An Gorthyp dhe Wovynnow Ezra

1Pan worfennis vy kewsel an geryow ma, y feu dannvenys dhymm an el re bia dannvenys dhymm an nosow kyns. 2Yn-medh ev dhymm, ‘Sav yn-bann, Ezra, ha klew an geryow may teuth vy dh'aga leverel dhis.’

3Yn-medhav, ‘Kows, ow arloedh.’ Yn-medh ev dhymm, ‘Yma mor settys yn tyller efan, may fo down ha heb musur, 4mes yma dhodho entrans settys yn tyller ynn, may fo kepar hag avon. 5Mar mynn nebonan mos a-ji dhe'n mor rag y weles po rag gul maystri warnodho, fatell yll dos dhe'n rann efan marnas ev a dremen an rann ynn? 6Neppyth arall: Yma sita drehevys ha settys yn plen, leun a bup-tra dha; 7mes an entrans a-ji dhodho yw ynn ha settys yn tyller klegerek, gans tan a'n barth dhyghow ha dowr down a'n barth kledh; 8ha nyns eus marnas unn troe'lergh settys yntredha, henn yw ynter an tan ha'n dowr, ha ny yll moy es unn den kerdhes war an troe'lergh. 9Ytho mars yw an sita res dhe dhen avel eretons, mar ny dremen an her an peryll settys a-ragdho, fatell yll ev degemmeres y eretons?’

10Yn-medhav, ‘Yndella yth yw, arloedh.’ Yn-medh ev dhymm, ‘Yndella ynwedh yw rann Ysrael. 11Ragdha i y hwrug vy an bys, ha pan gammdremenas Adam erbynn ow ordenansow an pyth a via kreatys a dheuth yn-dann vreus. 12Ytho an entransow dhe'n bys ma a veu gwrys ynn, ahwerek ha lavurus; boghes ha drog yns i, leun a beryllow ha beghys gans kaletteryow bras. 13Mes entransow an bys efanna yw ledan ha saw, hag i a askorr an frut a anvarwoleth. 14Rakhenna, marnas an re vew a dremen der an taklow ynn hag euver ma, ny yllons degemmeres an taklow yw gwithys ragdha. 15Lemmyn ytho prag yth osta yn ankres, ha ty den podradow? Ha prag yth osta movys, ha ty marwel? 16Prag na dreylsys dha vrys dhe'n taklow a dheu, kyns es dhe'n taklow a-lemmyn?’

Tenkys an Re Dhidhuw

17Ena my a worthybis, ‘Arloedh ow mester, ty re ordenas y'th lagha y hwra an re wiryon erita an taklow ma, mes an re dhidhuw a dhe goll. 18An re wiryon a yll godhav taklow ynn, yn govenek a daklow efan; mes an re a wrug sherewynsi re wodhevis taklow ynn, ha ny welons taklow efan.’

19Yn-medh ev dhymm, ‘Nyns osta gwell breusyas es Duw, na moy skiansek es an Ughella. 20Res ello dhe goll lies yw bew lemmyn, kyns es dell vo lagha Duw dispresys, a veu settys a-ragdha. 21Rag an Arloedh a ros gorhemmynn tynn dhe'n re a dheuth y'n bys, pan dheuthons, pandra y koedhva dhedha gul may fewens, ha pandra y koedhva dhedha siwya dhe skapya kessydhyans. 22Mes ny vons gostydh dhodho, hag i a gewsis er y bynn;

i a dhevisyas ragdha aga honan prederow euver,

23ha profya dh'aga honan tebel dowlow;

moy es henna i a leveris nag eus an Ughella,

hag i a naghas aswonn y fordhow.

24I a skornyas y lagha

ha nagha y gevambosow;

ny's tevo fydh yn y ordenansow,

ha ny wrussons y oberow.

