, Ethanus hag Asiel, pymp a veu dyskys dhe skrifa uskis. 25Ena deus omma, ha my a enow lugarn a gonvedhes y'th kolonn, na vydh difeudhys bys pan vo gorfennys an pyth a dhallethsys y skrifa. 26Ha wosa gorfenna, dyllo rann a'n taklow yn apert, ha dyllo rann yn-dann gel dhe'n tus fur. A-vorow y'n eur ma ty a dhalleth skrifa.’

Diwettha Geryow Ezra dhe'n Bobel

27Ena my eth yn-rag, dell worhemmynnis dhymm, ha gelwel oll an bobel war-barth, ha leverel, 28‘Klew, A Ysrael, an geryow ma. 29Y'n dalleth agan tasow a veu alyons yn Ejyp, hag i a veu delivrys alena. 30I a dhegemmeras an lagha a vewnans; mes ny's gwithsons, ha hwi ynwedh war aga lergh re gammdremenas er hy fynn. 31An tir a veu res dhywgh avel eretons yn tir Sion, mes hwi ha'gas tasow a wrug sherewneth, ha ny withsowgh an fordhow a worhemmynnis an Ughella dhywgh. 32Ha rag y vos breusyas ewn, wosa termyn ev a gemmeras dhiworthowgh an pyth a rosa. 33Ha lemmyn yth esowgh hwi omma, hag yma agas breder yn agas mysk. 34Rakhenna mar kwithowgh rewl war agas brys ha dyskybla agas kolonn, hwi a vydh gwithys bew, ha wosa mernans hwi a gyv tregeredh. 35Rag an vreus a dheu wosa mernans, pan vydhyn dasvewys, hag ena henwyn an re ewn a vydh apert, ha gweythresow an debeles a vydh diskudhys. 36Mes na dhes denvyth dhymm lemmyn, na'm hwilas dew-ugens dydh.’

An Skryptor Skrifys Arta

37Ytho my a gemmeras an pymp gour, dell worhemmynnis dhymm, ha ni eth yn-mes dhe'n gwel ha gortos ena. 38Ha ternos, otta lev a'm gelwis ow leverel, ‘Ezra, igor dha anow hag yv an pyth a rov dhis dh'y eva.’ 39Ytho my a igoras ow ganow, hag otta hanaf leun a veu ystynnys dhymm; leun o a neppyth avel dowr, mes y liw o avel liw tan. 40My a'n kemmeras hag eva, ha kettell evis, ow holonn a dhiveris konvedhes, ha furneth a gressyas y'm bronn, rag yth esa ow spyrys ow perthi kov anodho, 41ha'm ganow a veu igerys ha ny veu deges na fella.

42Mes an Ughella a ros konvedhes dhe'n pymp gour, hag onan wosa y gila i a skrifas an taklow a veu leverys, gans lytherennow na wodhvons. I a esedhas dew-ugens dydh, ow skrifa der an jydh, 43hag ow dybri bara y'n nos. Mes yth esen vy ow kewsel dydhweyth, ha ny dewis nosweyth. 44Ytho y'n dew-ugens dydh y feu skrifys peswardhek lyver ha peswar-ugens.

45Pan veu an dew-ugens dydh kowlwrys, an Ughella a gewsis, ow leverel, ‘Dyllo yn apert an kynsa lyvrow a skrifsys, ha gas keffrys dhe'n re wiw ha'n re anwiw aga lenna; 46mes gwith an deg ha tri-ugens diwettha dhe vos res dhe'n re fur a'n bobel. 47Rag ynna i yma gover a gonvedhes, hag avon a skians.’ 48Hag yndella y hwrugavy.