Elias A Guhudh Ahazia

1Wosa mernans Ahab Moab a rebellyas erbynn Ysrael.

2Lemmyn Ahazia re goedhsa der an lattis yn y jambour y'n soler yn Samaria, hag o klav. Ytho ev a dhannvonas kannasow, ow leverel dhedha, ‘Kewgh ha govynnewgh orth Baal-zebub, duw Ekron, mar kwrav gwellhe dhiworth an kleves ma.’ 3Mes el an Arloedh a leveris dhe Elias an Tishbeyas, ‘Sav, yskynn dhe vetya orth kannasow myghtern Samaria ha govynn orta, “Yw drefenn nag eus Duw yn Ysrael mayth ewgh dhe wovynn orth Baal-zebub, duw Ekron?” 4Lemmyn ytho yndellma y lever an Arloedh, “Ny wredh diyskynna dhiworth an gweli res ythys dhodho. Merwel a wredh, yn sur.” ’ Hag Elias a omdennas.

5Pan dhehwelis an kannasow dhe'n myghtern, ev a wovynnas orta, ‘Prag y tehwelsowgh?’ 6‘Den a dheuth dhe vetya orthyn’, a worthybsons, ‘hag ev a leveris dhyn, “Dehwelewgh dhe'n myghtern a'gas dannvonas ha leverewgh dhodho: Yndellma y lever an Arloedh: Yw drefenn nag eus Duw yn Ysrael may tannvonydh kannasow dhe wovynn orth Baal-zebub, duw Ekron? Rakhenna ny wredh diyskynna dhiworth an gweli res ythys dhodho. Merwel a wredh, yn sur.” ’ 7Hag ev a leveris dhedha, ‘Py par gour o hag a dheuth dhe vetya orthowgh ha leverel hemma dhywgh?’ 8I a worthybis, ‘Gwiskys o yn dillasenn a vlew gans grogys a ledher a-dro dh'y gres.’ An myghtern a leveris, ‘Elias an Tishbeyas o henna.’

9Ena an myghtern a dhannvonas dhodho kapten a hanter-kans gans y hanter-kans den. Ev eth trohag Elias, esa owth esedha war benn bre, ha leverel dhodho, ‘Gour Duw, an myghtern a lever, “Diyskynn!” ’ 10Elias a worthybis dhe'n kapten, ‘Mars ov gour Duw, des tan dhiworth an nev ha dha gonsumya, ty ha'th hanter-kans den.’ Ena tan a goedhas dhiworth an nev ha'y gonsumya, ev ha'y dus.

11Arta an myghtern a dhannvonas dhodho kapten arall gans y hanter-kans den. An kapten a leveris dhodho, ‘Gour Duw, an myghtern a lever, “Diyskynn yn skon!” ’ 12Elias a worthybis, ‘Mars ov gour Duw, des tan dhiworth an nev ha dha gonsumya, ty ha'th hanter-kans den.’ Ena tan Duw a goedhas dhiworth an nev

13Arta an myghtern a dhannvonas tressa kapten a hanter-kans. An tressa kapten ma a yskynnas ha mos war dhewlin a-dherag Elias. ‘Gour Duw’, a bysis ev, ‘my a'th pys, re bo drudh ow bewnans ha bewnans an hanter-kans den ma y'th wolok. 14Otta, tan re goedhas dhiworth an nev ha gonsumya an kynsa dew gapten a hanter-kansow ha'ga hanter-kans den. Mes lemmyn re bo drudh ow bewnans y'th wolok.’ 15Ena el an Arloedh a leveris dhe Elias, ‘Diyskynn ganso; na borth own anodho.’ Rakhenna ev a sevis ha diyskynna ganso dhe'n myghtern. 16Ev a leveris dhodho, ‘Yndellma y lever an ARLOEDH: A-ban dhannvensys kannasow dhe wovynn orth Baal-zebub, duw Ekron, yw drefenn nag eus Duw yn Ysrael? Ny dhiyskynnydh dhiworth an gweli res ythys dhodho. Merwel a wredh, yn sur.’

Mernans Ahazia

17Ytho ev a verwis herwydh ger an Arloedh re gewsis Elias. Yoram a reynyas yn y le yn nessa blydhen Yehoram mab Yehoshafat myghtern Yuda, drefenn nag esa mab dhodho. 18Gweythresow erell Ahazia a wrug, a nyns yns i skrifys y'n lyver kovadhow myghternedh Ysrael?