25‘Rakhenna, Ezra, yma taklow gwag dhe'n dus wag, ha taklow leun dhe'n dus leun. 26Otta, termyn a dheu pan vydh kewerys an toknys a dharganis dhis, pan omdhiskwedh an sita nag yw gwelys lemmyn, ha'n tir yw kudhys lemmyn a vydh diskudhys.7:26 pan omdhiskwedh an sita nag yw gwelys lemmyn, ha'n tir yw kudhys lemmyn a vydh diskudhys: Amendys. Vulgat pan omdhiskwedh an venyn bries, ha'n sita owth omdhiskwedhes, ha hi a vydh diskudhys neb yw lemmyn omdennys a'n nor. 27Seul a veu delivrys a'n drogow ragleverys a wel ow marthusyon. 28Rag ow mab an Messia7:28 an Messia: Amendys war-lergh an Syriek. Vulgat Iesus. a vydh diskwedhys gans an re yw ganso, ha'n re yw gesys a lowenha peswar kans blydhen. 29Wosa an blydhynyow na ow mab an Messia a verow, hag oll mayth eus ynna anall. 30Ena an bys a vydh treylys war-dhelergh seyth dydh dhe'n taw koth, par dell veu kyns y'n dalleth; yndella ny vydh nagonan gesys. 31Wosa seyth dydh an bys, nag yw hwath difun, a vydh gwrys difun, ha'n pyth yw podradow a vydh marow. 32An nor a dhaskorr an re usi ow koska ynno, ha'n doust an re usi trigys ynno yn taw; an chambouryow a dhaskorr an enevow kemmynnys dhedha. 33An Ughella a vydh diskudhys war an barr a vreus, ha truedh a dremen dhe-ves, ha perthyans a worfenn. 34Ny vydh gesys marnas breus, gwirder a sev, ha lelder a omgrevha. 35Attal a siw, ha'n pewas a vydh diskwedhys; oberow a ewnder a dhifun, ha ny gosk oberow anewn. 36Pytt an torment a omdhiskwedh, hag a-dal dhodho y fydh an bowesva; ha fornes Gehenna a vydh diskudhys, hag a-dal dhedhi an paradhis a lowena.7:36 Nyns usi an gwersow 36 bys 105 y'n Vulgat nag yn KJV. 37Ena an Ughella a lever dhe'n kenedhlow a veu drehevys dhiworth an re varow, “Mirewgh lemmyn, ha konvedhewgh piw re neghsowgh, piw na servsowgh, gorhemmynnow piw re wrussowgh aga dispresya. 38Mirewgh omma hag ena; omma yma lowena ha powes, mes ena tan ha torment.” Yndella y lever dhedha dydh breus, 39dydh nag eus ynno howl na loer na ster, 40heb na kommol na taran na lughes, heb na gwyns na dowr nag ayr, heb na tewlder na gorthugher na myttin, 41heb na hav na gwenton na toemmder, heb na gwav na rew na yeynder, heb na keser na glaw na gluth, 42heb na hanter-dydh na nos na bora, heb na dewynnyans na klerder na golow, heb travyth marnas splannder glori an Ughella, may fydh tus oll ow talleth gweles an taklow a veu destnys ragdha. 43Y fydh dhodho termyn kepar ha seythun a vlydhynyow. 44Hemm yw ow breus ha'y aray ordenys; saw unnsel dhiso jy y tiskwedhis vy an taklow ma.’

Boghes Tus a Vydh Selwys

45My a worthybis, ‘My a leveris ena, arloedh, ha my a lever lemmyn: gwynnvys an re yw bew lemmyn hag a with dha worhemmynnow. 46Mes fatell vydh an re may pysis vy ragdha? Rag piw eus yn mysk an re vew lemmyn neb na beghas, po piw eus yn mysk tus na gammdremenas erbynn dha gevambos? 47Ha lemmyn my a wel y fydh an bys a dheu ow tri lowena dhe voghes, mes torment dhe lies. 48Rag kolonn dhrog re devis ynnon, ha'gan pellhe ha'gan hembronk yn podredhes, ha re dhiskwedhas dhyn an hynsyow a gollva ha'gan pellhe dhiworth bewnans. Ny vydh henna rag tus voghes, mes ogasti rag peub a veu kreatys.’

