Yehoahaz a Reyn war Ysrael

1Y'n tressa blydhen warn ugens a vyghtern Yoash mab Ahazia myghtern Yuda, Yehoahaz mab Yehu a dhallathas reynya war Ysrael yn Samaria, hag ev a reynyas seytek blydhen. 2Ev a wrug an pyth o drog yn golok an Arloedh, ha siwya peghosow Yeroboam mab Nebat, a wrug dhe Ysrael pegha; ny dreylyas dhiworta. 3Sorr an Arloedh a dhewis erbynn Ysrael, hag ev a's delivras a-berth yn leuv Hazael myghtern Aram, hag a-berth yn leuv Ben-hadad mab Hazael, dres nebes blydhynyow. 4Ha Yehoahaz a bledyas gans an Arloedh, ha'n Arloedh a woslowas orto; rag ev a welas arwask Ysrael, fatell y's arweski myghtern Aram. 5Ytho an Arloedh a ros selwyas dhe Ysrael, may tianksons dhiworth leuv Aram; hag yth esa fleghes Ysrael trigys yn aga thyldow kepar ha kyns. 6Byttegyns ny dreylsons dhiworth peghosow chi Yeroboam, a wrug dhe Ysrael pegha, mes i a gerdhas ynna; an Ashera a veu gesys a'y sav yn Samaria ynwedh. 7Nyns esa gesys dhe Yehoahaz lu a voy ages hanter-kans marghek ha deg charett, ha deg mil droesek; rag myghtern Aram re's distrusa, ha re wrussa dhedha bos kepar ha doust drushya. 8Gweythresow erell Yehoahaz, ha pup-tra a wrug, a nyns yns i skrifys yn lyver kovadhow myghternedh Ysrael? 9Yehoahaz a goskas gans y dasow hag i a'n ynkleudhyas yn Samaria; ha Yehoash y vab a reynyas yn y le.

Yehoash a Reyn war Ysrael

10Y'n seytegves blydhen warn ugens a Yoash myghtern Yuda Yehoash mab Yehoahaz a dhallathas reynya war Ysrael yn Samaria, hag ev a reynyas hwetek blydhen. 11Ev a wrug an pyth o drog yn golok an Arloedh, ha ny dhibarthas dhiworth oll peghosow Yeroboam mab Nebat, a wrug dhe Ysrael pegha; mes ev a gerdhas ynna. 12Gweythresow erell Yehoash, ha pup-tra a wrug, ha'y nerth yn y vresel erbynn Amasia myghtern Yuda, a nyns yns i skrifys yn lyver kovadhow myghternedh Ysrael? 13Yehoash a goskas gans y dasow, ha Yeroboam a esedhas war y dron. Yoash a veu ynkleudhys yn Samaria gans myghternedh Ysrael.

Mernans Elisha

14Pan eth Elisha yn klav gans an kleves may ferwis anodho, Yehoash myghtern Ysrael a dheuth yn-nans dhodho hag oela a-ragdho, ha leverel, ‘A ow thas, ow thas! Charett Ysrael ha'y varghogyon!’ 15Elisha a leveris dhodho, ‘Kemmer gwarak ha sethow’; hag ev a gemmeras gwarak ha sethow. 16Ev a leveris dhe vyghtern Ysrael, ‘Gorr dha leuv war an warak.’ Hag ev a worras y leuv warnedhi. Elisha a worras y dhiwleuv war dhiwleuv an myghtern. 17Ena ev a leveris, ‘Igor an fenester troha'n howldrevel.’ Ev a's igoras. Ena Elisha a leveris, ‘Tenn’; hag ev a dennas. Ena ev a leveris, ‘Seth rag trygh an Arloedh, seth rag trygh war Aram! Ty a feth Aram glan yn Afek.’ 18Ena ev a leveris, ‘Kemmer an sethow’; hag ev a's kemmeras. Ev a leveris dhe vyghtern Ysrael, ‘Gwask an dor gansa.’ Hag ev a weskis teyrgweyth ha hedhi. 19Gour Duw o serrys ganso hag yn-medh, ‘Ty a dalvia gweskel pymp po hwegh gweyth; ena ty a fethsa Aram glan, mes lemmyn ny weskydh Aram marnas teyrgweyth.’

20Elisha a verwis hag i a'n ynkleudhyas. Bagasow a Moabysi a wre omsettyansow war an tir orth dalleth an vlydhen. 21Hag y hwarva, pan esens owth ynkleudhyas neb gour, i a welas bagas a soudoryon, hag i a dewlis an gour a-berth yn bedh Elisha ha mos dhe-ves: kettell dochyas an gour eskern Elisha, ev a dhasvewas ha sevel war y dreys.

Ysrael a Syns Sitys dhiworth Aram Arta

22Hazael myghtern Aram a arweskis Ysrael dres dydhyow oll Yehoahaz. 23Grassyes orta o an Arloedh, hag ev a'n jevo truedh warnedha. Ev a dreylyas trohag i drefenn y gevambos gans Abraham, Ysak ha Yakob, ha ny vynnas aga distrui; ha ny's tewlis dhiworth y lok bys y'n eur ma.

24Pan verwis Hazael myghtern Aram, Ben-hadad, y vab, a reynyas yn y le. 25Ena Yehoash mab Yehoahaz a dhaskemmeras dhiworth leuv Ben-hadad mab Hazael an sitys a gemmersa dhiworth leuv Yehoahaz y das yn bresel. Teyrgweyth Yehoash a'n fethas, ha daskavoes sitys Ysrael.