Finwethow Brys Mab-den

1Ena an el neb re bia dannvenys dhymm, Uriel y hanow, a worthybis dhymm, 2‘Dha golonn re fyllis yn tien konvedhes an bys ma, ytho fatell yllydh konvedhes an Ughella?’ 3Yn-medhav, ‘Gallav, ow arloedh’. Ev a worthybis dhymm, ‘My re beu dannvenys dhe dhiskwedhes dhis teyr fordh, ha dhe worra tri hudynn a-ragos. 4Mar kyllydh digelmi onan anedha ragov, my a dhiskwedh dhis an fordh a vynnydh hy gweles, ha my a dhysk dhis prag yth yw an golonn drog.’ 5Yn-medhav, ‘Kows, ow arloedh.’ Yn-medh ev dhymm, ‘Ke, poes ragov an poes a dan, po musur ragov hwyth an gwyns, po daskalw ragov an jydh yw passys.’

6My a worthybis, ‘Eus den genys a yll gul hemma, ty dhe wovynn orthiv an taklow ma?’ 7Yn-medh ev dhymm, ‘Mar kwrellen govynn orthis, “Pygemmys trigva eus yn kres an mor, po pygemmys gover eus yn dallethva an islonk, po pygemmys gover eus a-ugh an fyrmament, po py yw an fordhow yn-mes a baradhis?” 8martesen ty a lavarsa dhymm, “Ny dhiyskynnis vy bythkweth y'n islonk, na bys lemmyn yn ifarn, na nyns yth vy yn-bann y'n nevow.” 9Mes lemmyn ny wrugavy govynn orthis marnas a-dro dhe dan ha gwyns ha'n jydh a dremensys dredha, ha taklow na yllydh bos diberthys dhiworta, ha ny yllydh gorthybi dhymm a-dro dhedha.’ 10Ynwedh yn-medh ev dhymm, ‘Ny yllydh konvedhes an taklow usi dhis, may teuthys dhe oes gansa; 11fatell yll dha ympynnyon ytho konvedhes fordh an Ughella? Ha fatell yll den skwithys gans an bys legrys konvedhes anlegryster?’ Pan glewis hemma, my a goedhas war ow fas 12ha leverel dhodho, ‘Gwell via, na ven ni omma, ages dos omma ha bewa yn ansansoleth, ha godhav heb godhvos prag.’

Parabolenn an Goeswik ha'n Mor

13Ev a worthybis dhymm, ‘My eth yn-rag dhe goeswik a wydh an plen, hag yth esens ow tewlel towl, 14hag yn-medhons, “Dewgh, gwren ni gwerrya erbynn an mor, rag mayth omdenn a-ragon, ha may hyllyn gul ragon moy koeswigow.” 15Y'n keth vaner an mordonnow ynwedh a dewlis towl, hag yn-medhons, “Dewgh, ha gwren ni mos yn-bann ha fetha koeswik an plen, rag may kyffyn ragon moy tiredh.” 16Mes towl an goeswik a veu euver, rag tan a dheuth ha'y honsumya. 17Y'n keth vaner euver veu towl an mordonnow, rag an tewes a sevis fast ha'ga lettya. 18Ytho mar pes jy breusyas yntredha, pyneyl anedha a omgemmerses y dhampnya?’

19My a worthybis, ‘Pubonan anedha re wrug towl gokki, rag an dor re beu res dhe'n goeswik, ha tyller an mor re beu res dhodho dhe dhoen y vordonnow.’

20Ev a worthybis dhymm ha leverel, ‘Ewn re vreussys, mes prag na vreussys yndella ragos jy dha honan? 21Rag par dell veu an dor res dhe'n goeswik, ha'n mor dh'y vordonnow, yn kettella ny yll an re trigys war an nor konvedhes travyth marnas an dra usi war an nor, hag ev neb usi a-ugh an nevow a yll konvedhes an dra usi a-ugh ughelder an nevow.’

Pup-tra a Vydh Kler y'n Oes Nowydh

22Ena my a worthybis, ‘My a'th pys, arloedh, prag y feu res dhymm an galloes a gonvedhes? 23Rag ny vynnis govynn a-dro dhe'n fordhow a-ugh, mes a-dro dhe'n taklow a dremen dreson pub dydh: an reson Ysrael dhe vos res avel despit dhe'n kenedhlow; an reson an bobel a gersys dhe vos res dhe loethow didhuw, ha'gan taklow dres dhe dhiswrians, ha'n kevambosow skrifys devedhys dhe dravyth? 24Ni a dremen dhiworth an bys avel lokustes, ha'gan bewnans yw kepar ha niwl, ha nyns on ni wordhi dhe gavoes mersi. 25Pandr'a wra ev ytho rag y hanow, mayth on ni gelwys ganso? Yth yw a-dro dhe'n taklow ma y hwovynnis vy.’