49Ev a worthybis dhymm, ‘Goslow orthiv, Ezra, ha my a dhysk dhis, ha my a'th kuhudh arta. 50Rakhenna an Ughella re wrug dew vys, a-der onan. 51Ty re leveris nag yw an dus wiryon lies, mes boghes, ha tus dhidhuw dhe gressya; ytho klew an reson rakhemma. 52Mars eus dhis boghes meyn drudh, a vynnydh keworra dhedha plomm ha pri?’ 53Yn-medhav, ‘Arloedh, fatell yll henna bos?’ 54Yn-medh ev dhymm, ‘Moy es henna, govynn orth an nor hag ev a lever dhis; ombleg dhodho hag ev a'n diskler dhis. 55Lavar dhodho, “Yth esos ow kreatya or hag arghans ha brons, ynwedh horn ha plomm ha pri; 56mes yma moy a arghans ages a or, moy a vrons ages a arghans, moy a horn ages a vrons, moy a blomm ages a horn, ha moy a bri ages a blomm.” 57Breus ytho ha desiradow, an pyth yw pals po an pyth yw skant?’ 58Yn-medhav, ‘Arloedh mester, an pyth yw pals yw isella y bris, an pyth yw skant yw moy ker.’ 59Ev a worthybis, ‘Poes a-berth ynnos an pyth a bredersys, rag neb a'n jeves an pyth yw kales y gavoes a lowenha moy agesso ev neb a'n jeves an pyth yw pals. 60Yndella ynwedh y fydh an vreus ambosys genev; rag my a lowenha war an boghes tus a vydh selwys, drefenn i yth yw hag a wrug dhe'm glori gwarthevya lemmyn, ha dredha i re beu ow hanow enorys. 61Ny vydhav trist drefenn an routh neb eth dhe goll; rag avel niwl yns i lemmyn, ha haval dhe flamm ha mog, ow tewi hag ow leski; ha difeudhys yns.’

Kynvann Ezra, ha'n Gorthyp

62My a worthybis, ‘A dhor, pandr'a dhineythsys, mars yw an brys gwrys a dhoust avel pup-tra arall a veu kreatys? 63Rag gwell via, mar ny ve an doust y honan dineythys, ma na ve an brys gwrys anodho. 64Mes lemmyn an brys a dyv genen, ha rakhenna tormentys on, rag ni a dhe goll heb y wodhvos. 65Re wrello agh mab-den kyni, mes re lowenhaho bestes an gwel; re wrello peub oll re beu dineythys kyni, mes re lowenhaho an gwarthek ha'n flokkys. 66Rag gwell yn feur yw gansa i es dell yw genen ni; rag nyns esons i ow kwaytyas gwirvreus, ha ny wodhons a-dro dhe dorment na selwyans ambosys dhedha wosa mernans. 67Pana brow a vydh dhyn, ni dhe vos gwithys bew mes tormentys yn tynn? 68Rag tus oll a veu genys yw maglennys yn kammweythresow, ha leun a beghosow, ha beghys gans treuspassow. 69Martesen gwell via ragon mar ny ven ow tos dhe vreus wosa merwel.’

70Ev a worthybis dhymm, ‘Pan wrug an Ughella an bys hag Adam ha seul a dheuth dhiworto, yn kynsa ev a bareusis an vreus ha'n taklow kevrennys gans an vreus. 71Lemmyn ytho konvedh dhiworth dha eryow dha honan, rag ty a leveris y hwra an brys tevi genen. 72Ytho rakhenna, an re usi trigys y'n nor a vydh tormentys, rag i a wrug anewnder, kyn feu dhedha konvedhes; ha kyn tegemmersens an gorhemmynnow, ny's gwithsons; ha kyn kavsons an lagha, dislel vons dhe'n pyth a dhegemmersons. 73Ytho pandr'a yllons leverel y'n vreus, po fatell worthybons y'n termynyow diwettha? 74Pes termyn re beu perthyans dhe'n Ughella gans trigoryon an norvys – a-der ragdha i aga honan, mes drefenn an termynyow a ragordenas.’

