Breus Duw war Ysrael

1‘Yndellma y lever an Arloedh: My a dhros an bobel ma yn-mes a gethneth, ha ri dhedha ow gorhemmynnow dre ow gwesyon an brofoesi; ny vynnsons goslowes orta, mes i a wrug ow husulyow euver. 2An vamm a's dineythis a lever dhedha, “Ke, ow fleghes, rag gwedhwes ov vy ha forsakys. 3My a'gas magas gans lowena, mes gans galar ha tristyns my re'gas kollas, rag hwi re beghas a-rag an Arloedh Duw, ha gul an dra yw drog y'm golok. 4Mes lemmyn, pandr'a allav vy y wul ragowgh? Gwedhwes ov ha forsakys. Ke ow fleghes, ha pysewgh mersi dhiworth an Arloedh.” 5My a'th elow, a das,2:5 a das: Henn yw Ezra. yn test war-barth gans mamm an fleghes ma, rag ny vynnsons gwitha ow hevambos, 6may trylli warnedha deray, ha gul dh'aga mamm bos pyllys, ma na vo dhedha henedh. 7Bedhens skattrys yn mysk an kenedhlow, bedhes aga henwyn dileys dhiworth an norvys, rag i re dhespityas ow hevambos.

8‘Go-jy, Assyria, neb a gel ynnos an re anewn! A genedhel dhrog, porth kov a'n pyth a wrugavy dhe Sodom ha Gomorra, 9may krowedh aga thir yn-dann bellennow a byg ha graghellow a lusu. Yndellma y hwrav dhe'n re na woslowons orthiv, yn-medh an Arloedh Ollgalloesek.’

10Yndellma y lever an Arloedh dhe Ezra: ‘Lavar dhe'm pobel y rov dhedha gwlaskor Yerusalem, a vynnsen hy ri dhe Ysrael. 11Ha my a gemmer ragov aga glori, ha ri dhedha an trigvaow heb diwedh, a dharbarsen dhe Ysrael. 12An wydhenn a vewnans a re dhedha odour hweg, ha ny lavuryons, na ny vydhons skwith. 13Kewgh, ha hwi a dhegemmer; pysewgh may fo agas dydhyow boghes. An wlaskor yw parys ragowgh seulabrys. Bedhewgh hewoel. 14Gelwewgh, gelwewgh nev ha nor yn test, rag my re dhileas an drog ha kreatya da; rag my a vew, yn-medh an Arloedh.

Ynnians dhe Oberow Da

15‘A vamm, byrl dha fleghes, hembronk i yn-mes gans lowena dell wra an golomm; krevha aga threys, rag my re'th tewisas, yn-medh an Arloedh. 16Ha my a dhrehav an re varow arta dhiworth aga thylleryow, ha'ga hembronk yn-mes a'ga bedhow, rag my a aswonn ow hanow ynna. 17Na borth own, ty vamm fleghes, rag my re'th tewisas, yn-medh an Arloedh. 18My a dhannvon gweres dhis, ow gwesyon Ysay ha Yeremia. War-lergh aga husul my re sakras ha pareusi ragos dewdhek gwydhenn beghys gans frut divers, 19ha'n keth niver a fentynyow, ow tinewi leth ha mel, ha seyth menydh bras ha dhedha ros ha lili; dredha my a lenow dha fleghes a lowena.

20‘Gwith gwiryow an wedhwes, provi gwirvreus dhe'n flogh heb tas, ro dhe'n boghosek, defend an omdhivas, dillas an den noeth, 21gwith an re drogh ha gwann, na wra ges a dhen evredhek, defend an mans, ha gas dhe'n dall kavoes gwelesigeth kler ahanav. 22Gwith an den koth ha'n den yowynk saw a-ji dhe'th fosow; 23pan gevydh an re varow, gwra aga ynkleudhyas ha merk an bedh, ha my a re dhis an kynsa tyller y'm dasserghyans. 24Gorta ha bydh kosel, ow fobel, rag dha bowes a dheu.

