1Kows yn skovornow ow fobel an geryow a brofoesans a worrav yn dha anow, yn-medh an Arloedh, 2ha gul dhedha bos skrifys war baper; rag yth yns i lel ha gwir. 3Na borth own a'n brasow er dha bynn, ha na vydh troblys gans diskryjyans an re a gews er dha bynn. 4Rag pubonan na grys a verow yn y diskryjyans.

5Otta, yn-medh an Arloedh, my a dhre drogow war oll an norvys, kledha ha divoetter ha mernans ha terroes, 6rag sherewneth re lesas der oll an nor, ha'ga drogoberow yw kowlwrys. 7Rakhenna, yn-medh an Arloedh, 8ny dawav na fella a-dro dh'aga sherewneth dhidhuw a wrons, na ny wrav vy aga godhav yn aga oberow anewn. Goes divlam ha gwiryon a gri dhymm, hag enevow an re ewn a gri heb hedhi. 9Yn sur my a dal dial warnedha, yn-medh an Arloedh, ha my a gemmer warnav vy begh oll an goes gwiryon. 10Otta ow fobel yw haval dhe flokk ledys dhe'n ladhva; ny wrav vy aga gasa dhe driga pella yn pow Ejyp, 11mes my a's dre yn-mes gans leuv grev ha bregh ystynnys, ha my a wysk Ejyp gans pla avel kyns, ha distrui oll y dir.

12Kynes Ejyp ha'y selyow, drefenn an pla a weskel hag a skorjya a wra Duw y dri warnodho. 13Kynes an diogyon a wonedh an dor rag bos aga has ow fyllel ha'ga gwydh ow pos distruys gans kleves losk ha keser, ha gans annawel euthyk. 14Go-i an bys ha'n re trigys ynno! 15Rag an kledha ha'ga distruyans a dheu nes, ha kenedhel a sev dhe werrya erbynn kenedhel, gans kledhedhyow yn aga diwla. 16Rag y fydh ankres yn mysk tus; i a hwila fetha an eyl y gila, hag yn aga nerth ny's teves revrons rag aga myghtern na rag an chyf a'ga gwer veur. 17Den a'n jevydh hwans dhe vos yn sita, mes ny yll, 18rag bos an sitys yn tervysk drefenn balghder; an chiow a vydh distruys, ha'n dus ow perthi own. 19Drefenn tanowder bara ha galar meur, ny'n jevydh den piteth rag y gentrevek, mes ev a omsett erbynn aga chiow gans an kledha, ha pylla aga fythow, drefenn an nown, ha galar meur.

20Otta my a elow war-barth oll myghternedh an nor dhe dreylya dhymm, yn-medh Duw, dhiworth an howldrevel ha'n dyghow ha'n est ha Lebanon; dhe dreylya ha dhe dhaskorr an taklow a rosons dhedha. 21Kepar dell wrons i dhe'm re dhewisys bys y'n jydh hedhyw, yndella y hwrav vy, hag attyli yn aga askra. Yndellma y lever an Arloedh Duw: 22Ny spar ow leuv dhyghow an beghadoryon ha ny hedh ow kledha dhiworth an re a skoell goes gwiryon war an dor. 23Yth a tan yn-mes a'y sorr, ha devorya selyow an nor, ha peghadoryon avel kala' leskys. 24Go-i na withsons ow gorhemmynnow, yn-medh an Arloedh. 25Ny wrav vy aga sparya. Ke dhe-ves, hwi vebyon negedhys! Na dhefolewgh ow sentri. 26Rag Duw a aswonn an re a begh er y bynn, ha rakhenna ev a's daskorr dhe'n mernans ha dhe ladhva. 27Rag lemmyn plagys re dheuth war an norvys, ha hwi a worta ynna; ny wra Duw agas delivra, rag hwi re beghas er y bynn.

Gwelesigeth a Vresel

28Otta gwelesigeth euthyk, owth omdhiskwedhes dhiworth an est! 29Kenedhlow dragones Arabia a dheu yn-mes yn charettow pals, hag a-dhia gynsa dydh aga herdh, aga thythyans a vydh klewys war an nor, may perth own pubonan a's klew. 30Ynwedh an Karmonysi a yn-mes a'n goeswik yn sorr bras avel badhes gwyls, hag i a jun yn batel er aga fynn, ha gans aga dyns i a wast rann a diredh an Assyrianys. 31Hag ena an dragones a dheu ha bos hwath kreffa, ow perthi kov a'ga genesigeth; ha mar treylyons ha kesunya yn omsettyans gans oll aga nerth erbynn an Karmonysi, 32ena an re ma a vydh gorrys yn deray, ha gwrys taw gansa aga nerth, ha treylya ha fia. 33Hag a diredh an Assyrianys eskar ow kontrewaytya a omsett er aga fynn, ha ladha onan anedha; hag y fydh own ha kren yn aga lu hag ansurneth yn mysk aga myghternedh.