Studh an Re Varow Kyns an Vreus

75My a worthybis, ‘Mar kevis gras y'th wolok, Arloedh, diskwedh hemma ynwedh dhe'th was: wosa merwel, kettell vydh pubonan oll wortiwedh ow taskorr an enev, a vydhyn gwithys yn powes bys pan dheu an termynyow na pan vydhydh ow talleth nowydhhe an kreasyon, po a vydhyn ni tormentys desempis?’ 76Ev a worthybis, ‘My a dhiskwedh henna dhis ynwedh, mes na wra kesunya dha honan gans an re a skorn, na na niver dha honan gans an re yw tormentys. 77Rag yma dhis tresor a oberow gwithys gans an Ughella, mes ny vydh diskwedhys dhis bys a'n termynyow diwettha. 78Lemmyn a-dro dhe vernans, an dyskans yw: Wosa an arghadow diwettha dhe dhos dhiworth an Ughella bos res nebonan dhe verwel, kettell a an spyrys yn-mes a'n korf ha dehweles dhodho ev neb a'n ros, kyns oll ev a re glori dhe'n Ughella. 79Mars yw ev onan a'n re a skornyas ha ny withas fordh an Ughella, ow tispresya y lagha hag ow kasa an re a berth own a Dhuw, 80ny wra spyrysyon a'n par ma mos y'n trigvaow, mes desempis i a wander a-dro yn torment, prest ow kyni ha trist, ha henna yn seyth fordh. 81An kynsa fordh, rag i dhe skornya lagha an Ughella. 82An nessa fordh, rag ny yllons lemmyn gul edrega da, may fewons. 83An tressa fordh, i a wel an pewas gwithys rag an re a drestyas kevambosow an Ughella. 84An peswora fordh, i a vydh ow prederi a'n torment gwithys ragdha y'n termynyow diwettha. 85An pympes fordh, i a wel fatell yw trigvaow an re erell gwithys gans eledh yn town down. 86An hweghves fordh, i a wel fatell vydh re anedha ow tremena bys yn torment. 87An seythves fordh, yw gweth es oll an fordhow ragleverys, rag i a deudh dhe-ves yn tien yn bismer, ha bos distruys gans sham, ha gwedhra gans own, ow kweles glori an Ughella, may peghsons yn y wolok pan ens i bew, ha may fydhons breusys yn y wolok y'n termynyow diwettha.

88‘Hemm yw aray seul a withas fordhow an Ughella, pan vydhons diberthys dhiworth aga lester podradow. 89Y'n termyn mayth ens i bew ynno, yth esens ow lavurya yn servis an Ughella, ha sevel orth peryll pub eur, may kwitthens lagha Riyas an lagha yn perfydh. 90Ytho hemm yw an dyskas a-dro dhedha: 91Yn kynsa i a wel gans lowena meur y glori ev neb a's degemmer, rag i a gyv powes yn seyth ordyr. 92An kynsa ordyr, rag i a strivyas gans lavur bras dhe dryghi an drokpreder a veu genesik ynna, ma na wrella aga ardhynya dhiworth bewnans bys yn ankow. 93An nessa ordyr, rag i a wel an ankombrynsi may hwra an re dhidhuw gwandra ynno, ha'n kessydhyans a wra aga gortos. 94An tressa ordyr, i a wel an dustuni a-dro dhedha degys ganso ev neb a's formyas, i dhe witha, der aga bewnans, an lagha a veu res dhedha avel trest. 95An peswora ordyr, i a gonvedh an powes usi dhedha, kuntellys yn aga chambouryow, ha gwithys yn taw down gans eledh, ha'n glori a wra aga gortos y'n termynyow diwettha. 96An pympes ordyr, i a lowenha rag i dhe dhiank lemmyn a'n pyth yw podradow, ha kavoes an eretons a dheu; hag ynwedh i a wel an tebel studh ha'n lavur may fons delivrys dhiworta, ha'n rydhses efan a vydhons ow tegemmeres, dhe lowenhe ynno bys vykken. 97An hweghves ordyr, pan yw diskwedhys dhedha fatell wra aga fasow splanna avel an howl, ha fatell vydhons gwrys avel golow an ster, anpodradow alena rag. 98An seythves ordyr, yw brassa es oll an re ragleverys, rag i a lowenha gans bolder, ha rag i a vydh kolonnek heb deray, hag i a vydh lowen heb own; rag i a fysk yn-rag dhe weles y fas ev neb a wrens y servya pan ens bew, ha dhiworth neb i a dhegemmer pewas pan vydhons glorifiys 99Hemm yw ordyr enevow an re ewn, dell yw dyllys alemma rag; ha'n taklow ragleverys yw fordhow a dorment a vydh godhevys alemma rag gans an re na woslowsons.’

