Amasia a Reyn war Yuda

1Y'n nessa blydhen a Yehoash mab Yehoahaz myghtern Ysrael, Amasia mab Yoash myghtern Yuda a dhallathas reynya. 2Pymp bloedh warn ugens o ev pan dhallathas reynya, hag ev a reynyas naw blydhen warn ugens yn Yerusalem. Hanow y vamm o Yehoaddan a Yerusalem. 3Ev a wrug an pyth o ewn yn golok an Arloedh, mes a-der kepar ha Davydh y das; ev a wrug pup-tra kepar dell re wrussa Yoash y das. 4Ny veu an tylleryow ughel kemmerys dhe-ves: an bobel a besyas sakrifia ha leski offrynnow war an tylleryow ughel. 5Kettell veu an vyghterneth fastys yn y leuv, ev a ladhas y wesyon re ladhsens an myghtern y das. 6Mes ny ladhas fleghes an voldroryon, herwydh an pyth yw skrifys yn lyver lagha Moyses, le may worhemmynnis an Arloedh, ‘Ny vydh tasow ledhys rag mebyon, ha ny vydh mebyon ledhys rag tasow; mes pubonan a vydh ledhys rag y begh y honan.’14:6: Dew 24:16.

7Ev a ladhas deg mil Edomyas yn nans an Hoelan ha dalghenna Sela dre vresel, ha'y henwel Yoktheel, dell yw bys y'n jydh hedhyw.

8Ena Amasia a dhannvonas kannasow dhe vyghtern Yehoash mab Yehoahaz mab Yehu myghtern Ysrael, ow leverel, ‘Deus, miryn an eyl orth y gila fas orth fas.’ 9Yoash myghtern Ysrael a dhannvonas ger dhe Amasia myghtern Yuda, ow leverel, ‘An askallenn yn Lebanon a dhannvonas messaj dhe gederwydhenn yn Lebanon, ow leverel, “Ro dha vyrgh dhe'm mab avel gwreg”; mes best gwyls yn Lebanon a dremenas, hag a drettyas war an askallenn. 10Ty re weskis Edom, dhe wir, ha dha golonn re'th trehevis. Bydh lowen gans an glori ha gorta y'n chi; rag prag y fynnydh entra yn trobel ha koedha, ty ha Yuda genes?’

11Mes ny vynna Amasia klewes. Rakhenna Yehoash myghtern Ysrael eth yn-mes. Ev hag Amasia myghtern Yuda a viras an eyl orth y gila fas orth fas yn Beth-shemesh yn Yuda. 12Yuda a veu fethys gans Ysrael, ha pub gour a fias dh'y dylda. 13Yehoash myghtern Ysrael a gemmeras Amasia myghtern Yuda mab Yehoash mab Ahazia yn Beth-shemesh. Ev a dheuth dhe Yerusalem ha gul aswa yn fos Yerusalem dhiworth Yet Efraym bys yn Yet an Gornell, peswar kans kevelin. 14Ev a gemmeras oll an owr hag arghans, hag oll an lestri a veu kevys yn chi an myghtern, hag yn tresorvaow chi an myghtern, ha goestlow, ha dehweles dhe Samaria.

15Gweythresow erell Yehoash a wrug, ha'y nerth, ha fatell vatalyas orth Amasia myghtern Yuda, a nyns yns i skrifys yn lyver kovadhow myghternedh Ysrael? 16Yehoash a goskas gans y dasow, hag a veu ynkleudhys yn Samaria gans myghternedh Ysrael; ha Yeroboam y vab a reynyas yn y le.

17Amasia mab Yoash myghtern Yuda a vewa pymthek blydhen wosa mernans Yehoash mab Yehoahaz. 18Gweythresow erell Amasia, a nyns yns i skrifys yn lyver kovadhow myghternedh Yuda? 19I a wrug bras er y bynn yn Yerusalem, hag ev a fias dhe Lakish; mes i a dannvonas war y lergh dhe Lakish ha'y ladha ena. 20I a'n dros war vergh, hag ev a veu ynkleudhys yn Yerusalem gans y dasow yn sita Davydh. 21Hag oll pobel Yuda a gemmeras Azaria, o hwetek bloedh, ha gul dhodho bos myghtern yn le y das Amasia. 22Ev a dhrehevis Elath, ha'y daskorr dhe Yuda, wosa an myghtern dhe goska gans y dasow.

Yeroboam II a Reyn War Ysrael

23Y'n pymthegves blydhen a Amasia mab Yoash myghtern Yuda, Yeroboam mab Yoash myghtern Ysrael a dhallathas reynya yn Samaria, ha reynya unn vlydhen ha dew-ugens. 24Ev a wrug an pyth o drog yn golok an ARLOEDH: ny dhibarthas dhiworth oll peghosow Yeroboam mab Nebat, a wrug dhe Ysrael pegha. 25Ev a dhaswrug or Ysrael dhiworth Lebo-hamath bys yn mor Araba, herwydh ger Arloedh Ysrael, a gewsis dre leuv y was Yona mab Amittay, an profoes a Gath-hefer. 26Rag an Arloedh a welas bos ahwer Ysrael pur hwerow; nyns esa denvyth gesys, keth po rydh, na denvyth dhe weres Ysrael. 27Mes ny lavarsa an Arloedh ev dhe dhefendya hanow Ysrael yn-dann nev; ytho ev a's sawyas dre leuv Yeroboam mab Yoash.

28Gweythresow erell Yeroboam, ha pup-tra a wrug, ha'y nerth in breselyow, ha fatell dhaskavas Damaskus ha Hamath rag Ysrael,14:28 rag Ysrael: Ow siwya an Syriek. Ebrow re bia dhe Yuda, rag Ysrael. a nyns yns i skrifys yn lyver kovadhow myghternedh Ysrael? 29Yeroboam a goskas gans y dasow, gans myghternedh Ysrael; ha Zekaria y mab a reynyas yn y le.