Breus war Babylon

34Otta kommol dhiworth an howldrevel, ha dhiworth an kledh bys y'n dyghow! Aga semlans yw pur euthyk, leun a sorr hag annawel. 35I wysk an eyl erbynn y gila, ha diveri annawel bras war an dor, war-barth gans aga annawel aga honan; hag y fydh goes dhiworth an kledha bys yn torr margh 36ha mordhos den ha garr kowrvargh. 37Hag y fydh own ha kren meur war an nor; an re a wel an sorr na a's tevydh euth, ha kren a sett dalghenn ynna. 38Ena kommol annawel tewl a vydh drehevys dhiworth an dyghow, ha dhiworth an kledh, ha rann arall dhiworth an howlsedhes. 39Mes gwynsow dhiworth an howldrevel a vydh kreffa es an kommol a veu drehevys yn sorr, ha'ga distrui; ha'n annawel esa ow tistrui dre wyns an howldrevel a vydh chasys dhe'n dyghow ha'n howlsedhes. 40Kommol bras ha krev, leun a sorr hag annawel, a yskynn ha distrui oll an nor ha'n re trigys ynno, ha diveri annawel euthyk war bub tyller ughel hag ardhek, 41tan ha keser ha kledhedhyow nijys ha dowrow pals, may fydh oll an parkow hag oll an goverow lenwys gans lanwes an dowrow na. 42I a derr dhe'n dor sitys ha fosow, menydhyow ha breow, gwydh an koeswigow ha goera ha greun an prasow. 43I a dremen war gamm dhe Babylon ha'y howldhistrui. 44I a dheu bys dhedhi hag omsettya a-dro dhedhi; i a dhever warnedhi an annawel hag oll y sorr; ena an doust ha'n mog a yskynn bys yn nev, hag oll an re usi a-dro dhedhi a's kyn. 45Ha'n re yw gesys a vydh kethyon dhe'n re a's distru.

Breus war Asia

46Ha ty, Asia, kevrennek yn splannder Babylon ha'y glori, 47go-jy, druan! Rag ty re wrug dha honan haval dhedhi; ty re afinas dha vyrghes rag fornikasyon, dhe blesya dha garoryon ha dhe vostya ynna; i re beu hwansek pup-prys dhe wul fornikasyon genes. 48Ty a wrug war-lergh an hora hegas yn oll hy gweythresow ha'y dysmygyansow. Rakhenna Duw a lever: 49My a dhannvon drogow warnas, gwedhowses ha boghosogneth, divoetter ha kledha ha pla dhe dhistrui dha jiow, ow tri defolans ha mernans. 50Glori dha nerth a vydh desyghys avel bleujenn, pan dhrehav an toemmder a vydh dannvenys warnas. 51Ty a vydh gwann ha boghosek, plagys ha skorjys gans goliow, ma na yllydh na fella degemmeres dha garoryon grev. 52A vien vy mar avius er dha bynn, yn-medh an Arloedh, 53mar ny wrelles ladha ow re dhewisys pup-prys, ow lowenhe hag ow takya diwleuv, hag ow kewsel a-dro dh'aga mernans, ha ty medhow?

54Afin semlans dha fas! 55Yma gober hora y'th varrlenn; rakhenna ty a dhegemmer attal. 56Par dell wredh dhe'm re dhewisys, yn-medh an Arloedh, yndella re wrello Duw dhiso jy, ha'th taskorra yn drogow. 57Dha fleghes a verow a nown, ha ty a goedh der an kledha; dha sitys a vydh dileys, hag oll dha dus usi y'n gwel igor a goedh der an kledha. 58An re usi yn menydhyow a verow rag nown, ow dybri aga hig aga honan, hag owth eva aga goes aga honan, rag esow a vara ha syghes rag dowr. 59Ty a vydh truan dres tus erell, hag arta ty a dhegemmer drogow. 60Tremenysi ow mos dresti a wysk an sita hegas, ha dilea neb rann a'th tiredh hag a'th glori, pan dhehwelons dhiworth Babylonia. 61Ty a vydh terrys dhe'n dor gansa avel sowl, hag i a vydh avel tan ragos. 62I a'th tevor, ty ha'th sitys, dha diredh ha'th venydhyow; i a lesk oll dha goeswigow ha'th wydh ow toen frut. 63I a dheg dha fleghes dhe-ves avel kethwesyon, i a byll dha rychys ha distrui glori dha fas.