100Ena my a worthybis, ‘Ytho a vydh termyn res dhe'n enevow, wosa i dhe vos diberthys dhiworth an korfow, dhe weles an taklow a gewssys dhymm anedha?’ 101Yn-medh ev dhymm, ‘Y fydh dhedha kummyas seyth dydh, may hallons gweles y'n seyth dydh na an taklow ragleverys; a'y wosa i a vydh kuntellys dh'aga thrigvaow.’

Nyns eus Pysi rag an re Dhidhuw

102My a worthybis, ‘Mar kevis gras y'th wolok, diskwedh dhymm ynwedh mar kyll an dus wiryon pledya rag an dhidhuw dydh breus, po pysi an Ughella ragdha, 103tasow rag mebyon po mebyon rag kerens, breder rag breder, eseli teylu rag neshevin, kothmans rag an re yw moyha kerys gansa.’ 104Ev a worthybis dhymm, ‘Rag ty dhe gavoes gras y'm golok, my a dhiskwedh hemma ynwedh dhis. Dydh breus yw dydh a ervirans hag a dhiskwedh dhe beub oll an sel a wirder. Dell ny wra tas dannvon y vab, na mab y das, na mester y was, na kothman y dhen an moyha kerys, dhe vos klav, po dhe goska, po dhe dhybri, po dhe vos yaghhes yn y le, 105yndella ny bys denvyth rag arall, na ny worr begh war arall; rag ena pubonan oll a dheg y wiryonedh ha'y anwiryonedh y honan.’

106My a worthybis, ‘Fatell gevyn ytho Abraham dhe bysi yn kynsa rag pobel Sodom, ha Moyses rag agan tasow a beghas y'n gwylvos,7:106 Gwersow 106 bys 140 yw niverys 36 bys 70 y'n Vulgat ha KJV. 107ha Yoshua a'y wosa rag Ysrael yn dydhyow Akan, 108ha Samuel yn dydhyow Sowl, ha Davydh rag an pla, ha Solomon rag an re a dheuth dhe'n sakrans, 109hag Elias rag an re a dhegemmeras an glaw, ha ragdho ev neb a veu marow, ma fewa, 110ha Hezekia rag an bobel yn dydhyow Sennagherib, ha lies arall a bysis rag lies? 111Ytho mar kylli an re wiryon pysi lemmyn rag an re dhidhuw, pan yw podredhes ynkressys hag anwiryonedh moghhes, prag na yll henna bos yndella ynwedh?’ 112Ev a worthybis, ‘Nyns yw an bys a-lemmyn an diwedh; ny drig an glori leun ynno; rakhenna an re grev a bysi rag an re wann. 113Dydh breus a vydh diwedh an oes ma ha dalleth an oes anvarwel a dheu, may fydh podredhes tremenys dhe-ves. 114Difyk klorder a dheu dhe dhiwedh, diskryjyans a vydh treghys dhe-ves, gwiryonedh a ynkress, ha gwirder a omdhiskwedh. 115Rakhenna ny yll denvyth kemmeres mersi anodho ev neb a veu dampnys y'n vreus, na pystiga nebonan yw budhek.’

