1Ev a worthybis dhymm, ‘An Ughella a wrug an bys ma rag lies, mes rag boghes yw an bys a dheu. 2Mes my a lever dhis parabolenn, Ezra. Govynn orth an nor, hag ev a lever dhis ev dhe ri myns meur a bri, mayth yw lestri priweyth gwrys, mes boghes doust may teu owr dhiworto; yndella yw fordh an bys a-lemmyn. 3Lies re beu kreatys, mes ny vydh selwys marnas boghes.’

Ezra a Elow Mersi war Dhuw

4My a worthybis, ‘Rakhenna, ow enev, yv dha walgh a gonvedhes, ha devor furneth. 5Rag ny dheuthys y'n bys dhe'th vodh dha honan,8:5 Rag ny dheuthys y'n bys dhe'th vodh dha honan: Amendys war-lergh an Syriek. hag erbynn dha vodh ty a dhiberth, rag ny veu res dhis marnas termyn kott dhe vewa. 6A Arloedh a-ughon, gront dhe'th was may pyssyn a-ragos, ha ro dhyn has yn agan kolonn, ha gonisogeth yn agan konvedhes may fo frut anodho, may hallo pub den legrys kavoes bewnans. 7Rag nyns eus marnas ty dha honan, ha ni yw ober dha dhiwleuv, dell leversys.

8‘Ha rag ty dhe ri bewnans dhe'n korf yw gwrys lemmyn yn torr an vamm, ha keworra dhodho eseli, an pyth a greatsys yw gwithys saw yn tan ha dowr, ha naw mis an dorr a wodhev dha groadur formys ynni. 9Mes an pyth a with ha'n pyth yw gwithys aga dew yw gwithys gans dha with jy. Ha pan dhaskorr an dorr arta an pyth a veu formys ynni, 10ty re worhemmynnis may fo leth proviys dhiworth an eseli, henn yw dhiworth an dhiwvronn, frut an bronnow, 11may fo megys an pyth a veu formys rag termyn; ha wosa henna ty a'n syns y'th tregeredh. 12Ty re'n magas y'th ewnder, ha'y dhyski y'th lagha, ha'y geredhi y'th furneth. 13Ty a'n gorr dhe'n mernans avel dha greasyon, ha'y vewhe avel dha ober. 14Ytho mar tistruydh yn skav nebonan a formsys gans lavur mar vras, prag y feu kreatys?

15‘Ha lemmyn my a lever hemma: A-dro dhe vab-den oll, ty a woer an gwella; mes my a gews a'th pobel mayth ov vy grevys ragdha, 16hag a-dro dhe'th eretons may hwrav vy kyni ragdha, hag a-dro dhe Ysrael mayth ov vy trist ragdha, hag a-dro dhe has Yakob mayth ov vy troblys ragdha. 17Rakhenna my a bys a-ragos ragov vy ow honan ha ragdha i, rag my a wel fatell on ni koedhys, trigoryon an tir. 18Mes my re glewas y teu an vreus yn skon. 19Ytho klew ov lev, ha konvedh ow geryow, ha my a gews a-ragos.’

Ezra a Bys Mersi rag Peghadoryon

Dalleth geryow pysadow Ezra kyns ev dhe vos kemmerys yn-bann. 20‘A Arloedh, ty neb yw trigys bys vykken, ha'th tewlagas yw ughelhes hag yma dha jambouryow y'n ayr, 21ha'th tron yw dres musur ha'th glori dres konvedhes; y sev a-ragos ow krena luyow an eledh, 22hag orth dha worhemmynn treylys yns dhe wyns ha tan; sur yw dha er, fyrv yw dha lavarow, hag euthyk yw dha arghadow; 23dha wolok a sygh an downderyow ha'th sorr a wra dhe'n menydhyow teudhi dhe-ves, ha'th wirder yw fastys bys vykken: 24klew, Arloedh, pysadow dha was, ha gans dha dhiwskovarn degemmer gorholedh dha groadur; klew ow geryow. 25Rag hedre vewiv my a gews, ha hedre vo genev konvedhes my a worthyp. 26Na vir orth kammweythresow dha bobel, mes orth an re a'th serv yn lelder. 27Na vir orth attentys an re dhidhuw, mes orth an re a with dha dhustuniow gans dolor. 28Na breder a'n re a vewas yn trog a-ragos, mes porth kov a'n re a aswonnis own ahanas a'ga bodh. 29Na vynn distrui an re vewas avel an bestes, mes mir orth an re a dhyskas dha lagha yn splann. 30Na sorr gans an re yw breusys dhe vos gweth es bestes, mes kar an re a drestyas pup-prys y'th glori. 31Rag ni ha'gan tasow re siwyas hynsyow ankow, mes yth yw drefenn ni peghadoryon y fydhydh gelwys truedhek. 32Rag mar mynnsys kemmeres truedh ahanan, na'gan beus oberow gwirvreus, ena ty a vydh gelwys truedhek. 33An re ewn ytho, rag bos dhedha oberow pals gwithys genes, a dhegemmer pewas yn-mes a'ga oberow aga honan. 34Mes pyth yw mab-den may serrydh ganso, po agh podredhek rag ty dhe vos mar hwerow er y bynn? 35Rag yn gwir, nyns eus denvyth yn mysk an re a veu genys na omdhug yn tidhuw; hag yn mysk an re a veu yn few na gammwrug. 36Rag yn henna yth yw dha ewnder ha'th tader diskwedhys, pan os truedhek dhe'n re nag eus dhedha substans a oberow da.’

