Hoshea a Reyn War Ysrael

1Y'n dewdhegves blydhen a Ahaz myghtern Yuda Yoshua mab Ela a dhallathas reynya yn Samaria war Ysrael; ev a reynyas naw blydhen. 2Ev a wrug an pyth o drog yn golok an Arloedh, mes nyns o mar dhrog dell veu myghternedh Ysrael kyns. 3Shalmaneser myghtern Assyria a dheuth yn-bann er y bynn; Hoshea re bia y omajer ha re rosa trubyt dhodho. 4Mes myghtern Assyria a gavas trayturi yn Yoshua; rag ev re dhannvonsa kannasow dhe So myghtern Ejyp, ha ny via ow ri trubyt dhe vyghtern Assyria, dell wrussa blydhen wosa blydhen;

Ysrael Degys Yn Keth Dhe Assyria

5Ena myghtern Assyria a omsettyas erbynn oll an pow hag a dheuth dhe Samaria; ev a worras esedhva a-dro dhedhi teyr blydhen. 6Y'n nownsegves blydhen a Hoshea, myghtern Assyria a gemmeras Samaria; ev a dhug Ysrael yn divroedh dhe Assyria, ha'ga gorra yn Halagh ha ryb an avon Habor yn Gozan, hag yn sitys an Medys.

7Hemma a hwarva drefenn fleghes Ysrael dhe begha erbynn an Arloedh aga Duw, re'ga drosa yn-bann dhiworth pow Ejyp, dhiworth leuv Faro myghtern Ejyp, hag i re borthsa own a duwow erell 8ha kerdhes yn ordenansow an kenedhlow a wrussa an Arloedh aga fesya yn-mes a-rag an Ysraelysi, ha kerdhes y'n taklow gwrys gans myghternedh Ysrael. 9An Ysraelysi a askrifsons taklow na veu ewn erbynn an Arloedh aga Duw, hag i a dhrehevis ragdha aga honan tylleryow ughel yn oll aga threvow, dhiworth touryow goelyadoryon bys sitys kerys. 10I a settyas yn-bann ragdha aga honan peulveyn hag Asherim war bub bre ughel hag yn-dann bub gwydhenn las; 11hag ena i a loskas offrynnow yn pub tyller ughel, kepar dell wre an kenedhlow a wrug an Arloedh aga fesya a-ragdha. I a wre drogoberow a brovokyas an Arloedh dhe sorr; 12i a servya idolys, may leveris anedha an Arloedh dhedha, ‘Ny wrewgh hemma.’ 13Byttegyns an Arloedh a warnyas Ysrael ha Yuda dre bub profoes ha pub gwelesydh, ow leverel, ‘Treylyewgh dhiworth agas drog fordhow ha gwithewgh ow gorhemmynnow ha'm ordenansow, herwydh oll an lagha a worhemmynnis dh'agas tasow hag a dhannvenis dhywgh der ow gwesyon ha'm profoesi.’ 14Ny vynnsens goslowes mes kales aga hilbenn ens, dell ens aga thasow na grysi y'n Arloedh aga Duw. 15I a asas y laghys, ha'y gevambos a wrug ev gans aga thasow, ha'n gwarnyansow a ros ev dhedha. I a siwyas idolys koeg hag eth ha bos koeg aga honan; i a siwyas an kenedhlow esa a-dro dhedha, hag a-dro dhedha an Arloedh re worhemmynnsa na dalvia dhedha gul yndella. 16I a asas oll gorhemmynnow an Arloedh aga Duw, ha gul ragdha aga honan imajys teudhys a dhew leugh, ha gul Ashera, ha gordhya oll lu an nevow, ha servya Baal. 17I a wre dh'aga mebyon ha myrghes tremena dre dan; i a dhevnydhya dewinieth ha pystri; hag i a omros aga honan dhe wul drog yn golok an Arloedh, orth y brovokya dhe sorr. 18Rakhenna an Arloedh o serrys yn feur orth Ysrael, ha'ga hemmeres mes a'y wel; nyns esa gesys saw unnsel loeth Yuda.

19Ny withas Yuda ynwedh gorhemmynnow an Arloedh aga Duw, mes i a gerdhas yn ordenansow gwrys gans Ysrael. 20An Arloedh a skonyas oll henedh Ysrael, ha'ga hessydhya ha'ga gorra yn leuv preydhoryon, bys pan re's tewlsa mes a'y wel.

