1Yn-medh ev dhymm, ‘Y'n dalleth a gylgh an norvys, kyns bos porthow an bys settys yn-bann, ha kyns an gwynsow dhe omguntell ha hwytha, 2ha kyns grommyans an taran dhe seni, ha kyns lughesennow dhe splanna, ha kyns bos selyow paradhis fastys, 3ha kyns bos gwelys an bleujennow teg, ha kyns bos kuntellys war-barth an luyow diniver a eledh, 4ha kyns bos drehevys yn-bann ughelderyow an ayr, ha kyns bos musuryow an fyrmament henwys, ha kyns bos skavell-droes Sion fastys, 5ha kyns an blydhynyow a-lemmyn devisys, ha kyns bos difennys dysmygyansow peghadoryon an oes ma, ha kyns bos sel gorrys war an re a with fydh avel tresor dhedha aga honan – 6ena my a brederis, ha'n taklow ma a veu gwrys dredhov vy ow honan a-der dre arall; kepar dell vydh an diwedh dredhov vy a-der dre arall.’

Rannans an Termynyow

7My a worthybis, ‘Pandr'a vydh rannans an termynyow? po p'eur fydh diwedh an kynsa oes, po dalleth an oes a siw?’ 8Yn-medh ev dhymm, ‘A-dhia Abraham bys Ysak; drefenn dhiworto y feu genys Yakob hag Esaw, rag leuv Yakob a synsi seudhel Esaw a'n dalleth. 9Lemmyn Esaw yw diwedh an oes ma, ha Yakob yw dalleth an oes a siw. 10Diwedh den yw an seudhel, ha dalleth den yw an leuv; ynter an seudhel ha'n leuv na hwila travyth arall, Ezra!’

Toknys an Diwedh

11My a worthybis, ‘Arloedh ow mester, mar kevis vy gras y'th wolok, 12diskwedh dhe'th was diwedh dha doknys may tiskwedhsys dhymm rann anedha nyhewer.’ 13Ev a worthybis, ‘Sav yn-bann war dha dreys, ha ty a glew lev ughel ow tasseni. 14Ha mar pydh kryghyllys an tyller may sevydh 15ha'n lev ow kewsel, na borth own; rag an lev yw a-dro dhe'n diwedh, ha selyow an bys a gonvedh 16an kows dhe vos a-dro dhedha aga honan. I a gren hag a vydh kryghyllys, rag i a woer y koedh dh'aga diwedh bos chanjys.’

17Pan glewis vy hemma, my a sevis yn-bann war ow threys ha goslowes, hag otta, yth esa lev ow kewsel, ha'y son a veu avel an son a dhowrow meur. 18Y leveris, ‘Otta, an dydhyow a dheu, pan dhallathav dos nes dhe visitya trigoryon an nor, 19pan hwilav dhiworth an dhrogoberoryon kessydhyans aga drogober, pan vydh uvelheans Sion kewerys, 20ha pan vydh sel gorrys war an oes usi ow tremena, ena my a dhiskwedh an toknys ma: an lyvrow a vydh igerys a-rag an fyrmament, ha peub oll a'n gwel y'n keth prys. 21Fleghes unn bloedh a gews gans aga lev, ha benynes gans flogh a dhineyth fleghes a-varr, y'n tressa po an peswora mis, ha'n re ma a vew ha terlemmel. 22Dison tylleryow a veu hesys a omdhiskwedh kepar ha na vons hesys, ha dison skiberyow leun a vydh kevys gwag; 23an hirgorn a sen, ha pan wra peub oll y glewes dison i a vydh dyegrys. 24Y'n eur na, y hwra kowetha gwerrya erbynn kowetha avel eskerens, ha'n nor ha'y drigoryon a vydh dyegrys, ha dowrhynsyow an fentynyow a sev, ma na dewragons yn tri our.

25‘Piwpynag a vo gesys dhiworth oll an taklow a dharganis dhis a vydh selwys, hag ev a wel ow selwyans ha diwedh ow bys. 26Hag i a wel an dus kemmerys, an re na dastyas mernans a-dhia aga genesigeth; ha kolonn an drigoryon a vydh chanjys, ha treylys yn brys arall. 27Rag droktra a vydh dileys, ha toell a vydh difeudhys; 28fydh a florysh, ha legras a vydh fethys, ha'n gwir, re beu seuladhydh heb frut, a vydh diskwedhys.’