Duw a Lowenha yn Selwyans an Re Ewn

37Ev a worthybis dhymm, ‘Nebes taklow ty re worthybis yn ewn, ha herwydh dhe eryow yndella y fydh. 38Rag yn hwir ny wrav vri a'n re a beghas, na'ga mernans, na'ga breus, na'ga dampnasyon; 39mes my a lowenha war wrians an re wiryon, hag ynwedh war aga fergherinses, aga selwyans, ha'n pewas a dhegemmerons. 40Dell glewis vy ytho, yndella y fydh. 41Rag dell wra an tiek hasa meur a has war an tir ha plansa lies gwydhenn, mes ny dheu yn-bann yn y seson pup-tra a veu hesys, na ny wra pup-tra a veu plynsys gwreydhya; yndella ynwedh yth yw gans an re a veu hesys y'n bys: ny vydh pubonan anedha selwys.’

Mab-den yw Haval dhe Has

42My a worthybis, ‘Mar kevis gras, gas vy dhe gewsel. 43Dell yll has an tiek fyllel tevi, rag ny dhegemmeras glaw dhiworthis y'n seson, po mar pydh distruys gans re a law, pedri a wra. 44Mes mab-den, formys gans dha dhiwleuv, ha gelwys imaj ahanas, rag yth osta haval dhodho, may hwrussys pup-tra ragdho ev – a'n gwrussys haval dhe has tiek? 45Na sorr genen, mes kemmer truedh a'th pobel, rag truedhek os a'th kreasyon.’

Duw a Ambos Paradhis dhe Ezra ha Kessydhyans dhe'n Re Dhrog

46Ev a worthybis dhymm, ‘An taklow a-lemmyn yw rag an bobel a-lemmyn, ha taklow a dheu rag an termyn a dheu. 47Rag pell osta a alloes kara ow kreasyon moy es dell wrav vy y gara. Mes ty re hevelebis dha honan yn fenowgh dhe'n re gammhynsek; na wra yndella. 48Mes hwath yn hemma marthys os yn golok an Ughella, 49rag ty dhe omuvelhe, dell dhelledh ragos, ha ny omwrussys yn mysk an re wiryon. Ytho dhe voy y fydhydh glorifiys. 50Rag lies tra anfeus a vydh gwrys dhe'n re yw trigys y'n bys, rag i re gerdhas yn goeth meur. 51Mes ty preder ragos jy dha honan, ha hwila an glori gwithys rag an re avelos; 52ragowgh hwi yw paradhis igerys, an wydhenn a vewnans yw plynsys, an oes a dheu yw pareusys, palster yw proviys, sita yw drehevys, powes yw apoyntys, dader yw fastys ha furneth gwrys perfydh kyns. 53Gwreydhenn droktra yw kes dhiworthowgh gans sel, gwannder yw pellhes dhiworthowgh, hag ankow yw kudhys; ifarn re fias, ha podredhes yw ankevys. 54Dolors re dremenas dhe-ves, hag y'n diwedh tresor anvarwoleth yw diskwedhys. 55Rakhenna na wovynn pella a-dro dhe'n routh usi ow mos dhe goll. 56Rag i a gavas aga rydhses, mes i a dhispresyas an Ughella, ha skornya y lagha, hag i a forsakyas y fordhow. 57Hwath pella i re drettyas an re wiryon yn-dann dreys, 58ha leverel yn aga holonn nag eus Duw, kyn hwodhyens y ferwons 59Rag kepar dell y'gas worta hwi an taklow ragleverys, yndella syghes ha payn yw parys ragdha i. Rag ny vynnas an Ughella mab-den dhe vos distruys; 60mes an re a veu kreatys aga honan re dhefolas y hanow ev neb a'n gwrug, ha ny aswonnsons gras dhodho ev neb a bareusis bewnans ragdha lemmyn. 61Hemm yw prag y teu ow breus nes lemmyn; 62ny dhiskwedhis hemma dhe bubonan, marnas dhiso jy, ha nebes re avelos.’

Toknys an Termynyow Diwettha

Ena my a worthybis, 63‘Arloedh, ty re dhiskwedhas dhymm lemmyn meur a'n toknys a wredh y'n termynyow diwettha, mes ny dhiskwedhsys dhymm p'eur y's gwredh.’