Kuhudhansow Erell

1Go-jy, Babylon hag Asia! Go-jy, Ejyp ha Syria! 2Omwrogysewgh gans yskar, ha blew gever, hag oelewgh rag agas fleghes, ha kynewgh ragdha; rag dha dhistruyans re dheuth nes. 3An kledha re beu dannvenys er agas pynn, ha piw a yll y dreylya dhe-ves? 4Tan re beu dannvenys er agas pynn, ha piw a yll y dhifeudhi? 5Terroesow re beu dannvenys er agas pynn, ha piw a yll aga chasya dhe-ves? 6A yllir chasya dhe-ves lew nownek y'n koes, po difeudhi tan y'n sowl wosa ev dhe dhalleth leski? 7A yllir treylya seth wosa hy bos tennys gans sether krev? 8An Arloedh Duw a dhannvon drogow, ha piw a yll aga chasya dhe-ves? 9Tan a yn-mes a'y sorr, ha piw eus neb a yll y dhifeudhi? 10Ev a wra lughesennow dhe lughesi, piw na berth own? Ev a vydh ow tarenna, ha piw na'n jevydh euth? 11An Arloedh a wodros, ha piw na vydh euthegys glan yn y lok? 12An dor ha'y selyow a gren, an mor yw shakys dhiworth y dhownderyow, ha'y donnow ha'ga fuskes yw troblys a-rag fas an Arloedh ha glori y nerth. 13Rag krev yw y leuv dhyghow a bleg an warak, ha lymm yw an sethow a wra ev aga thenna, ha wosa bos dannvenys dhe benn pella an norvys ny fyllons dhe dhrehedhes dh'aga amkan. 14Terroesow yw dannvenys mes, ha ny dhehwelons arta bys pan dhons dres oll an norvys. 15An tan re dhewis, ha ny vydh difeudhys bys pan gowllesk selyow an norvys. 16Kepar dell na dhehwel seth yw tennys gans sether krev, yn kettella ny dhehwel arta an terroesow yw dannvenys war an norvys. 17Go-vy, go-vy! Piw a'm delirv y'n dydhyow na?

Euth y'n Dydhyow Diwettha

18Dalleth govisyon, ha kynvann meur; dalleth divoetter, hag y fydh lies ow mos dhe goll; dalleth breselyow, ha'n potestas a berth own; dalleth drogow, ha tus a gren. Pandr'a wrons pan dheu an drogow?16:18 Pandr'a wrons pan dheu an drogow? War-lergh an Vulgat, yma an geryow ma yn dalleth gwers 19. 19Divoetter ha pla, govisyon hag angoes, yw dannvenys avel skorjys rag kessydhyans mab-den.16:19 Gwersow 19 bys wers 76 yw niverys 20 bys 77 y'n Vulgat. 20Mes spit dhe oll an taklow ma ny dreylyons dhiworth aga hammweythresow, na nevra ny berthons kov a'n skorjys. 21Boesow a vydh mar isel aga bris may fydh tus ow tybi kres dhe vos surhes ragdha; ena drogow a wra bleujyowa dres an nor – kledha, divoetter, ha deray meur. 22Lies a'n re usi trigys y'n nor a dhe goll dre dhivoetter; ha'n re gesys gans an divoetter a verow der an kledha. 23An re varow a vydh tewlys yn-mes avel kawgh, ha ny vydh denvyth dh'aga honfortya; rag an nor a vydh forsakys, ha'n sitys a vydh terrys dhe'n dor. 24Ny vydh denvyth gesys dhe wonedha an dor, na dhe worra has ynno. 25An gwydh a dheg frut, mes piw a'n kuntell? 26An grappys a vydh adhves, mes piw a's trett? 27Den a yeun dhe weles den arall, po hwath dhe glewes y lev. 28Rag deg a vydh gesys yn-mes a sita; ha dew yn-mes a'n park, an re a omgelas yn kelliow tew hag yn folsyow an karregi. 29Kepar hag yn lowarth a olewbrennyer, teyr po peder olewenn yw gesys war wydhenn; 30po kepar ha pan vydh gwinlann kuntellys, re a'n bagasow yw gesys gans an re a hwila gans rach der an winlann, 31yn kettella y'n dydhyow na tri po peswar a vydh gesys gans an re a hwila yn aga chiow gans an kledha. 32An dor a vydh forsakys, ha ny vydh y barkow erys, ha'y fordhow ha'y hynsyow a vydh gordevys gans spedhas, rag ny gerdh deves dredha. 33Gwyrghesow a gyn, rag nyns eus dhedha gwer bries; aga myrghes a gyn, rag nyns eus dhedha gweres. 34Aga gwer bries a vydh ledhys yn bresel, ha'ga gwer a dhe goll dre dhivoetter.

Pobel Duw a Ombareus rag an Diwedh

35Goslowewgh orth an taklow ma, ha'ga honvedhes, hwi gwesyon an Arloedh. 36Hemm yw ger an Arloedh; degemmer e, ha na dhiskrysewgh an pyth a wra an Arloedh y leverel. 37An terroesow a dheu nes, ha nyns yns delatys. 38Kepar dell wra benyn veghyek, y'n nawves mis pan dheu termyn hy gwelivos nes, kavoes paynys bras a-dro dh'y thorr dew po tri our kyns, mes pan dheu an flogh yn-mes a'n dorr, ny vydh delatys pols vyth, 39yn kettella ny vydh delatys an terroesow ow tos war an dor, ha'n bys a gyn, ha gloesow a'n dalghenn a bub tu.