Diwedh an Nessa Gwelesigeth

29Pan esa ow kewsel orthiv, otta, an tyller mayth esen vy ow sevel a dhallathas leska tamm ha tamm. 30Yn-medh ev dhymm, ‘My re dheuth dhe dhiskwedhes dhis an taklow ma an nos ma. 31Ytho mar pysydh arta ow penys, my a dhiskler dhis taklow brassa ages an re ma, 32rag dha lev re beu klewys a-rag an Ughella; an Galloesek re welas dha wiryonedh, hag ev re verkyas an chastita re withsys a-dhia dha yowynkneth. 33Rakhenna ev a'm dannvonas dhe dhiskwedhes dhis oll an taklow ma, ha dhe leverel dhis: “Trest, ha na borth own. 34Na fisten dhe brederi taklow euver a-dro dhe'n termynyow passys; ena ny fyskydh yn tibreder a-dro dhe'n termynyow diwettha.” ’

An Tressa Gwelesigeth

35Wosa hemma, my a oelas arta ha gul penys seyth dydh y'n keth vaner, dhe gewera an teyr seythun a veu leverys dhymm. 36Ena y'n ethves nos ow holonn o troblys ynnov arta, ha my a dhallathas kewsel yn golok an Ughella. 37Pur yntanus o ow spyrys, ha duwenik o ow enev.

Ober Duw yn Kreasyon

38Yn-medhav, ‘Arloedh, ty a leveris yn dalleth an kreasyon, y'n kynsa dydh, “Bedhes nev ha nor”, ha'th er a gowlwrug an ober. 39Ena yth esa an spyrys ow nija, hag yth esa tewolgow ha taw oll a-dro; nyns esa son lev mab-den hwath ena. 40Ena ty a erghis may fe dewynn a wolewder dres yn-mes a'th tresorvaow, may fe gwelys dha oberow. 41Arta, y'n nessa dydh ty a greatyas spyrys an fyrmament hag erghi dhodho may fe rynnys, ha gul dibarth ynter an dowrow, mayth ella unn rann yn-bann, ha'n rann arall triga a-woeles. 42Y'n tressa dydh ty a erghis may fe an dowrow kuntellys war-barth yn seythves rann an nor; hwegh rann ty a syghas ha'ga gwitha, may fe rann anedha plynsys ha gonedhys, ha bos servabyl a-ragos. 43Rag dha er eth yn-mes, ha'n ober a veu gwrys hware. 44A-dhesempis lanwes frut diniver a dheuth yn-mes, ha taklow sawrek a bub sort, ha bleujennow a liw heb par, hag odours marthys hweg. An re ma a veu gwrys y'n tressa dydh. 45Y'n peswora dydh ty a erghis may fe gwrys splannder an howl, golow an loer, ha'n ster yn aga aray; 46ha ty a erghis dhedha servya mab-den a vynnsys y greatya. 47Y'n pympes dydh ty a leveris dhe'n seythves rann, may fia an dowr kuntelles war-barth, dhe dhri yn-mes kreaturs bew, ydhyn ha puskes; hag yndella y feu gwrys. 48An dowr avlavar ha divew a dhros yn-mes kreaturs bew, dell o erghys dhodho, may tisklerrya oll an kenedhlow dha oberow marthys. 49Ena ty a withas dew groadur: onan anedha ty a henwis Behemoth ha'n nessa Leviathan. 50Ty a dhibarthas an eyl dhiworth y gila, rag ny ylli an seythves rann, may feu an dowr kuntellys ynni, synsi aga dew. 51Ha ty a ros dhe Behemoth onan a'n rannow a via syghys y'n tressa dydh, dhe driga ynni, ple'ma mil venydh; 52mes dhe Leviathan ty a ros an seythves rann, an rann lyb. Ha ty re's gwithas dhe vos dybrys gans piwpynag a vynni, ha peskweyth y fynni. 53Y'n hweghves dydh ty a erghis dhe'n dor dhe dhri yn-mes a-ragos chatel, bestes gwyls ha pryves; 54ha dres an re ma ty a worras Adam, avel rewler war bup-tra a wrussys; ha dhiworto ni oll re dheuth, an bobel a dhewissys.

Prag y Kodhev Pobel Duw?

55‘My re gewsis oll hemma, Arloedh, rag ty a leveris y feu ragon ni y hwrussys an bys. 56Mes ty a leveris nag yw travyth an kenedhlow erell genys a Adam, mes avel trew ons, ha ty re hevelebis aga flenteth dhe dhryppenn dhiworth kelorn. 57Ha lemmyn, Arloedh, otta, an kenedhlow ma, reknys avel travyth, a'gan rewl ha'gan devorya. 58Mes ni dha bobel, a elwsys dha gynsa-genys, dha unn-dhineythys, an moyha diwysyk ragos, ha'n moyha kerys, re beu res yn aga diwla. 59Mar peu an bys kreatys ragon ni, prag na bewon agan bys avel eretons? Pygemmys prys y fydh yndella?’