Toknys an Diwedh

1Ev a worthybis dhymm, ‘Musur y'th vrys gans rach, ha pan welydh re a'n toknys ragleverys dhe dremena, 2ena ty a gonvedh henna dhe vos an keth termyn pan vydh an Ughella ow talleth visitya an bys a greatyas. 3Ytho pan omdhiskwedh y'n bys dorgrysyow, tervans poblow, brasow kenedhlow, hokyans ledyoryon, deray pennsevigyon, 4ena ty a gonvedh an re ma dhe vos an pyth a gewsis an Ughella anedha a-dhia'n dydhyow kyns, a-dhia'n dalleth. 5Kepar dell eus dhe bup-tra a veu gwrys y'n bys dalleth ha diwedh apert, 6yndella ynwedh yw termynyow an Ughella: an dallethow yw apert yn marthusyon hag oberow galloesek, ha'n diwedh yn gweythresow ha toknys.

7‘Pubonan neb a vydh selwys hag a yll skapya der y oberow y honan, po der an fydh may krysis ynni, 8a vydh gwithys saw dhiworth an peryllow ragleverys, hag ev a wel ow selwyans y'm tir hag a-ji dhe'm oryon, a wrugavy aga sanshe ragov ow honan a'n dalleth. 9Ena sowdhenys vydh an re a debeldhyghtyas ow fordhow, ha'n re a's skonyas gans bismer a drig yn tormentys. 10Rag myns na'm aswonnis yn aga bewnans, hag a dhegemmeras ow bennathow, 11ha myns a skornyas ow lagha pan esa rydhses hwath dhedha, 12ha ny's konvedhsons pan esa hwath dhedha chons a edrega, mes i a's dispresyas – wosa mernans, y koedh dhedha y aswonn gans torment. 13Na vydh hwansek ytho dhe wodhvos fatell vydh an re dhidhuw tormentys, mes govynn fatell vydh an re wiryon selwys; dhedha i yw an bys, ha ragdha i an bys a veu gwrys.’

14My a worthybis, 15‘Dell leveris vy kyns, ha leverel lemmyn, ha'y leverel a-wosa, yma moy ow mos dhe goll ages an re a vydh selwys, 16kepar dell yw tonn brassa ages dryppenn a dhowr.’

17Ev a worthybis, ‘Kepar dell yw an gwel, yndella ynwedh yw an has; ha kepar dell yw an bleujyow, yndella ynwedh yw an liwyow; ha kepar dell yw an lavur, yndella ynwedh yw an askorr; ha kepar dell yw an tiek, yndella ynwedh yw an leur-drushya. 18Kyns an bys dhe vos kreatys rag tus dhe vewa ynno, pan esen vy orth y bareusi rag an re trigys ynno lemmyn, ny gewsis denvyth er ow fynn, rag nyns esa denvyth yn few. 19Mes lemmyn an re kreatys y'n bys ma, spit dhe voes byth na fyll ha lagha na yll bos doutys, yw podredhek yn aga drog hynsyow. 20Ytho my a brederis a'm bys, hag otta, galsa dhe goll; ha'm norvys, hag otta, yth esa yn peryll drefenn drog dhevisyow an re a dhothya ynno. 21My a welas hemma, ha skant ny yllis sparya denvyth; mes my a withas ragov ow honan unn grappa yn-mes a vagas, hag unn plans yn-mes a goeswik vras. 22Ytho gas an routh dhe vos dhe goll neb a veu genys yn euver, mes gas dhe'm grappa bos gwithys, ha'm plans; rag gans lavur bras my a's gwrug perfydh.

23‘Byttegyns y koedh dhis gortos hwath seyth dydh moy. Na hepkorr boes ynna, 24mes ke yn park a vleujyow le na veu chi drehevys ynno, ha deber unnsel bleujyow an park; na wra tastya kig nag eva gwin, mes bleujyow heb ken, 25ha gwra pysadow heb hedhi dhe'n Ughella. Ena my a dheu ha kewsel genes.’

An Peswora Gwelesigeth: an Lagha a Bes

26Ytho my eth yn-rag, kepar dell leveris dhymm, bys yn park gelwys Ardat; ha my a esedhas ena yn mysk an bleujyow, ha dybri rann a losowys an park, ha'n voes na a veu lowr ragov. 27Wosa eth dydh, ha my esedhys war an gwels, ow holonn a veu troblys arta a-berth ynnov, avel kyns.

28Ena ow ganow a veu igerys, ha my a dhallathas kewsel a-rag an Ughella: 29‘A Arloedh, ty a dhiskwedhas dha honan dhymm, dh'aga thasow y'n gwylvos pan dheuthons yn-mes a Ejyp, ha pan dheuthons bys yn gwylvos na via trettys, ha difrut; ha ty a leveris dhedha, 30“Klew vy, ty Ysrael, ha goslow orth ow geryow, a has Yakob. 31Rag my a has ow lagha ynnowgh, ha hi a dheg frut ynnowgh, ha hwi a vydh glorifiys dredhi bys vykken.” 32Rag kyn tegemmeras agan tasow an lagha, ny's siwsons na ny withsons an ordenansow. Mes nyns eth frut an lagha dhe goll, ha ny yllis, rag dhiso jy y feu. 33Mes an re a's degemmeras eth dhe goll, rag ny withsons an pyth a via hesys ynna. 34Hag otta, an usadow yw, pan dhegemmer an dor has, po an mor gorhel, po neb lester boes po diwes, ha pan vo distruys an pyth a veu hesys po lonchys po gorrys a-ji, 35distruys yns; mes an taklow a veu ynna yw gesys; mes genen ni nyns yw yndella. 36Rag ni, degemmeroryon an lagha, a dhe goll dre beghes, hag ynwedh agan kolonn, an lester a's synsis. 37Mes nyns a dhe goll an lagha hy honan, mes hi a bes yn hy glori.’

Gwelesigeth an Venyn Alarek

38Pan esen ow kewsel an taklow ma y'm kolonn, my a viras a-dro, ha gweles benyn a-dhyghowbarth, hag otta, yth esa ow kyni hag owth oela gans lev ughel, grevys meur yn hy enev; hy dillas o skwardys, hag yth esa lusu war hy fenn, 39Ena my a dewlis a-denewen an prederow a lenwi ow brys, ha treylya dhedhi ha leverel, 40‘Prag yth es'ta owth oela, ha prag yth osta grevys y'th enev?’

41Yn-medh hi dhymm, ‘Gas my ow honan, ow arloedh, mayth oelliv ha keworra dhe'm dolor, rag hwerow meur ov y'm enev, hag uvelhes yn feur.’ 42Yn-medhav dhedhi, ‘Pandr'a hwarva? Lavar dhymm.’ Yn-medh hi dhymm, 43My dha vaghteth a veu anvap, heb flogh, kyn feu dhymm gour deg blydhen warn ugens. 44Pub eur ha pub dydh y'n deg blydhen warn ugens na my a bysis war an Ughella. 45Wosa deg blydhen warn ugens Duw a woslowas dhe'th vaghteth, ha mires war ow uvelder, ha gul vri a'm galar, hag ev a ros dhymm mab. My a gavas lowena veur warnodho, ha'm gour ha'm kentrevogyon ynwedh; ha ni a ros enor bras dhe'n Galloesek. 46My a'n magas gans meur a rach. 47Wosa ev dhe devi my a dheuth dhe gavoes gwreg ragdho, ha my a settyas dydh rag an demmedhyans.