26Ev a worthybis dhymm ha leverel, ‘Mar pydh bew, ty a wel, ha mar pewydh termyn hir ty a' fydh marth lieskweyth, rag yma an oes ow fistena yn uskis dh'y dhiwedh. 27Ny yll ev dri an taklow a veu ambosys dhe'n re ewnhynsek y'n prysyow ordenys, rag an bys yw leun a dristyns ha gwannderyow. 28Rag an drog a wovynnsys dhymm a-dro dhodho re beu hesys, mes ny dheuth an drevas anodho na hwath. 29Ytho mar ny vydh mysys an dra a veu hesys, ha mar ny dremen dhe-ves an tyller may feu droktra hesys, ny dheu an park may feu dader hesys. 30Rag greunenn a dhrog has a veu hesys yn kolonn Adam a'n dalleth, ha pygemmys sherewynsi re wrug hi seulabrys – hag y fydh ow tineythi bys pan dheu termyn an drushya! 31Mes preder ragos dha honan pygemmys frut a sherewynsi re beu dineythys gans greunenn a dhrog has. 32Pan vydh treghys pennow diniver an ys, assa vydh bras an leur-drushya a lenwons!’

P'eur Fydh an Oes Nowydh ow Tos?

33Ena my a worthybis, ‘Fatell vydh an taklow ma, ha p'eur? Prag yth yw agan dydhyow boghes ha drog?’ 34Ev a worthybis dhymm, ow leverel, ‘Na fisten moy ages dell wra an Ughella, rag ty a fisten ragos jy dha honan, mes an Ughella a fisten rag lies. 35A ny wovynnas enevow an re gwiryon a-dro dhe'n taklow ma yn aga chambouryow, ow leverel, “Pes termyn y hwortyn ni omma? P'eur teu frut leur-drushya agan pewas?” 36An arghel Yeremiel a worthybis a-dro dhe'n taklow ma, “Pan vydh niver an dus avelowgh kowlwrys; rag ev re boesas an bys y'n vantol, 37ha musura an termynyow gans musur, ha nivera an termynyow gans niver; ha ny wra ev aga remova na gul dhedha difuna, kyns bos an musur na kollenwys.” ’

38Ena my a worthybis, ‘Mes, arloedh ow mester, ni oll yw leun a sherewynsi. 39Martesen ni yw dhe vlamya, y feu termyn an drushya delatys rag an re wiryon, drefenn peghosow trigoryon an norvys.’ 40Ev a worthybis, dhymm, ‘Ke, ha govynn orth benyn gans flogh, wosa hi dhe kollenwel hy naw mis, mar kyll hy thorr gwitha an flogh a-bervedh ynni pella?’ 41Yn-medhav, ‘Ny yll.’ Yn-medh ev dhymm, ‘Yn ifarn, chambouryow an enevow yw haval dhe'n dorr. 42Rag kepar dell fisten benyn yn gwelivos dhe skapya gloesow dineythyans, yndella an tylleryow ma a fisten dhe dhaskorra an taklow a veu res yn aga charj a'n dalleth. 43Ena y fydh diskwedhys dhis an taklow a vynnydh aga gweles.’

Pygemmys Termyn Eus Gesys

44My a worthybis, ‘Mar kevis gras y'th wolok, ha mar kyll bos, ha mars ov vy gwiw, 45diskwedh hemma dhymm ynwedh: mars eus moy termyn hwath dhe dhos es dell eus passys, po mar tremenas an brassa rann dreson. 46My a woer an pyth yw passys, mes ny wonn pandr'a vydh y'n termyn a dheu.’ 47Yn-medh ev dhymm, ‘Sav a'n barth dhyghow dhymm, ha my a dhiskwedh dhis styryans an barabolenn.’

48Ytho my a sevis ha gweles, hag otta fornes ow flammya a dremenas a-ragov; ha wosa an flamm dhe dremena, my a viras, hag otta an mog a veu hwath gesys ena. 49Wosa henna, kommolenn leun a dhowr a dremenas a-ragov hag a dhiveris glaw bras ha krev; ha wosa an glaw krev dhe dremena, an glawennow a veu hwath gesys ena. 50Yn-medh ev dhymm, ‘Bydh avisys ragos dha honan; rag par dell yw an glaw brassa es an glawennow, ha'n tan yw brassa es an mog, yndella an myns a dremenas a veu brassa yn feur; mes glawennow ha mog a veu gesys hwath.’

51Ena my a bysis ha leverel, ‘A dybydh my dhe vewa bys y'n dydhyow na? Po piw a vydh bew y'n dydhyow na?’ 52Ev a worthybis dhymm, ‘A-dro dhe'n toknys a wovynnsys orthiv anedha, my a yll kewsel dhis yn rann; mes ny veuv dannvenys dhe gewsel dhis a-dro dhe'th vewnans, rag ny wonn.