Gorladhva Henedh Ahab

1Ahab a'n jevo deg mab ha tri-ugens yn Samaria. Ha Yehu a skrifas lytherow ha'ga dannvon dhe Samaria, dhe rewloryon Yezreel, dhe'n henavogyon, ha dhe withysi mebyon Ahab, ow leverel, 2‘Kettell dheu an lyther dhywgh, rag bos mebyon agas mester genowgh, ha rag bos genowgh charettow ha mergh, sita gerys hag arvow, 3dewisewgh mab agas mester hag yw an gwella ha'n moyha abel, ha'y settya war dron y das, ha batalyas a-barth chi agas mester.’ 4Mes yth esa own dres eghenn dhedha, hag i a leveris, ‘Otta, ny allas an dhew vyghtern sevel orto; fatell yllyn ni sevel orto?’ 5Ytho menystrer an palys, governour an sita, an henavogyon ha'n withysi, a dhannvonas messaj dhe Yehu, ow leverel, ‘Dha wesyon on, ha ni a wra pup-tra a bysydh. Ny wren dhe dhenvyth bos myghtern; gwra an pyth yw ewn y'th tewlagas.’ 6Ena ev a skrifas nessa lyther dhedha, ow leverel, ‘Mars owgh a-barth dhymm, ha mars owgh parys dhe woslowes orth ow lev, kemmerewgh pennow mebyon agas mester ha dos dhymm yn Yezreel a-vorow dhe'n eur ma.’ Hag yth esa mebyon an myghtern, deg den ha tri-ugens, gans ugheloryon an sita esa orth aga maga. 7Pan dheuth an lyther dhedha, i a gemmeras mebyon an myghtern ha'ga ladha; i a worras aga fenn yn kanstellow ha'ga dannvon dhe Yezreel. 8Y teuth kannas, hag ev a dherivas dhodho, ow leverel, ‘I re dhros pennow mebyon an myghtern.’ Ena ev a leveris, ‘Gorrewgh i yn dew gals orth entrans an yet bys myttin.’ 9Ternos yth eth ev yn-mes, ha sevel ha leverel dhe'n bobel oll, ‘Ankablus owgh; otta, my a vrasas erbynn ow mester ha'y ladha; mes piw a ladhas oll an re ma? 10Godhvydhewgh lemmyn na goedh dhe'n dor travyth a er an Arloedh, a gewsis an Arloedh a-dro dhe ji Ahab; rag an Arloedh re wrug an pyth a leveris der y was Elias.’ 11Ytho Yehu a ladhas peub o gesys a ji Ahab yn Yezreel, hag oll y dus veur, ha'y gerens, ha'y oferysi, bys pan ny asas ev dhodho denvyth ow skapya.

12Ena ev a sevis ha diberth, ha dos dhe Samaria. War an fordh, hag ev yn Beth-eked a'n Vugeledh, 13Yehu a vetyas orth breder Ahazia myghtern Yuda, ha leverel, ‘Piw owgh hwi?’ Hag i a worthybis, ‘Breder Ahazia on; yth eson ow mos yn-nans dhe salusi mebyon an myghtern ha mebyon an vyghternes.’ 14Hag ev a leveris, ‘Kemmerewgh i yn few.’ Hag i a's kemmeras yn few ha'ga ladha orth puth Beth-eked, dew ha dew-ugens oll war-barth; ny sparyas denvyth.

15Wosa dhiberth alena ev a vetyas orth Yehonadab mab Rekab ow tos dhe vetya orto; ev a'n salusis ha leverel dhodho, ‘Yw dha golonn len, kepar dell yw ow holonn len dhis?’ Yehonadab a worthybis, ‘Yw.’ ‘Mars yw, roy dhymm dha leuv.’ Hag ev a ros dhodho y leuv; hag ev a'n drehevis dhodho y'n charett. 16Hag ev a leveris, ‘Deus genev ha gweles ow avi rag an Arloedh.’ Ytho ev a wrug dhodho marghogeth yn y jarett. 17Pan dheuth dhe Samaria ev a ladhas peub o gesys dhe Ahab yn Samaria bys pan y's distrusa, herwydh ger an Arloedh a gewsis ev dhe Elias.