25‘Mag dha fleghes, ty vammeth dha; krevha aga threys. 26Dha wesyon a res vy dhis – ny wra nagonan anedha mos dhe goll, rag my a's rekwir a-dhiworth dha niver. 27Na vydh prederus, rag pan dheu dydh an galar ha'n angoes, re erell a oel ha bos trist, mes ty a vydh lowen ha kavoes palster. 28An kenedhlow a berth avi orthis, mes ny yllons gul travyth er dha bynn, yn-medh an Arloedh. 29Ow diwleuv a'th kudh, ma na wello dha fleghes ifarn.

30‘Lowenha, a vamm, war-barth gans dha fleghes, rag my a'th telirv, yn-medh an Arloedh. 31Porth kov a'th fleghes a gosk, rag my a's dre yn-mes dhiworth kudhvaow an nor, ha diskwedhes tregeredh dhedha; rag tregeredhus ov, yn-medh an Arloedh Ollgalloesek. 32Byrl dha fleghes bys pan dhov ha diskwedhes tregeredh dhedha; rag ow fentynyow a fenn, ha ny fyll ow gras.’

Ezra war Venydh Horeb

33My, Ezra a dhegemmeras gorhemmynn dhiworth an Arloedh yn menydh Horeb, my dhe vos bys yn Ysrael. Mes pan dheuth vy dhedha i a'm skonyas, ha despitya gorhemmynn an Arloedh. 34Ytho my a lever dhywgh, hwi genedhlow a glew hag a gonvedh, ‘Gwaytyewgh agas Bugel. Ev a re dhywgh powes bys vykken; rag ogas yw ev neb a dheu yn diwedh an oesow. 35Bedhewgh parys rag pewas an wlaskor, rag golow heb hedhi a splann warnowgh bys vykken. 36Fiewgh dhiworth skeus an oes ma, degemmerewgh lowena agas glori; my a elow ow Selwyas yn test. 37Degemmerewgh an pyth kommendys dhywgh gans an Arloedh, ha bedhewgh lowen, ow ri gras dhodho ev, neb re'gas gelwis dhe'n gwlaskordhow nevek. 38Drehevewgh, sevewgh yn-bann ha gwelewgh y niver an re a veu selys yn gwledh an Arloedh. 39An re a dhibarthas dhiworth skeus an oes ma re dhegemmeras dillas gloryus dhiworth an Arloedh. 40Kemmer dha niver, a Sion, ha dege a-bervedh dha dus yw dillasys yn gwynn, a gollenwis lagha an Arloedh. 41Niver dha fleghes a yeunsys war aga lergh, yw kollenwys; pys galloes an Arloedh may fo dha bobel sanshes, neb a veu gelwys a-dhiworth an dalleth.’

Ezra a Wel Mab Duw

42My, Ezra, a welas yn menydh Sion routh vras na yllis hy nivera, hag yth esens i oll ow kormel an Arloedh gans kanow. 43Yn aga mysk yth esa den yowynk, a ughelder bras, ughella agessa i oll, ha war an penn a bubonan anedha ev a worras kurun. Mes my a veu synsys gans an merkyl. 44Ena my a wovynnas orth an el, ‘Piw yw an re ma, arloedh?’ 45Ev a worthybis dhymm, ‘Yth yns i an re a dhiwiskas dillas marwel, ha gwiska dillas anvarwel, owth avowa hanow Duw. Lemmyn yth esons ow pos kurunys, hag i a dhegemmer palmow.’ 46Ena yn-medhav dhe'n el, ‘Piw yw an den yowynk na, neb usi ow korra kurunyow warnedha, hag ow ri palmow yn aga diwleuv?’ 47Ev a worthybis dhymm, ‘Ev yw Mab Duw, neb a aswonnsons y'n bys.’ Ytho my a dhallathas aga gormel, rag i dhe sevel mar golonnek a-barth hanow an Arloedh. 48Ena yn-medh an el dhymm, ‘Ke, ha derivas dhe'm pobel ass yw bras ha lies marthusyon an Arloedh Duw re welsys.’