Ewnheans an Tempel

1Y'n seythves blydhen a Yehu, Yoash a dhallathas reynya, hag ev a reynyas dew-ugens blydhen yn Yerusalem. Hanow y vamm o Sibya a Beer-sheba. 2Yoash a wrug an pyth o ewn yn golok an Arloedh dres y dhydhyow oll, drefenn Yehoyada an oferyas dh'y dhyski. 3Mes ny veu an tylleryow ughel kemmerys dhe-ves; an bobel a besyas sakrifia ha leski offrynnow y'n tylleryow ughel.

4Yoash a leveris dhe'n oferysi, ‘Oll an arghans yw dres yn chi an Arloedh avel rohow sakrys – toll an niveryans, talas ambosow, – hag arghans an offrynnow bodhek dres a-berth yn chi an Arloedh, 5kemmeres an oferysi an re ma dhiworth an alhwedhor, hag ewnhe an chi plepynag may fo edhomm a ewnheans diskudhys.’ 6Mes erbynn an tressa blydhen warn ugens a vyghtern Yoash, ny wrussa an oferysi ewnheansow dhe'n chi. 7Rakhenna myghtern Yoash a elwis Yehoyada an oferyas gans an oferysi erell ha leverel dhedha, ‘Prag nag esowgh owth ewnhe an chi? Lemmyn, ytho, na dhegemmerowgh arghans moy dhiworth agas alhwedhoryon, mes y dhaskorr rag ewnheans an chi.’ 8Ytho an oferysi a assentyas na dhegemmerens arghans moy dhiworth an bobel, na ewnhe an chi aga honan.

9Yehoyada an oferyas a gemmeras kist ha tardra toll yn hy gorher, ha'y settya ryb an alter, a'n barth dhyghow ow tos a-berth yn chi an Arloedh. An oferysi esa ow kwitha an treudhow a worras ynni oll an arghans a veu dres a-berth yn chi an Arloedh. 10Peskweyth may hwelsons bos meur a arghans y'n gist, skrifennyas an myghtern ha'n arghoferyas a dheuth, hag i a gomptyas an arghans a veu kevys yn chi an Arloedh ha'y gelmi yn seghyer. 11I a ros an arghans a veu poesys yn leuv an re a worviri an ober yn chi an Arloedh; ena i a'n peas dhe'n seri prenn ha'n drehevoryon esa owth oberi yn chi an Arloedh, 12dhe'n seri men ha'n dreghoryon men, ha rag prena prenn ha men nedhys rag gul ewnheansow dhe ji an Arloedh, ha rag oll an kostow rag ewnheansow dhe'n chi. 13Byttegyns ny wrussons devnydh a'n arghans dres yn chi an Arloedh dhe wul bollow a arghans, gwelsigow-porv, bollow-offrynn, hirgern, lestri a owr po lestri a arghans, 14rag res veu henna dhe'n weythoryon esa owth ewnhe chi an Arloedh ganso. 15Ny byssons akontys dhiworth an wer a dhelirvsons dhedha an arghans yn aga leuv rag tyli an weythoryon, rag i a dhyghtya yn onest. 16Ny veu an arghans dhiworth an offrynnow kammweyth ha'n offrynnow pegh dres a-berth y'n chi an Arloedh; an oferysi a's pewas.

Hazael a Wodros Yerusalem

17Ena Hazael myghtern Aram eth yn-bann ha batalyas orth Gath ha'y hemmeres. Mes pan settyas y fas rag mos yn-bann erbynn Yerusalem, 18Yoash myghtern Yuda a gemmeras oll an rohow sans re sakras y ragresygyon Yehoshafat, Yoram hag Ahazia, myghternedh Yuda, hag oll an owr a veu kevys yn tresoryow chi an Arloedh hag yn chi an myghtern, ha'ga dannvon dhe Hazael myghtern Aram, hag ev a gildennas dhiworth Yerusalem.

Mernans Yoash

19Gweythresow erell Yoash, ha pup-tra a wrug, a nyns yns i skrifys yn lyver kovadhow myghternedh Yuda? 20Y wesyon a sevis ha gul bras, ha ladha Yoash yn chi Millo, war an fordh a dhiyskynn dhe Silla. 21Yozakar mab Shimeath, ha Yehozabad mab Shomer, y wesyon, a'n ladhas hag ev a verwis. Hag ev a veu ynkleudhys gans y dasow yn sita Davydh; hag Amasia a reynyas yn y le.