Ahaz a Reyn war Yuda

1Y'n seytegves blydhen a Pekagh mab Remalia, Ahaz mab Yotham myghtern Yuda a dhallathas reynya. 2Ugens bloedh o Ahaz pan dhallathas reynya, hag ev a reynyas hwetek blydhen yn Yerusalem, ha ny wre an pyth o ewn yn golok an Arloedh y Dhuw, kepar ha Davydh y das. 3Mes ev a gerdhi yn hynsyow myghternedh Ysrael, hag a wrug dh'y vab tremena dre dan, herwydh gweythresow divlas an kenedhlow a fesyas an Arloedh a-rag pobel Ysrael. 4Hag ev a sakrifia ha leski offrynnow y'n tylleryow ughel, ha war an breow, hag yn-dann bub gwydhenn las.

5Ena Resin myghtern Aram, ha Pekagh mab Remalia myghtern Ysrael, eth yn-bann dhe Yerusalem rag bresel; i a settyas esedhva a-dro dhe Ahaz mes ny yllens y fetha. 6Y'n termyn na Resin, myghtern Aram a dhaskavas Elath rag Aram ha fesya an Yedhewon dhiworth Elath; an Edomysi a dheuth dhe Elath, hag i re drigas ena bys y'n jydh hedhyw. 7Ahaz a dhannvonas kannasow dhe Tiglath-pileser myghtern Assyria, ow leverel, ‘Dha was ha dha vab ov. Deus yn-bann ha saw vy dhiworth leuv myghtern Aram ha dhiworth leuv myghtern Ysrael a omsett er ow fynn.’ 8Hag Ahaz a gemmeras an arghans ha'n owr a veu kevys yn chi an Arloedh hag yn tresorvaow chi an myghtern, ha'ga dannvon avel ro dhe vyghtern Assyria. 9Myghtern Assyria a woslowas orto; myghtern Assyria a geskerdhas erbynn Damaskus, ha'y hemmeres, ow toen hy fobel yn keth dhe Kir; hag ev a ladhas Resin.

10Ena myghtern Ahaz eth dhe Damaskus rag metya orth Tiglath-pileser myghtern Assyria, hag ev a welas ena an alter esa yn Damaskus. Myghtern Ahaz a dhannvonas dhe'n oferyas Uria patron a'n alter, hag oll manylyon hy drehevyans. 11Ytho Uria an oferyas a dhrehevis alter herwydh pup-tra re dhannvonsa myghtern Ahaz dhiworth Damaskus; hag Uria an oferyas a'n drehevis kyns an myghtern dhe dhos dhiworth Damaskus. 12Pan veu an myghtern devedhys dhiworth Damaskus, an myghtern a welas an alter. Ena an myghtern a dheuth nes dhe'n alter hag mos yn-bann dhedhi. 13Ev a loskas y offrynn leskys ha'y offrynn greun, ha divera y offrynn diwes, ha skoellya goes y offrynnow kres war an alter. 14Ev a gemmeras an alter a vrons esa a-rag an Arloedh dhiworth tal an chi, dhiworth an le ynter an alter nowydh ha chi an Arloedh, ha'y gorra orth tu kledhbarth an alter nowydh. 15Myghtern Ahaz a worhemmynnis dhe Uria an oferyas, ow leverel, ‘War an alter veur losk offrynn leskys an myttin, hag offrynn greun an gorthugher, hag offrynn leskys an myghtern, ha'y offrynn greun, gans offrynn leskys oll pobel an pow, aga offrynn greun, ha'ga offrynn diwes; ena skoell warnedhi oll an goes dhiworth an offrynnow leskys, hag oll an goes dhiworth an sakrifisow; mes an alter a vrons a vydh dhymmo vy rag ow devnydh ow honan.’16:15 rag ow devnydh ow honan: Styr an Ebrow yw ankler. 16Yndella y hwrug Uria an oferyas, herwydh pup-tra a worhemmynnis Ahaz.

17Myghtern Ahaz a droghas dhe-ves pannellow an karrigellow, hag a gemmeras yn-nans an wolghell ha'n mor a-dhiworth an oghen a vrons esa yn-danno, ha'y worra war sel a veyn. 18Ev a gemmeras dhe-ves an portal gorherys rag devnydh y'n sabot re bia drehevys y'n chi, ha'n entrans rag an myghtern tu a-ves dhe ji an Arloedh. Ev a wrug hemma dhe blesya myghtern Assyria. 19Gweythresow erell Ahaz a wrug, a nyns yns i skrifys yn lyver kovadhow myghternedh Yuda? 20Ahaz a goskas gans y dasow, hag ev a veu ynkleudhys gans y dasow yn sita Davydh. Y vab Hezekia a reynyas yn y le.