Elias a Yskynn Dhe'n Nev

1Pan vynnas an Arloedh kemmeres Elias yn-bann dhe nev gans korwyns, yth eth Elias gans Elisha dhiworth Gilgal. 2Elias a leveris dhe Elisha, ‘Gorta omma, my a'th pys, rag an Arloedh re'm dannvonas dhe Bethel.’ Elisha a leveris, ‘Dell vew an Arloedh, ha dell vew dha enev, ny wrav dha asa.’ Ytho i eth yn-nans dhe Bethel. 3Mebyon an brofoesi yn Bethel a dheuth yn-rag dhe Elisha ha leverel dhodho, ‘A wodhes an Arloedh dhe gemmeres dha vester dhiwarnas hedhyw?’ Ev a leveris, ‘Gonn, my a'n goer. Na leverewgh travyth.’

4Hag Elias a leveris dhodho, ‘Elisha, gorta omma, my a'th pys; rag an Arloedh re'm dannvonas dhe Yeriko.’ Hag ev a leveris, ‘Dell vew an Arloedh ha dell vew dha enev, ny wrav dha asa.’ Ytho i a dheuth dhe Yeriko. 5Mebyon an brofoesi yn Yeriko a dheuth dhe Elisha ha leverel dhodho, ‘A wodhes an Arloedh dhe gemmeres dha vester dhiwarnas hedhyw?’ Hag ev a worthybis, ‘Gonn, my a'n goer. Na leverewgh travyth.’

6Ena Elias a leveris dhodho, ‘Gorta, my a'th pys, rag an Arloedh re'm dannvonas dhe'n Yordan.’ Mes ev a leveris, ‘Dell vew an Arloedh ha dell vew dha enev, ny wrav dha asa.’ Ytho an dhew eth yn-rag. 7Hanter-kans gour a vebyon an brofoesi eth ha sevel rag mires a bellder; ha'n dhew a sevis ryb an Yordan. 8Elias a gemmeras y vantell hag ev a's rolyas ha frappya an dowrow gensi. An dowr a veu diberthys dhe'n eyl tenewen ha dh'y gila mayth eth an dhew a-dreus war dir sygh.

9Pan esens ow mos a-dreus, y leveris Elias dhe Elisha, ‘Lavar dhymm an pyth a allav y wul ragos kyns ow bos kemmerys a-dhiworthis.’ Elisha a leveris ‘My a'th pys, re bo warnav rann dhewblek a'th spyrys.’ 10Hag ev a leveris, ‘Ty re bysis neppyth kales, mes mara'm gwelydh ha my ow pos kemmerys a-dhiworthis, yndella y fydh ragos; poken ny vydh yndella.’ 11Hag y hwarva, hag i ow mos yn-rag ha kewsel, otta, charett a dan ha mergh a dan a's dibarthas an eyl dhiworth y gila, hag Elias eth yn-bann gans korwyns a-berth y'n nev. 12Elisha a welas henna hag ev a armas, ‘Ow thas! Ow thas! Charett Ysrael ha'y varghogyon’. Ha ny'n gwelas na fella. Ev a dhalghennas y dhillas y honan ha'ga skwardya yntra dew.

Elisha a Dheu War-lergh Elias

13Ev a guntellas yn-bann mantell Elias a goedhsa a-dhiworto ha dehweles ha sevel ryb glann an Yordan; 14Ev a gemmeras mantell Elias a goedhsa a-dhiworto ha gweskel an dowr ha leverel, ‘Ple'ma an Arloedh, Duw Elias?’ Pan y'n gweskis. an dowr a veu diberthys dhe'n eyl tenewen ha dh'y gila hag Elisha eth a-dreus.

15Ha pan y'n gwelas mebyon an brofoesi re bia yn Yeriko, i a leveris, ‘Spyrys Elias a drig war Elisha.’ Hag i a dheuth dhe vetya orto hag omblegya dhe'n dor a-ragdho. 16I a leveris dhodho, ‘Otta lemmyn, yma gans dha wesyon hanter-kans gour krev. Gas dhedha mos, ni a'th pys, rag hwilas dha vester, rag own Spyrys an Arloedh re'n synsis yn-bann ha'y dewlel war neb menydh, po yn neb nans.’ Hag ev a leveris, ‘Na's dannvenowgh.’ 17Ha pan ynnisons warnodho bys pan esa meth warnodho, ev a leveris, ‘Dannvenewgh i.’ Ytho i a dhannvonas hanter-kans gour; hag i a hwilas dres tri dydh mes ny'n kavas. 18Ha pan dheuthons arta dhodho, drefenn ev dhe wortos yn Yeriko, ev a leveris dhedha, ‘A ny leveris dhywgh, “Na gewgh”?’

Elisha a Wra Marthusyon

19Gwer an sita a leveris dhe Elisha, ‘Mir, teg yw desedhans an sita ma, dell wel ow arloedh: mes drog yw an dowr ha difroeth yw an tir.’ 20Ev a leveris, ‘Drewgh dhymm bolla nowydh, ha gorrewgh hoelan ynno.’ Hag i a'n dros dhodho. 21Ev eth yn-mes dhe fenten an dowr ha tewlel hoelan ynni ha leverel, ‘Yndellma y lever an Arloedh, “My re burhas an dowr ma; ny vydh a-dhiworta mernans na difroethter na fella.” ’ 22An dowr re beu pur bys y'n jydh ma, herwydh lavar Elisha a leveris ev.

23Ev eth yn-bann alena dhe Bethel. Hag ev ow mos war an fordh, y teuth mebyon vyghan yn-mes a'n sita ha'y skornya, ha leverel dhodho, ‘Ke yn-bann, ty benn-blogh! Ke yn-bann, ty benn-blogh!’ 24Ev a dreylyas a-dro ha mires orta ha'ga milliga yn hanow an Arloedh. Hag y teuth diw orses mes a'n koes ha skwardya dew flogh ha dew-ugens anedha. 25Ev eth alena dhe venydh Karmel, hag alena ev a dhehwelis dhe Samaria.