Kynvann war Tenkys Brassa Rann an Dus

116My a worthybis, ‘Hemm yw ow hynsa ha diwettha lavar: gwell via mar ny wrussa an dor dineythi Adam, poken wosa y dhineythi, y lesta rag pegha. 117Rag pandr'a vydh an prow, pubonan dhe vewa yn tristyns lemmyn, ha wosa merwel gwaytyas kessydhyans? 118A Adam, pandr'a wrussys? Mar peghsys jy, ny veu an koedh ragos ty dha honan, mes ragon ni ynwedh dha dhiyskynnysi. 119Rag pandr'yw an prow dhyn ni, mars yw termyn heb diwedh ambosys dhyn, mes ni re wrug oberow a dhre mernans? 120Po gwlaskor heb diwedh dhe vos ambosys dhyn, mes ni yw gwrys euver yn tien? 121Po trigvaow saw ha yagh gwithys ragon, mes ni re omdhug yn trog? 122Po glori an Ughella dhe dhifres an re a omdhug yn onester, mes ni re gerdhas yn fordhow pur dhrog? 123Po paradhis dhe vos diskwedhys, may fydh y frut ow pesya heb podredhes, mayth eus ynno palster ha yaghheans, 124mes ny wren y entra, rag ni re vewas yn fordhow divlas? 125Po fasow an re a's tevo omvaystri dhe splanna moy es an ster, mes agan fasow a vydh moy du es an tewolgow? 126Rag hedre ven bew hag ow kul anewnder, ny bredersyn pandr'a vedhen ow perthi wosa mernans.’

127Ev a worthybis, ‘Hemm yw styr an kesstrif yw gwrys gans pub den genys y'n norvys: 128mars yw fethys ev a berth dell leversys jy, mes mars yw budhek ev a dhegemmer an pyth a leveris vy. 129Rag homm yw an fordh a gewsis Moyses anedhi, hag ev yn few, ow kewsel orth y bobel, “Dewis dhis bewnans, may fewydh.” 130Mes ny'n kryssons ev, na'n brofoesi war y lergh, na hwath my ow honan neb a gewsis dhedha. 131Ytho ny vydh tristyns yn aga distruyans, dell vydh lowena y'n re may fydh selwyans surhes ragdha.’

Ezra a Elow dhe Dhuw rag Mersi

132My a worthybis, ‘My a woer, arloedh, an Ughella dhe vos gwelys truedhek lemmyn, rag ev dhe gemmer truedh a'n re na dheuth hwath y'n bys; 133ha grassyes, rag ev dhe vos grassyes dhe'n re a dreyl dh'y lagha yn edrega; 134ha meur y berthyans, rag ev dhe dhiskwedhes perthyans dhe'n re a beghas, drefenn i dhe vos y ober y honan; 135ha hel, rag gwell ganso ri ages kemmeres dhe-ves; 136ha meur y druedh, rag ev dhe voghhe y druedhow moy ha moy dhe'n re yw bew ha dhe'n re re dremenas ha dhe'n re usi ow tos. 137Rag mar ny wrella aga moghhe, ny via bewnans dhe'n bys ha'y drigoryon. 138Ha riyas yw ev, rag mar ny rolla ev dhiworth y dhader, may fe an re a wrug anewnder bos difresys a'ga anewnderyow, ny allsa unn degves a vil a vab-den kavoes bewnans; 139ha breusyas, rag mar ny affa an re a veu kreatys der y er, ha dilea aga hammwriansow pals, 140ha martesen ny via gesys marnas pur voghes a'n routh dhiniver.’