Ladhva Gordhyoryon Baal

18Ena Yehu a guntellas oll an bobel war-barth ha leverel dhedha, ‘Ahab a servyas Baal nebes; mes Yehu a wra y servya yn feur. 19Lemmyn gelwewgh dhymm oll profoesi Baal, oll y wesyon hag oll y oferysi; na fylles denvyth dos, rag my a'm beus sakrifis bras dhe offrynna dhe Baal; ny wra bewa an re a fyll dos.’ Mes Yehu a'n gwrug gans felder, dhe dhistrui gordhyoryon Baal. 20Yehu a leveris, ‘Sakrewgh kuntelles solem rag Baal.’ Hag i a'n gelwis. 21Ena Yehu a dhannvonas messaj der oll Ysrael; oll gordhyoryon Baal a dheuth ma nag esa den gesys na dheuth. I a entras yn tempel Baal, ha leun o tempel Baal dhiworth an eyl penn dh'y gila. 22Ev a leveris dhe withyas an dhillasva, ‘Doroy an goenyow rag oll gordhyoryon Baal.’ Ytho ev a dhros an goenyow ragdha. 23Ena Yehu eth gans Yehonadab mab Rekab a-berth yn tempel Baal ha leverel dhe wesyon Baal, ‘Hwilewgh ha gwelewgh nag eus omma genowgh gwesyon an Arloedh, mes unnsel gwesyon Baal.’ 24Ena i eth a-ji rag gul sakrifisow hag offrynnow leskys. Yehu a settyas peswar-ugens a'y wer tu a-ves ha leverel, ‘An gour a as onan a'n wer a dhrov yn agas diwleuv dhe skapya, y vewnans a vydh yn le bewnans an skapyer.’ 25Kettell worfennas gul an offrynn leskys, Yehu a leveris dhe'n korfwithysi ha'n gaptenyon, ‘Kewgh a-ji ha'ga ladha; na skapyes denvyth.’ Hag i a's gweskis gans min an kledha; ha'n withysi ha'n gaptenyon a's tewlis yn-mes. Ena i eth yn sentri pervedhel tempel Baal. 26I a gemmeras yn-mes an peulven10:26 peulven: Ow siwya an Septuagint. Ebrow peulveyn. esa yn tempel Baal ha'y leski. 27Ena i a vrewis peulven Baal, ha distrui tempel Baal, ha gul anodho kawghti, bys y'n jydh hedhyw.

28Yndella y hwrug Yehu distrui Baal yn-mes a Ysrael. 29Byttegyns ny dreylyas Yehu dhiworth peghosow Yeroboam mab Nebat a wrug dhe Ysrael pegha – an leughi owrek esa yn Bethel hag yn Dan. 30An Arloedh a leveris dhe Yehu, ‘Drefenn ty dhe wul yn ta dre gollenwel an pyth yw ewn y'm dewlagas, ha dhe dhyghtya chi Ahab herwydh pup-tra esa y'm kolonn, dha vebyon a'n peswora henedh a esedh war dron Ysrael.’ 31Mes ny waytyas Yehu siwya lagha an Arloedh, Duw Ysrael, a leun golonn. Ny dreylyas dhiworth peghosow Yeroboam a wrug dhe Ysrael pegha.

Mernans Yehu

32Y'n dydhyow na an Arloedh a dhallathas godreghi rannow a Ysrael, ha Hazael a's fethas dre oll oryon Ysrael: 33dhiworth an Yordan dhe'n howldrevel, oll tiredh Gilead, an Gadysi, ha'n Rewbenysi, ha'n Manassysi, dhiworth Aroer usi ryb nans Arnon, henn yw, Gilead ha Bashan. 34Gweythresow erell Yehu, ha pup-tra a wrug, hag oll y nerth, a nyns yns i skrifys yn lyver kovadhow myghternedh Ysrael? 35Yehu a goskas gans y dasow, hag i a'n ynkleudhyas yn Samaria. Ha Yehoahaz y vab a reynyas yn y le. 36An termyn may reynyas Yehu war Ysrael o eth blydhen warn ugens.