21Rag ev a skwardyas Ysrael dhiworth chi Davydh; hag i a wrug dhe Yeroboam mab Nebat bos myghtern: ha Yeroboam a dhynyas Ysrael dhiworth holya an Arloedh, hag a wrug dhedha gul pegh bras. 22An Ysraelysi a gerdhas yn oll an peghosow a wrug Yeroboam; ny dreylsons dhiworta, 23bys pan worras an Arloedh Ysrael mes a'y wel, dell lavarsa ev der oll y wesyon an brofoesi. Yndella y feu Ysrael degys dhe-ves yn divroedh, yn-mes a'ga thiredh aga honan dhe Assyria, bys y'n jydh ma.

Assyria a Dhre Poblow Erell dhe Samaria

24Myghtern Assyria a dhros tus dhiworth Babylon, Kutha, Avva, Hamath, ha Sefarvaym, ha'ga gorra yn sitys Samaria yn le an Ysraelysi; hag i a gemmeras Samaria yn perghennogeth, ha triga yn hy threvow. 25Pan dhallathsons triga ena, ny borthsons own a'n Arloedh; rakhenna an Arloedh a dhannvonas lewyon yn aga mysk, a ladhas re anedha. 26Ytho leverys veu dhe vyghtern Assyria, ‘Ny woer an kenedhlow re dhegsowgh ha gorra yn sitys Samaria lagha duw an pow; rakhenna ev re dhannvonas lewyon yn aga mysk; hag ymons orth aga ladha drefenn na wodhons lagha duw an pow.’ 27Ena myghtern Assyria a worhemmynnis, ‘Dannvenewgh di onan a'n oferysi a dhugowgh alena; gwres mos ha triga ena, ha dyski dhedha lagha duw an pow.’ 28Ena onan a'n oferysi re dhegsens dhiworth Samaria a dheuth ha triga yn Bethel; ev a dhyskas dhedha fatell dela dhedha gordhya an Arloedh.

29Mes pubonan a'n kenedhlow a besyas gul aga duwow aga honan ha'ga gorra yn chiow an tylleryow ughel re wrussa tus Samaria, pub kenedhel yn sitys esens trigys ynna. 30Pobel Babylon a wrug Sukkoth-benoth, pobel Kutha a wrug Nergal, pobel Hamath a wrug Ashima, 31an Avviysi a wrug Nibhaz ha Tartak, ha'n Sefarvysi a leski aga fleghes yn tan dhe Adrammelek hag Anammelek, duwow Sefarvaym. 32I a berthi own a'n Arloedh, mes i apoyntyas a-dhiworta tus a bub eghenn avel oferysi a'n tylleryow ughel, a servyas ragdha yn chiow an tylleryow ughel. 33I a berthi own a'n Arloedh ha servya aga duw aga honan, yn gis an kenedhlow re bia degys anedha. 34Bys y'n jydh hedhyw i a bes gans aga gisyow koth.

Ny berthons own a'n Arloedh ha ny withons an ordenansow, na'n breusow, na'n laghys, na'n gorhemmynnow a worhemmynnis an Arloedh dhe vebyon Yakob, neb a ros dhodho an hanow Ysrael. 35An Arloedh a wrug kevambos gansa ha'ga gorhemmynna, ow leverel, ‘Ny wordhyowgh duwow erell na omblegya dhedha na'ga servya na sakrifia dhedha, 36mes hwi a wordh an Arloedh, a'gas dros mes a bow Ejyp gans nerth bras ha gans bregh ystynnys; hwi a ombleg dhodho, ha sakrifia dhodho. 37Gwaytyewgh gwitha an ordenansow, an breusow, an laghys, ha'n gorhemmynnow a skrifas ev ragowgh. Ny wordhewgh duwow erell. 38Ny wrewgh ankevi an kevambos a wrug vy genowgh. Ny wordhyowgh duwow erell, 39mes hwi a wordh an Arloedh agas Duw; ev a wra agas delivra dhiworth leuv oll agas eskerens.’ 40Ny vynnens goslowes, mes i a wrug herwydh aga gisyow kyns.

41Ytho an kenedhlow ma a wordhya an Arloedh mes i a besyas gordhya aga imajys gravys; bys y'n jydh hedhyw aga fleghes, ha fleghes aga fleghes a bes gul an pyth a wrug aga thasow.