40Klewewgh ow geryow, ow fobel; ombareusewgh rag batel, hag yn mysk an drogow bedhewgh avel alyons war an nor. 41Neb a werth, bedhes avello ev neb a fi; ha neb a bren, bedhes avello ev neb a gyll. 42Neb a genwerth, bedhes avello ev neb na wayn budh; hag ev neb a dhrehav chi, bedhes avel nebonan na vydh trigys ynno. 43Neb a has, bedhes avello ev neb na vys; neb a skether, bedhes avello ev neb na yll kuntell an grappys. 44An re a dhemmedh, bedhens avel an re na's tevydh fleghes; ha'n re na dhemmedh, bedhens avel an re yw gwedhow. 45Yndella an re a lavur, a lavur yn euver. 46Estrenyon a guntell aga frut, ha pylla aga substans, domhwel aga chiow, ha kemmeres aga mebyon avel kethyon; rag yn kethneth y tineythons aga fleghes. 47Nyns yw arghans an arghansoryon marnas preydh; dhe voy yth afinons aga sitys, aga chiow, ha'ga horfow aga honan, 48dhe voy y fydhav serrys orta drefenn aga feghosow, yn-medh an Arloedh. 49Kepar dell wra benyn pur wordhi ha mas kasa hora, 50yn kettella y hwra ewnder kasa sherewneth pan omafin, hag ev a's kuhudh fas orth fas pan dheu an pledyas dhe hwithra pub peghes war an nor.

Nerth ha Furneth Duw

51Rakhenna na vydh avelli hi na'y gweythresow. 52Rag otta, wosa pols byghan sherewneth a vydh degys dhe-ves dhiworth an norvys, ha gwirvreus a reyn warnan. 53Na leveres peghador na wrug ev pegha; rag Duw a lesk kolennow a dan war benn neb a lever, ‘Ny beghis a-rag Duw ha'y glori.’ 54Otta, Duw a aswonn oll oberow tus, aga dysmygyansow ha'ga frederow ha'ga holonnow.

55Ev a leveris, ‘Bedhes an nor’, hag y feu gwrys, ha ‘Bedhes an nev’, hag y feu gwrys. 56Orth y er an ster a veu fastys yn aga thylleryow, hag ev a woer niver an ster. 57Ev a hwither an islonk ha'y dresoryow; ev re vusuras an mor ha pyth eus ynno; 58ev re stroethas an mor yn mysk an dowrow; ha der y er ev re grogas an nor a-ugh an dowrow. 59Ev re lesas an nev avel fyrmament, ha'y fastya a-ugh an dowrow; 60ev re worras fentynyow dowrow y'n gwylvos, ha lynnyn war wartha an menydhyow, dhe dhannvon avonyow dhiworth an ughelderyow dhe dhowrhe an dor. 61Ev a wrug mab-den, ha gorra kolonn yn kres y gorf; ev a worras ynno spyrys ha bewnans ha konvedhes 62ha'n spyrys a Dhuw Ollgalloesek, neb a wrug pup-tra, hag a hwither taklow kudhys yn tylleryow kudhys. 63Yn sur ev a woer agas dysmygyansow ha'n pyth a brederowgh yn agas kolonnow.

Go-i an re a begh hag a vynn keles aga feghosow! 64An Arloedh a hwither gans rach oll aga oberow, hag a wra ges ahanowgh hwi oll. 65Hwi a vydh shamys pan dheu agas peghosow yn-mes a-rag tus, ha'gas drogoberow a sev avel agas kuhudhoryon y'n jydh na. 66Pandr'a wrewgh? po fatell yllowgh keles agas peghosow a-rag an Arloedh ha'y glori? 67Otta, Duw yw an breusyas; perthewgh own anodho. Gesewgh agas peghosow, hag ankevewgh agas drogoberow, ha na wrewgh aga hommyttya nevra namoy; yndella Duw a'gas hembronk yn-rag ha'gas delivra dhiworth pub anken.

Torment Pobel Duw

68Rag otta, sorr routh veur a dhew warnowgh, hag i a dhrayl dhe-ves re ahanowgh, hag i a wra dhywgh dybri boes sakrifiys dhe idolys. 69I a wra ges a'n re a assent dhe dhybri, hag a wra bismer anedha ha'ga dispresya, hag i a's trett yn-dann dreys. 70Rag yn lies tyller hag yn sitys ogas dhedha y fydh rebellyans bras erbynn an re a berth own a'n Arloedh. 71I a vydh avel muskogyon, ha ny sparyons denvyth, mes i a byll hag a dhistru an re a bes ow perthi own a'n Arloedh. 72Rag i a dhistru hag a byll aga substans, ha'ga chasya yn-mes a'ga chiow. 73Ena y fydh apert, y feu ow re dhewisys prevys, kepar dell yw owr prevys y'n tan.

Ambos a Dhelivrans gans Duw

74Goslowewgh, ow re dhewisys, yn-medh an Arloedh; dydhyow anken yw devedhys lemmyn, mes my a'gas delirv dhiworta. 75Na berthewgh own na dout, rag Duw yw agas kevarwoedher. 76Hwi neb a with ow gorhemmynnow ha'm ordenansow, yn-medh an Arloedh Duw, na wres agas peghosow agas beghya, na'gas drogoberow agas fetha. 77Go-i an re yw tegys gans aga feghosow, ha fethys gans aga drogoberow! Yth ons kepar ha park yw tegys gans prysk, ha'y droe'lergh yw gordevys gans spern, ma na yll denvyth tremena dredho;16:77 Gwersow 77 ha 78 war-barth yw niverys gwers 78 y'n Vulgat. 78deges yw, ha daskorrys dhe vos konsumys gans tan.